第二日起身,我梳洗,然後向老豆同阿媽嘅相拜一拜:「我出去喇。」

今日約咗嗰個有毅力嘅記者

我準時去到約定地點,係我屋企樓下一間點心舖
我坐低之後,一個金色短髮嘅女仔走入嚟

「哈哈我好掛住依度啲點心,你住上環真係太好喇!」

女仔坐低



眼大大、包包面、又矮又平胸

「咦?你咪琴日嗰個金琉玹?」

「你⋯⋯你咪阿螢嘅遺書代筆?點解號碼唔同⋯⋯」

女仔笑住摸一摸頭:「嗰個係接客用嘅電話嚟。」佢伸一伸脷

「原來係咁。呀,我都未問你,你叫咩名?」



「我?你叫我miki得架喇。」

我呆咗一呆

米奇⋯⋯

一剎那之間

我嘅心跳有少少加速



係巧合?定係有咩意義呢?個天比我再一次遇見,另一個米奇

「你呢?點叫你呀?」

我回神,答:「你叫我阿⋯⋯唔係。」我本來想答阿金

但唔知點解,另一個稱呼脫口而出

「叫我金仔。」

miki聽完,好似我咁,呆一呆

我地不約而同咁,向對方展現微笑



世間所有相會,都是久別重逢

唔知點解無啦啦個腦彈咗依一句野出嚟

我想⋯⋯約依個女仔

今日嘅我,唔係ptbf,佢亦唔係我嘅客人

「啊⋯⋯訪問完咗之後⋯⋯呃⋯⋯不如⋯⋯」

我竟然口窒窒,一時之間唔知講乜好

呀有喇!

「不如我帶你去食肥姐丫?」


「不如你帶我去食肥姐丫?」

結局一,完