38.


去到沙灘,見到只係露出得返個頭既子朗,
阿kay佢地係隔離係咁爆笑同影相,
其實個畫面真係意外地好笑,但我同紫晴都各持理由所以盡量忍笑。

好彩既係,由於罰一半既關係,所以只係埋一陣笑下影下相就算,
係扑西瓜遊戲之前就會放返佢出黎。



唔係既話,如果咁岩要我扑,又比阿kay誤導扑到子朗既話,諗起都覺得驚。

『哇…紫晴…哇…對貓耳好岩妳呀…一陣一定要同妳影返一本寫真!』
阿kay一見到戴住貓耳既紫晴,即刻興奮大叫

『真係好正丫…我一陣又要影…』表妹講

『嗯嗯!』臨記好誇張咁點頭

『你地可以去食野先喎,隔離有間餐廳。』坐係沙蓆上面既冰瑤建議



「哦…咁我地行囉,紫晴…」

『嗯…』

同紫晴兩個人食午餐,製造獨處時機,
我開始覺得起身只係得返我同紫晴兩個,係冰瑤暗中努力過既成果黎。
 
海邊餐廳,絕對唔係乜野藍屋白瓦,掛住個冰字牌
說穿只係一間普通既茶餐廳,


而且食物總類真係極其少,連豆腐火腩飯都無,真係攪撚錯。

最後都係求其叫左個常餐A算,紫晴都係同我一樣。

『飲乜?』侍應問

「「咖啡多奶少甜。」」我同紫晴同時應,之後都有d驚訝咁望住對方

『哦,兩杯咖啡多奶少甜。』侍應重覆一次之後就走左去

「估唔到我地飲野既喜好都幾似喎…」

『嗯…因為我怕甜。』

怕甜…我記得有個人都咁同我講過,但又硬係醒唔起…



雖然我地兩個人相處已經無一開始咁尷尬,但又慢慢開始沉默起黎…
再唔搵d野講就會好似之前踩車咁…

「紫晴…妳記唔記得妳黎搵我個晚…」

『下…?』紫晴個樣充滿疑惑

「妳話可能認錯人…但會唔會其實妳真係見過我?」

『我…我唔知…』紫晴dup低頭『我之後都有諗過…但係無…諗唔到…』

「我都有極力去回想返…但同妳一樣…諗唔到。」

『嗯…真係奇怪…或者呢種就係人地所講既Déjà vu…』



「嗯…咁…」

『常餐a兩個!』

當我嘗試繼續問,常餐就到,所以我地就開始食,之後都無講過件事…

返返去沙灘,紫晴比阿kay同表妹捉左去影相 (紫晴感覺有d抗拒)
子朗已經比人救返出黎,同其他人去左游水。

而我就同冰瑤坐係沙蓆上面。

『睇黎進展唔錯喎。』冰瑤講

「嗯…或者啦…妳琴晚成晚去左邊?」



『去左搵kevin。』

「吓?去左成晚?」

『嗯…佢附近都有間屬於佢自己既度假屋,所以我就…』

果然係有錢仔。

「咁子朗個一拳有無野?」我諗起子朗為左解救我打kevin個一拳

『更係無,kevin仲係到笑話個一拳真係蚊之都打唔死,雖然佢塊面紅左。』
冰瑤暗暗偷笑『不過係抵佢死嫁啦!』

抵佢死…



「諗返琴日妳比阿kay睇個張相…妳應該知道左我同kevin件事啦…」

『嗯,kevin同我解釋左,所以我先叫佢係我面前重演返個日既劇情一次。』

之後就比子朗打。
眼前呢個女人其實係另一種層次既恐怖…
女人果然係好可怕,無論係蠢既女人,定係聰明既女人...

如果我一直都係女人,會唔會都變得咁可怕呢?
睇怕都唔會…以我既性格一定係成日比人昆…成日比人玩…

諗起做女人可能會比人昆比錢更重要既野,就覺得做男人其實都唔錯。
 
 
『影相囉。』阿kay終於返黎,拉住紫晴,表妹係後面跟住

「點影?」我以為阿kay係想要我幫佢地影

『更係一齊影!我地六個靚女一齊!嘻嘻!』

我望一望紫晴,唔知佢係比人除定係自己除
岩岩著住既淡綠色連身裙而家係表妹手上面,
露出都係淺綠色既比堅尼,展現只係比我略細一點既胸部…

至於表妹同阿kay,就同上次沙灘日一樣。

而我隔離既冰瑤…

係我面前除左件背心,佢身上面同我一樣都係白色既比堅尼,而且都好少布。

『喂,唔好咁望實我…有d嘔心啦…』冰瑤用阿kay佢地聽唔既細聲同我講

「啊…唔好意思。」

等埋痴情女,由痴情男拎機,開始影我地六個女仔既合照。

大家一定好好奇我地六個人既胸部大細,以本人既目測所得
我 > 紫晴 > 冰瑤 = 痴情女 > 阿kay >>>>> 表妹。
大約係咁。

表妹真係遺憾既存在。

我地試左好多唔同既角度,連跳起浮空個d時下流行動作都玩左 (嘉為妳個度彈夠啦喎!)
旁邊都有d陌生男仔係到圍觀,我心想佢地眼中望到既畫面一定係好耀眼。

我地影完之後臨記邦彥痴情男都走埋黎要影 (子朗就唔知去左邊,我有d失望)
結果影影下都足足影左成粒鐘有多。

『嘻嘻,等我聽日放上facebook先…』影完之後,阿kay好開心咁講『係喎表姐妳有無facebook?』

「我…無…我唔係好識用電腦…哈哈」我扮傻

正確d講我其實係有,毒撚個陣係開過facebook,
而家既朋友應該有30個左右,其中有4,5個係親戚。

咁算成功定失敗?老實講我唔清楚,所以我都係扮無好d...

『咁點得嫁!表姐!』阿kay好驚訝咁望住我『facebook係用黎收fans嫁嘛!』

「Fans?下?」

『表姐…妳太唔識善用妳既本錢啦。』阿kay嘆氣咁講

之後佢地又出左去游水,得返我同紫晴兩個係到。(因為紫晴唔識游水)

『家蔚…我地不如…影返張合照…』紫晴怕怕羞羞咁講,拎起部手機

「好…」而家諗返起,其實我岩岩都無同紫晴影過合照

之後紫晴將身體靠近…我地痴得好埋…
我斜斜地身,紫晴又斜斜地身…我右胸掂到紫晴既左胸…

『我影啦…三…二…一…』

*