15.


去到老麥, 發現表妹一早已經到左

「表哥! 呢到!」坐係角落既表妹大喊

「喂! 唔好叫表哥叫得咁大聲, 我而家係女仔! 好彩呢到無乜人!」岩岩d職員都有d好奇咁望左我一眼

「啊…係喎…」表妹有d唔好意思咁答



「表妹…我而家咁既情況…妳不知叫我表姐啦…」

「唔得! 妳係我表哥呢個係事實! 我係要叫你表哥! 表哥表哥表哥表哥!」

「好… 好! 妳冷靜d…」我用右手禁住表妹把口阻止佢繼續嘈

「不如咁啦…妳叫返我個名 嘉為, 我估d人都唔會覺得奇怪既…因為我而家女仔名都差唔多音。」

「嗯…唯有係咁。」睇得出表妹都唔係幾鍾意, 但只能接受「咁…嘉…嘉為…你係咪有d野同我講?」



我鼓起勇氣將由出租女友 (!? kay竟然真係有做呢d!)
差d比kevin強暴… (抵你死啊! 做埋呢d野抵你比人姦!)
到去阿kay屋企訓… (!!!! 你地一齊訓!? 真係不知羞恥! 衰人!)

「冷靜…我而家係女仔…乜野都無發生啊!」除左比人錫左啖…真係無野發生…好似係...

「雖然係咁…但你心入面仲係男人! 衰人! 唔好再叫我啦!」表妹雙手抱胸, 將身體另埋一邊, 好嬲咁講

「最重要一件事…我大概知道點解我會變左做女人…」



「車! 肯定係因為你朝思夢想都係女人身體上面! 而家天成全你啦! 變態! 淫棍!」

「唔係…係一件好認真既原因…」

「咁係咩呢? 係咪同所有識既女仔玩返晚? 變態表哥!」唔記得叫我本名既表妹嗤之以鼻

「我前世係一個女人, 因為愛人去打仗失左蹤, 失去左一段本應好美滿既戀情…
而家前世既”我” 希望我搵返呢個男人…或者呢個男人既後世…再去完返呢段感情…」

表妹一聽完我講, 放低手另返身過黎, 好驚訝咁望著我…

「咁…咁即係…表哥你…要以呢個身份同一個未知既男人拍拖…結婚…生…生生生仔?」

「無! 無咁長遠! 咁樣我自己都接受唔到! 我始終…」我有d猶豫「我始終想做返男仔…」



表妹露出一面 “太好啦” 既表情

「你咁諗好岩, 我一定會幫你嫁! 嘉…嘉為表哥!」

「嗯…我地一齊努力…」講完,乜壓力都無哂…而家好想訓…

「咁我返屋企先啦, 真係好眼訓…」

「好, 我同你一齊返去, 嘉為你訓一陣, 然後…」表妹好開心咁講
「我地夜d一齊出去shopping! 你而家話哂都係女仔, 一定要好好保養皮膚!」

「好, 就咁話…」

然後我地就離開老麥一齊返去我屋企。


 
 
返到屋企,表妹好熟手咁係書櫃拎起幾本漫畫,坐左係梳化到睇
對佢黎講,呢到根本就係第二個屋企。
 
「表哥,你去訓啦,唔洗理我架啦。」
 
表妹都係決定無外人個陣叫返我做表哥,話貪佢夠順口
都好既,比佢叫左表哥十幾年,而家叫我做嘉為始終有d奇怪。
 
唔知係咪女人身體既關係,雖然對上個餐就係迷你到爆既法國餐,但我竟然完全唔覺得餓。
我唔理三七廿一就返入自己房訓,果然自己張床自在好多,唔洗顧忌咁多野,
我好快就進入左夢鄉。
 
夢入面,我又見到前世既”我”…


 
「嗚…子朗,你講過你會返黎,已經兩年啦,你到底係邊…」前世既”我” 拎住一張已經稍微褐色既照片,哭倒係約定既楊樹下。
 
「小姐,妳要學識放棄呢段感情,公…公子已經唔會再返黎嫁啦!」旁邊既侍女同 ”我” 講
 
「唔得! 無論生定死,只要一日未見到子郎,我都會一直等,一直等落去!」
 
一直等落去,就係呢個執念,
所以就算到後世,妳都要決定等落去…
值得咩?
 
「值得。」樹下既 ”我” 向住我講「而且,我相信我就快會等到。」
 
就快,就快…?
 


