是咁的,我嘅職業係ptbf: 396.真係原諒你
阿螢揞住紅咗嘅左面,呆咗咁望住我
好彩阿螢唔係諗住以死相逼我同佢一齊,只係因為佢太過自責
「但係⋯⋯我令你好痛苦⋯⋯好傷心⋯⋯我見到你雖生猶死嘅樣⋯⋯真係⋯⋯好心痛⋯⋯」
我雙手捉住阿螢膊頭:「望住我。望實我!見到未?我無事呀!」
阿螢好認真咁注視我嘅雙眼,望咗好耐好耐,突然間,佢笑一笑
「太⋯⋯太好喇⋯⋯你⋯⋯你真係好翻好多喇⋯⋯」佢望我嘅眼神,就好似一個見到仔女病好嘅媽媽
「係,我會更加更加好,你都要更加更加好,知唔知?」
阿螢用力點頭,然後錯開視線:「你真係⋯⋯真係原諒我?」
「真係原諒你。比錢我丫。」
阿螢面對我突然嘅要求有啲不知所措,佢問我比幾多,我話幾多都得
阿螢拎咗張一百蚊紙比我
我拎完就話:「嗱,比埋錢,埋咗單,我再講多一次,我原諒你。」
阿螢終於破涕為笑
「笑翻咪幾好。」我將一百蚊還翻比阿螢