40.


我覺得個腦突然停頓左。
 
兩姐弟?
 
「妳…講笑咋話…?」
 
今日唔係愚人節喎…


 
『妳覺得,呢個時候我會講笑…?』紫晴好認真咁望住我,然後繼續講
『我同子朗,係親姐弟,而且係同年同月同日既孖生姐弟…』
 
「你地比人話有夫妻相,就係因為你地係孖生?」
 
『嗯…雖然係孖生,但我地由中學開始之後個樣都開始唔同…所以…』
 
「所以…」
 


『幾個月前…就因為班入面一個好白痴既理由…為左一啖口氣…』
 
紫晴…妳到底係到講更乜…我個腦真係轉唔到…
 
『我就聽左一個人既建議…叫我細佬扮我既男朋友…』
 
「下?扮妳男朋友…?」
 
『我細佬…子朗…聽完我個要求之後,雖然都有少少抗拒,但都決定幫我…』
 


…都似子朗既風格
 
『本來只係想扮一陣…真係扮一陣!就係個班人面前表現成情侶咁…
但大話越滾越大…唔知幾時開始…已經返唔到轉頭…』
 
「所…所以你地先好介意嘴對嘴…又無情侶既款…」
 
『嗯…』
 
估唔到,成件事係咁…
子…紫…(同音) 晴…晴朗…紫晴…子朗…
 
點解我一早諗唔到?
 
『但琴日發生既事,子朗終於頂唔住…所以…』紫晴又開始想喊


 
「咁…咁…」我已經唔知可以講乜好
 
『家蔚…妳係咪覺得我好傻?』
 
老實講,我覺得為左一啖氣而攪咁多野真係有點兒那個…但係…
而家重點係要安慰紫晴…
 
「唔會…」
 
『真係?』紫晴再問
 
「真係…」我覺得佢再問我就會猶豫…
 
『咁就好。』紫晴終於開心返『而且…或者而家咁都好啊…』


 
「點解…?」
 
『因為…』紫晴難得俏皮地單一單眼『呢個謊話一直係到…又點開始新既關係喎?』
 
過多一陣,阿kay佢地就返黎。
然後就開始準備晚餐,因為冰瑤表妹佢地都要幫手既關係
所以我地都未有機會去傾返岩岩件事…
 
但老實講係咪應該將假扮情侶呢件事講比冰瑤佢地知?
會唔會紫晴其實唔希望我將件事話比人聽呢…
 
但令我意外係,同我講完件事之後紫晴明顯個人開朗左…
 
『阿kay!妳咪一路整一路偷食呀!』


 
『我試味,試味咋!』
 
『哈哈...』
 
廚房傳黎少女煮食既歡樂聲音,然後冰瑤係廚房行左出黎,拉左我入房。
 
『妳有無野要同我講?』冰瑤問
 
「我…無…」
 
『講大話。』
 
「始終係昆妳唔到…但我諗更…應唔應該講…」
 


『妳而家既態度令我諗起一個人。』
 
「邊…個?」
 
『妳表妹。』
 
「下?」
 
我回想返之前既畫面…
係café洗手間…表妹同我講子朗紫晴拍拖個陣…神情有d奇怪…
咖啡店…冰瑤都覺得表妹覺有d古怪…之後當我追問…表妹都明顯係有野瞞住我…
 
唔通…
表妹一早已經知道呢件事?
 
『算…唔講出黎就一定有妳原因,我唔會再多問…』冰瑤講
 
之後我地出返去食野,食阿kay大廚所煮既意大利粉同炒飯
估唔到阿kay煮野真係意外地好味。
 
『係咪好掂呢…嘻嘻』阿kay笑笑口咁問
 
「真係好食…我完全估唔到…」我真係好驚訝,估唔到小惡魔煮野食咁叻
 
『做女仔最緊要就係識煮野食!唔似某d人呢…』阿kay斜眼望住表妹…
 
『好啦喎!鄭青琪!』表妹即刻抱怨
 
『嘿嘿,妳睇下妳!炒碟菜都炒成咁!』阿kay邊笑邊指住碟菜…正確d係焦菜
 
『係妳係隔離係咁煩我先攪成咁之嘛!而且又要防住妳偷食!』表妹面紅咁講
 
『我明既我既明。』
 
亦係咁既歡樂氣氛下,食完第二日宿營既晚餐。
 
食完飯,洗完碗碟之後,
臨記同邦彥又係到打ps3,痴情男女又走左去唔知邊到…(真係恩愛)
 
紫晴叫我,表妹,阿kay,冰瑤入房,有d野想同我地講…
 
唔通…紫晴想...
 
『我…我想同妳地講返子朗件事…』紫晴有d緊張咁講
 
我望一望隔離表妹,佢都露出緊張既神情
 
『好對唔住!』紫晴大喊
 
『下?做乜講對唔住?紫晴?』阿kay好驚訝咁問
 
『我同子朗根本就唔係情侶…昆左妳地咁耐…』
 
之後紫晴就將今日同我講件事再講一次比我地四個人知…
 
『我明嫁啦…唔洗再對唔住…但下次真係唔好啦!紫晴!』
阿kay聽完紫晴解釋之後,並無嬲到,反而係有d同情咁講
 
『嗯…無…無錯…』表妹只係簡單咁回應
 
冰瑤並無講到野,反而似係到思考更…
 
*