我張開雙眼,發現自己竟然有d眼濕濕,我喊過黎?
然後,我發現表妹坐左係床邊,我隔離。
從我左手既觸感黎講,我覺得表妹岩岩有捉緊我隻左手…
 
「表…表哥,你醒啦?」表妹緊張咁問
 
「嗯…好好訓,點解妳會坐係到既?」
 
「吓!?我…我…嘿! 更係想襯你訓個陣畫花你塊臉! 鬼叫你琴日咁衰格!」表妹扮嬲咁講「但我見到你而家個樣,點畫得落手喎!」
 
「哈哈…咁就真係遺憾啦…」
 
「表哥我諗過啦。」表妹一面認真咁望住我
 
「諗過乜…?」
 
「你講過前世希望你再續前緣,咁如果你一直都撞唔到個個男人,佢終有一日都會放棄架啦…」
 
前世既我真係會放棄?從夢入面既啟示,我深感懷疑…
 
「嗯…或者啦…」我唔想表妹失望所以咁答,或多或少我自己都希望會係咁。
 
「所以呢,我就做你既守護天使!」表妹又展現佢既招牌笑容「順便成全你,呢個暑假只會帶你去識女仔!咁就唔怕會遇到男人啦!」
 
「咁益我?」
 
「無錯!無理由要你全天候宅係屋企唔見人架嘛!雖然呢個係你本來既性格…」表妹有d無奈咁講「我要順便係呢個暑假幫你改埋呢個惡習佢!所以而家…」
 
「你快d去換衫,我要用你琴日賺既錢瘋狂買野!就當係你講大話既代價啦!」
 
「好…好…我而家去換啦…」
 
橫蠻得黎帶d可愛,呢個就係我既表妹。
 
「咪住!」表妹突然朦起雙眼「都係等我幫你換,費時你又對自己身體做埋d變態行為!」
 
「我…我邊會喎!」我忽然醒起琴晚係阿kay床上面既事...
 
「表哥你…你面紅!即係你真係有做過啦!死變態!」
 
「無啊…啊…啊…」咁就硬食左表妹幾拳,好彩佢知道我而家係女人身,故意留力…
 
由我男變做女到而家,真係發生左好多心血小都支持唔到落去既事
我好慶幸,仲可以有咁輕鬆舒服既時光。
 
表妹用手巾仔矇住我雙眼,幫我換左件T-shirt (表哥你既品味真係好差…唉。)
拎左件原本唔多岩碼,而家反而fit到既牛仔褲幫我著
再幫我笠返件外套 (著得保守d就唔驚吸引男仔啦)
 
望住塊鏡,我而家既殺人指數真係低左唔少,除左…
 
「呃…點解表哥你個胸要咁大喎!呢樣野真係點遮都遮唔到!」表妹好唔憤氣咁望住我個胸, 再望一望自己個個…
 
「表…表妹…唔好諗咁多啦,快d出去啦…我…我有d肚餓啦。」見到表妹好似就黎喊咁,我試下轉移話題
 
「嗯,我都有少少餓,你請喎!」
 
就係咁,我同表妹求其係樓下一間茶記充飢 (兩位靚女,想食乜?)
食完就坐地鐵去旺角,途中聽唔少「呢兩個女仔好靚好可愛啊」「你睇,佢個胸大到就黎趺出黎啦。」「唔知佢地肯收幾多錢Q呢」聽到我打哂冷震,
表妹既計劃完全係失敗左。
 
出左地鐵站,我見到旁邊既表妹已經激到塊臉紅哂。
 
「可…可惡!」表妹激到咬牙恨齒,已經到左臨界點。「既然係咁,我要幫嘉為你著到又性感又靚!越少布越好!」之後企圖拉我入去一間性感內衣店。
 
「表表表妹!妳要冷靜啊…」表妹呢個行徑真係嚇我一跳「妳咁樣同當初打算做既野完全係背道而馳!」
 
「嗚…嗚…可惡!」
 
表妹最終放棄左佢既行動,係旁人「呢兩個女仔真係人細鬼大,竟然打算去買性感內衣!嘿嘿!」既細語下,帶我行入隔離個間化妝品店。
 
「嘉…嘉為,雖然你皮膚真係好好。」表妹同我講
 
無錯,唔知係咪變左女仔只係好短既時間,我皮膚真係同岩岩出世既BB一樣,又白又滑。
 
「但如果你用返你男仔既心態去對待你既皮膚!遲早會殘到老太婆咁!」
 
「咁咪幾好…咁D男仔就唔會見到我就搖哂尾…」表妹唔講我都唔知有呢招。
 
「唔得啊!我…我…我接受唔到。」表妹細細聲咁講。
 
「點解接受唔到?」
 
「吓!?點…點解…嗯!你呢個暑假成日要同我一齊,你殘哂咪會影衰我…」
 
我真係唔明女仔既心態係乜…
係表妹一路忘我地介紹唔同化妝品有乜用既時候 (我完全聽唔明)
我又收到短訊,係阿kay
 
(表姐妳係邊啊?)
 
(旺角。)
 
(咁岩既!我又係喎!王樂宜係妳隔離?)
 
(嗯。)
 
然後我旁邊表妹既電話就響起。