10.


我地決定坐的士去目的地, 當然又係kevin出錢,
真係令我鬆一口氣, 如果無kay扶著我, 我相信我一步都行唔到

雖然我一身晚裝只可以用完美黎形容, 但我打死都唔會再著一次,
綁更既腰部令我呼吸困難, 裙更加唔洗講, 臀部一直都處於空虛既情況
真係好無安全感, 至於高跟鞋, 我估聽日起身雙腳應該會腫到行唔到…



實在好佩服女士們, 果然, 短衫短褲踢拖先係男人既浪漫。
我暗暗發誓, 拎到呢筆錢之後一定要係屋企休息返幾日。

其實計劃就好簡單, 就係同kevin食餐飯, 唔需要做其他野
如果有有朋友黎搵kevin吹水, 只要扮好女朋友個角色求其應兩嘴就得,
其他kevin 會攪掂, 雖然我心入面覺得最大敗筆就係kevin到底識唔識做戲...
至於kay? 就扮係我妹妹一齊食飯....

五十幾蚊既車程, 坐前排既kevin拎左張金牛想找結果比司機怒啤,
我見到阿kay係後面偷笑。



係kay扶完我落車之後, 我望一望間法國餐廳,
感覺就係食一餐就會用左我一年零用錢,
唉, 同人唔同命就係咁。

「Bienvenue.」

門口侍應仲要用類似法文既野開口, 睇黎我真係乜野都唔洗做, 齋食就得
就係呢個時候, 隔離阿kay部iphone響起



「喂喂? 紫詠? 係係…」只見kay面色一沉 「咁妳等我一陣…」收左線

「表姐…」阿kay用一個”好對唔住”既眼神望著我…

唔方好野。

「睇黎…哈..哈哈…呢餐要靠你地兩個。」最後個句細聲到差d聽唔到。

「下下…唔好玩啦…」我用一個”無妳我唔做”既眼神望返住阿kay.

「表姐妳得既, 我真係十萬火急要走啊, 好對唔住!」之後就另轉身急急腳走

喂喂! 無妳我企都企唔穩呀…
隔離既kevin見到情況, 終於紳士返一次, 舉起隻手打算扶我



見到呢個情況, 我而家係天人交戰
扶, 就要面對呢個極尷尬既情況, 兩個男gay到爆
 
扶, 就要面對呢個極尷尬既情況, 兩個男gay到爆既法國餐廳之夜
唔扶, 就一步都行唔到, 分分鐘要企到聽朝。

阿kay, 妳好野, 今次明玩我…

鈴鈴, 電話訊息。

「對唔住丫表姐, 最多三千蚊比妳袋哂啦 ;) 」

我寧願比三千蚊妳返黎好過。
 
….



而家呢個狀態係旁人眼中一定好奇怪

一個英俊男士向一個美麗紫色晚裝女士伸出手, 希望得到回應,
但女士只係好厭惡咁望著男士隻手…

嗚…感覺只要伸手出去, 我人生有樣好重要既野就會消失無存…

「你要接受自己係一個女仔…」夢入面”自己”講既野又再一次係腦入面迴響…

嗚…但唔得就係唔得, 接受唔到就係接受唔到…!

一分鐘, 旁人開始對呢個組合感到好奇, 發出絲絲細語

啊…到底應該點?



「家…蔚...妳唔願…願意唔洗…洗勉強自己。」覺得自己為難左我既 Kevin終於打破僵局

「嗯…」你明白就好, 無阿kay陪住, 同男仔單獨食法國餐我真係接受唔到。

「等…等我叫返的…的士送送妳返去…錢...我會照比妳...」kevin個樣好失落

「你…一個真係無問題?」我試探性咁問

「無…無問題…反…反正我都比佢…佢地笑慣…哈…哈哈…慣左啦…孤…孤獨一個…哈…」勉強擠出黎既笑聲, 我聽得出入面充滿左無奈

我仿佛係佢身上睇到過去既自己…
一個靚仔有錢版既自己...但都係孤獨一個無人理...

唉...



「kev… Kevin!」今次真係豁出去

「係…家…家蔚?」kevin比我突然既大叫嚇親

「我…我決定幫你一次…一次咁大把…」我唔敢直視kevin咁伸出左右手…

「唔…唔該哂!」kevin展現出佢難得一見既笑容

「我…我只係為左個三千蚊咋…唔好諗咁多…」

然後, 我就比一隻溫暖既手捉住, 好溫暖, 好健碩…
我覺得自己又面紅了
 
比kevin拖住, 慢慢走入法國餐廳
而家每一步我都十分專注咁行, 比男人拖已經係極限,
絕對唔可以失足比機會kevin掂到其他部位…

我地一路行都有人係旁邊發左好驚嘆既聲音,
無錯, 無人知呢個可以話係天造地設, 郎才女貌既組合
其實一個係怕羞結巴仔, 一個原本係男仔。

最後侍應生搵左個近舞台池邊既雙人台比我地坐
好熱, 明明成身無乜布我都覺得好熱…到底呢到有無開冷氣?

雖然係咁, 我都唔敢除阿kay幫我嬲住個件外套
呢個係防線之一, 我頂唔順其他男士色迷迷望住我既目光, 包括kevin,

「家…家蔚妳飲唔飲得紅酒?」kevin問

「吓? 紅酒咁高級?」試下無壞喎… 「飲少少可以既…」

「ok…咁…」之後同侍應講一大論聽唔明既法文。

紅酒到左之後, kevin好細心又口疾咁教我飲紅酒既正確方法
發現到紅酒呢樣野真係幾好飲, 最後好唔客氣咁飲左差唔多半枝, 攪到身體越黎越興,
原來自己都唔係幾飲得。

「hey Kevin, 又黎食飯? 今次唔係一條友飲悶酒喎。」一個西裝友好串嘴咁拖住條女係隔離出現

「啊, peter, 向你介紹, 呢位係我女…女朋友家蔚」kevin企起身介紹

Peter一望到我, 擺出一個好完美既O嘴樣, 佢旁邊既女伴即刻踩左佢一下。

「啊! 痛…女…女朋友?」peter好驚訝咁望住我, 再望住kevin. 「我唔信, 你呢個性格點會有女朋友? 咪玩啦, 哈哈…記得你...」

之後peter一輪嘴咁講一堆野, 一路講我就越黎越興, 呢條友真係好黑人憎

「kevin, 過黎…」我望著kevin示意佢過黎

Kevin一行到過黎, 我就企起身, 攬住佢, 然後錫左佢面頰一啖

酒後亂性, 所以各位真係要飲少d, 由其係女仔。