36.


『我唔係到個陣,竟然發生左咁既事?』冰瑤問
 
「嗯…」
 
而家係零晨一點,兩對情侶唔知走左去邊,
表妹,阿kay,臨記,邦彥係到打更牌,
而我同冰瑤兩個坐係一間房既床上面,我將岩岩玩遊戲件事講比冰瑤知


 
『如果真係嘴左就好。』冰瑤講
 
「妳都係咁諗?」
 
『嗯,呢個真係難得既好機會,可惜…』
 
「可惜佢地最後都自己嘴返,我估紫晴始終唔想係伴侶面前比第二個人錫…」
 
『或者啦…但係成件事真係好可疑。』


 
「邊到可疑?」
 
冰瑤眉頭一皺『呢件事一定唔係咁單純…』
 
然後門就打開左,係表妹,阿kay,同紫晴。
 
『班男仔話要打winning』阿kay有d不滿咁講,臨記帶左佢部ps3黎
『嘻嘻!我地黎girl talk囉!』
 


Girl talk,我記憶中應該係一大班女仔係房入面講男仔,講八卦野既活動…
睇黎應該唔岩我…等我又出去踢winning先
 
「咁我出去先…」我正打算企係身,即刻比冰瑤捉住
 
冰瑤用「妳而家都係女仔」既眼神望住我。
 
咦?係喎…
等我仲想出去表演下我足足苦練左幾個月既winning技術…
 
結果我地五個女仔(正確d係四女一男),就圍埋坐係一張床上面…
嗚哇,呢個畫面真係心血少都支持唔到…我又開始有d緊張。
 
『唔…講乜好呢?』表妹問
 


『呢個時候更係講仔嫁啦!一個一個慢慢問!嘿嘿…』阿kay笑笑口咁答
 
…呢種咁微妙既氣氛真係好唔慣。
 
『家瑤,妳同表姐兩組妹一樣咁靚,肯定有唔少人追啦…』阿kay問
 
『我…』冰瑤有d面紅『我已經有仔啦。』
 
『耶!已經有仔?』阿kay好驚訝
 
『嗯…岩岩拍拖無耐…』冰瑤答
 
『真係好…靚唔靚仔,有無相睇下?』阿kay問
 
『嗯…等我一陣…』之後冰瑤拎起手機,應該係想搵相


 
我心入面覺得有d唔對路,
冰瑤條仔…Kevin,阿kay…出租女友…kevin…
 
阿kay識得kevin,仲撞破過佢既好事。
 
弊家伙。
 
如果比阿KAY見到相入面既kevin,
肯定會即刻爆大獲,到時會發生乜事我真係唔知道…
 
我嘗試扮幾個「唔好啊」既口型比冰瑤睇,
冰瑤雖然望到,但一面不解咁望住我。
 
平時聰明個冰瑤去左邊?唔好比kevin相阿kay睇啊!


 
『嘉為,你口抽根?』表妹見到我奇怪行徑之後問
 
「無…無野…」我頂。
 
『嗯…搵到啦…阿kay』之後冰瑤將個電話遞比阿kay
 
我無眼睇啦,
世界大戰提早開始。
 
『哇…家瑤妳條仔好掂啊!』阿kay發出驚嘆既語氣
 
『係幾唔錯嫁。』冰瑤回應
 
咦?


 
『表姐妳望下,不過我估妳應該見過啦…話哂兩姐妹喎…』
 
我接過阿kay手上面既電話,螢幕個個…邊個黎?
唔係kevin,係一個無見過既男仔。
 
「…哦…佢丫嘛...講野幾好笑嫁…好似叫…」
 
『阿ken…』冰瑤幫我講
 
「嗯…阿ken。」
 
睇黎冰瑤已經知道左個日發生既事...係kevin口中...果然係聰明既女班長...
 
『真係好掂呀…點解我地班入面無一個男仔可以咁正?』阿kay嘆住氣咁講
 
『唔係丫…其實邦彥都唔錯。』表妹應
 
『佢個樣係幾好,不過太大男人啦!又無情趣,濟係識掛住聽歌聽歌!』阿kay講
 
『嗯…咁又係…』
 
『王樂宜妳對人有意思?嘿嘿,咁臨記點算?』阿kay笑得好奸咁講
 
『吓?又關臨記乜野事?』表妹睜大眼望住阿kay
 
『臨記佢溝妳溝到出哂面啦…』
 
『我對佢無意思…完全。』表妹即刻講
 
表妹當然對臨記無意思…因為佢鍾意個個係…
 
『咁妳鍾意邊個!從實招來!』阿kay步步進迫
 
『我…佢…』表妹面又開始紅,曾經有一刻佢望一望我『妳地唔識!』
 
『好,我遲早會知道係邊個黎!咁點解妳會鍾意個個人呢?我地好想知啊!』阿kay問…
 
『得…得阿kay妳想知之嘛!』表妹即刻反擊
 
係囉,其實我都唔知道點解表妹會鍾意我…
我到底有乜好?只係一個無人注意既小毒撚…
 
「我…我都想知…」我衝口而出
 
『嘉為你…!』表妹難以置信咁望我
 
深夜既girl talk,進行得如火如荼…
 
表妹仲用更一個「衰人出賣我」既眼神望住我。
 
但我真係好想知道點解…
 
『講啦…王樂宜!』阿kay繼續迫問
 
『佢…好溫柔…仲好識照顧人…』
 
『好多男仔都識照顧人嫁啦!』阿kay講『我要重點d既!
 
『下…重點?…總之就係我發生左乜野事…佢無論點都會搵幫我啦…』
 
『例如呢?』
 
『有一次…我病到好重…但又唔肯食藥…佢為左氹我食…
專登務住雨走幾條街買我最鍾意食既雞蛋仔比我…』
 
哦個次…估唔到表妹仲記得…已經五年前既事…
 
『有一次…陸運會…因為我屋企人唔得閒…所以搵左佢幫手...
即使佢個日要測驗唔得閒,但佢都有出現…』表妹講
 
『耶!?原來黎過陸運會,點解我無印象既?』阿kay講
 
『因為妳係啦啦隊,要準備所以無留意。』表妹輕輕帶過
 
『我好似…見過呢個人。』紫晴突然開聲講野
 
咦?紫晴妳竟然仲記得…
 
『咦紫晴妳見過?個個男仔點嫁點嫁?』阿kay非常好奇咁問
 
『我…唔係好清楚…普普通通咁…唔算靚仔…』
 
普普通通…唔算靚仔…雖然係事實…但係別人口中聽到真係幾hurt…
 
『雖!雖然佢係唔靚仔!但佢心地真係好好嫁!』表妹爆發
 
表妹…
 
『好!到下一個…紫晴!』阿kay另轉頭望住紫晴『點解妳同子朗咁失敗嫁!』
 
『我…』紫晴有d怕羞『只係未慣…』
 
『嘴都算啦!我真係拖手都無見你地做過,
雖然係別人眼中你地真係好有夫妻相,但事實你地根本好似無點交流咁既!』
 
『夠啦阿kay,唔好咁話紫晴啦…』表妹係隔離講
 
『唔好意思…我激動左…我只係作為姐妹登你地可惜…』阿kay講
『而家唔留下d回憶…到大個就會後悔嫁啦…』
 
『我…嗯…妳岩…』紫晴細細聲回應
 
『好…到下一個…嘿嘿,表姐…妳呢?』阿kay望住我
 
「下?我…」
 
『表姐有無心儀對象?』
 
我…心儀對象?