32.


落到船,我地九人求其係一間餐廳食左野之後,
因為夜晚會係度假屋隔離bbq,所以我地就去超市到買野
而度假屋距離都幾遠既關係,買完野我地就係旁邊既單車鋪租單車。
 
同男仔個陣踩車又唔同,
因為長髮既關係,有時轉彎都會幾麻煩,
單車坐椅既形狀因為頂到某D部位,令到我坐得非常唔舒服,


 
而且,因為女仔身體同毒撚平時唔做運動既雙重影響下,
踩到一半我已經攰到爆。
 
最後冰瑤提議幾個男仔袋多幾袋野走先,
我,表妹,冰瑤,紫晴四個就係中途停係到,望下風景休息陣。
 
我見紫晴其實都好攰 (但無我咁嚴重)
反而表妹同冰瑤就無乜野,果然平時係去慣呢D活動既人…
 


『嘉為你好失敗。』表妹對住喘哂氣既我講
 
「嗄…邊…嗄…有妳咁勁喎。」
 
『樂宜。』冰瑤講『我見隔離有間士多,不如買枝野飲比家姐?』
 
『下?買比佢?』表妹講,一面「點解喎」既表情
 
『嗯,順便買埋比紫晴,佢地兩個留係到抖下,紫晴妳要飲乜?』
 


『啊…』我估紫晴估唔到冰瑤會同佢講野『水…水唔該。』
 
『行啦樂宜我地...』冰瑤強行拉住表妹行,淨返我同紫晴兩個。
 
估唔到時機咁快就出現,冰瑤妳真係好撚野。
 
 
 
 
就係咁,而家就得返我同紫晴…兩個。
紫晴今日著住淡黃色連身裙,而家佢dup低頭望住地下
由於太突然,我都唔知而家可以做乜好
 
我諗起冰瑤船上面講既野…憑感覺…
 


「紫晴…」
 
紫晴無回答,只係緩緩抬起頭望住我。
 
「我…」憑感覺啊陳嘉為…「今日天氣幾好。」
 

 
『嗯…』紫晴簡單咁應一應
 

 
好尷尬。
 
結果我地之後都無講過任何野,直到表妹冰瑤佢地返黎。


 
『紫晴…水』表妹將枝礦泉水遞比紫晴
 
『唔該哂。』紫晴回應
 
之後表妹將一包野飲遞比我,木瓜奶,表妹自己都飲更。
 
「表妹…妳之前唔係好憎飲呢d野架咩?話陣味怪。」
 
『之前還之前…』表妹望一望我…個胸『而家還而家。』
 
原來係咁。
 
休息左陣,飲埋野終於回返啖氣,我地四個就繼續出發
最後踩多陣終於到左。


 
度假屋係沙灘附近,所以出沙灘玩其實好方便,但離買野既地方就相對較遠。
屋有一個大廳,有梳化同電視,兩間房每間都有兩張中型SIZE既床
 
我地放低野之後,表妹同冰瑤就拉埋我入其中一間房。
 
『岩岩傾成點?』冰瑤問
 
「無…」
 
『下?』表妹好驚訝咁望住我
 
「乜都無…」
 
….


 
『表哥妳真係好失敗。』停頓左30秒之後表妹終於講
 
夠啦喎表妹,我認我係毒撚,我係失敗者!
 
『睇黎實在太心急,應該要慢慢黎…』紫晴講『總之紫晴有注意到妳存在就得,仲有大把機會。』
 
注意到我存在…妳咁講其實都hurt到我囉。
 
 
 
『咁之後有乜野攪?樂宜』冰瑤問
 
『啊…無…休息同玩一陣,之後就要準備今晚bbq既野啦。』
 
『咁一於打牌啦!』冰瑤提議
 
「打牌?打乜牌」
 
『更係麻雀啦!』表妹用一個理所當然既樣望住我
 
『打牌呢樣野係可以最睇清楚人既性格同搵資料。』冰瑤表示
 
「我…唔識打。」
 
『『唔係掛』』表妹同冰瑤同時講
 
一個毒撚點會玩埋呢d現實充既遊戲?
 
『咁無法,嘉為你睇住我打啦。』表妹講『等我教你。』
 
結果出到去表妹同冰瑤搵另外兩個個兩隻腳…子朗同紫晴,點知…
 
『我…』紫晴面紅『唔識打。』
 
…結果最後就係子朗,表妹,冰瑤,臨記四個人打
我坐係表妹隔離,紫晴坐係沙發到睇電視,痴情情侶同邦彥就唔知去左邊。
 
睇表妹打左幾鋪 (雖然我真係唔識玩,但都睇得出表妹其實打得麻麻。)
冰瑤果然係高手,竟然可以邊吹水邊打仲連嬴左幾場。
 
雖然係吹埋一d好無聊既野,我好好奇咁樣到底冰瑤可以問到d乜。
由於我係坐係子朗對面,所以有幾次我地都有望到對方,
而且因為冰瑤講野都幾好笑既關係,每次見到子朗笑我都會一齊笑埋。
 
我覺得個種食春藥既感覺又就快出現,唔係咁對路應該閃一閃
 
「表妹…我都係唔睇啦…我過去個邊坐。」
 
『好…你過去…啊…妳又碰!係咪丫!』表妹輸左幾鋪,已經無閑理我
 
之後我去左梳化個邊坐,雖然坐係紫晴隔離,但我地依然係無講野。
過多陣,阿kay就到左。
 
『啊…唔好意思丫…我迷路…』阿kay喘哂氣咁講
 
『下!?』表妹係麻雀台個度大叫『呢間屋妳簡嫁喎,你竟然迷路…』
 
『哈哈…王樂宜妳不嬲知我係路痴黎嫁啦,咦你地打更牌,我要打我要打。』
 
子朗好紳士咁讓個位出黎,但係表妹…
 
『唔打啦,呢個時間要準備bbq既野食啦。』表妹講
 
原來個天已經暗暗地,到底阿kay妳係迷到幾遠路?
 
『車!衰人王樂宜妳故意既!』阿kay即刻抱怨
 
『遲到既人要負責洗野!』表妹講『男仔就負責起爐啦。』
 
『耶~~~~我好攰啊!』阿kay好不滿咁叫。
 
「等我幫手啦…表妹妳就比阿kay休息一陣…」
 
『嘉為你…哼咁好啦。』
 
『表姐妳真係好人,我最愛妳啊!』阿kay感激咁講
 
然後,夜晚既bbq就準備開始。