39.


回想返岩岩個情況,真係差d抖唔到氣。
子朗終於游完水,岩岩黎搵紫晴,之後佢地兩個唔知去左邊…

結果又得返我一個係到曬太陽,希望今次唔好再有毒撚黎煩我。

可能因為岩岩食常餐又飲完野既關係,曬曬下想去洗手間...
所以我叫係附近既邦彥 (佢忘我地聽更歌) 返黎睇野,咁我就可以去一去洗手間。



行去洗手間既途中,我見到遠處兩個熟識既身影,子朗同紫晴…
係到爭吵更…

係到嘈更乜呢?我好好奇…

好奇心能殺死貓…結果我就延遲去洗手間…走過去偷聽…
 
我偷偷躲係一個矮牆後面,
岩岩聽到佢地講野既距離…



睇情況已經嘈左好耐…而家已經係收尾部份…

『游完水之後…我成個人清醒左好多…諗返起成件事由一開始就好錯』

『唔好意思…』紫晴哭道『真係唔好意思…』

『所以…我已經唔想再咁落去…』子朗講

『…嗯』紫晴回應



成件事…唔想再咁落去...唔通…?

『我一陣會同佢地講我走先…就話屋企人急搵我…』

『好…』

呢個情況…唔通係分手?

唔係掛?點解會咁…會唔會係因為我…?

『咁我走先…拜拜…』子朗講

『嗯…』



之後子朗就走左,留低紫晴一個企係到喊…

諗返佢地分手都唔係無伏線,子朗無同紫晴訓而自己訓梳化
今日見到紫晴戴貓耳又無乜反應,合照又無一齊合照…唉。

琴日既嘴對嘴事件果然影響好大,
令到一對本黎就快崩潰既關係終於完結…

我係咪應該出去…扮路過之後安慰下紫晴…
如無意外佢地真係分左手,估唔到我意外撞破左呢件事…
一個女仔呢個時候一定好需要人安慰…

「紫…紫晴?」我扮岩岩路過

『啊…家蔚…』紫晴好明顯係到強忍淚水



「點解妳係到既…?妳…喊更?」

『無…』紫晴索一索鼻水『只係吹沙入眼…』

「真係…?」

『家蔚…我…我有d唔舒服…想返一返度假屋…可唔可以同我去?』紫晴問

嗯…我估紫晴已經無心情再留係呢到…

「嗯…行囉。」

之後我地行返去沙灘同邦彥講我地返去先 (表妹佢地仲係玩更水)
然後就同紫晴返去度假屋…


 
老實講話就話要安慰紫晴,
但老實講點做我真係唔清楚…
如果冰瑤係到就好,肯定可以好好安慰紫晴...
 
結果行左全程我都諗唔到一個實質計劃,
返到去度假屋,已經見唔到子朗既背包,睇黎佢已經走左…
 
嗯…無論點都好…首先一定唔可以係紫晴面前再提子朗既事…
 
「啊,唔知今晚係食乜呢?」
 
『阿kay話佢會表演廚藝…』
 
老實講,我好懷疑阿kay既廚藝…


 
「哈…阿kay得唔得架…煮十個人都好辛苦喎…」
 
『九個。』
 
咦?
 
「吓?唔係十個咩」
 
『九個…子朗…話屋企人急事要返去先…』
 
我頂,一時間醒唔起…
始終都係走唔甩子朗既話題,好地地提乜野野食…
 
既然係咁,就轉移做法…醫治佢心入面既傷口…
 
「紫晴…妳同子朗…係咪發生左d事…」
 
『嗯…都係我錯…所以先會攪到而家咁…』
 
「唔係!」我好激動咁講「錯一定唔在妳到…一定唔係!」
 
『好多謝妳會咁講』紫晴搖搖頭『但妳唔明。』
 
我明…夜晚告白事件…嘴對嘴事件…估唔到子朗係咁易受到動搖既人…
 
「我明!紫晴妳係好女仔…所以錯一定唔係妳到…妳唔好將所有野都攬係身…」
 
紫晴有d驚訝咁望住我…
 
「只係子朗唔識珍惜…所以先決定分手…子朗佢實在…」
 
點解我會咁激動?因為我心靈另一半所愛慕既人令我失望…定係其他原因…?
 
『件事唔係咁。』紫晴望住我講
 
「下?」
 
『從一開始件事就唔係咁…』紫晴再重覆一次
 
「咁…到底…?」
 
『從好早既一開始…我就因為面子…講左個大話…』
 
「講左個…大話…?」
 
『我同子朗…無分手...應該係講...唔會有分手呢回事...因為根本無開始過...亦都無可能會開始...』
 
「吓?」
 
『因為...我同子朗...』紫晴吸一吸啖氣
 
 
 
『係兩姐弟。』