42.


我訓係張床上面思考更,
而家係我面前,立起左三條flag
 
1.     選擇紫晴,
然後…無人知之後會發生乜事,
我又諗起男版紫晴,即刻打左個冷震。
 


2.     選擇表妹,
冰瑤建議既路線,或者換個心態會接受到不一樣既關係…
然後刷出一段更加轟烈既愛情...之後變返男仔 (完美mode)
 
3.     乜都唔做,
呢個根據我多年玩galgame既經驗,係屬於不可選既路線…
如果選左,絕對會進入多人輪x,或者比人鬼y之後成為性z,
之後因為太享受而永遠都變唔返男仔既禁忌路線…諗起都得人驚…
 
到底會唔會有第四條路呢?


結果我諗呢個問題諗左成晚。
 
第二朝,表妹奇蹟地無黎搵我,
我打開部電腦,因為應承左阿kay既關係,
琴日我返屋企就即刻用女仔身份開返個facebook帳號,之後叫佢地add我。
 
今日一打開…
估唔到阿kay已經好快手tag左唔小相…
望一望d合照相,真係好難相信相入面個個係自己黎…
 


本來既我,係一個唔識上鏡既人…
當有人唔小心影到我,比我望到個陣,我只係覺得相入面既自己好樣衰好唔掂…
但而家既我,根本就唔需要刻意做乜野去入鏡…
齋係本身既存在就已經好搶眼…好好睇…
 
唉?點解天要咁決定?做男個陣就係毒撚,做女個陣就係索女?
 
我望一望左上方既紅色格格,睇下有幾多人add我…147人。
 
攪錯?
我個帳號只係開左一日就有147人add我?有無咁誇張?
而且當中差唔多9成都係男仔,有d仲要係外國人…
仲有人pm我問我一Q收幾多錢。
 
What the fuck?


 
我決定暫時都係唔理呢班人住,
再將日志set到只有friend先可以睇…
 
可惡可惡可惡。
 
我終於明白阿kay個句『表姐妳真係唔識善用自己既本錢』係點解。
 
當我打算關網頁個陣,有人係facebook到搵我。
 
係紫晴。
 
(家蔚妳在嗎?
 
(嗯


 
(我和子朗和好了。
 
(咁就好啦…
 
(可以打電話給妳嗎?
 
打比我…?
睇黎路線已經唔係單單由我選擇…?
 
無論係為左我定紫晴好,我地都係保持一定距離好…
呢個係同冰瑤討論完之後得出既結論
 
但而家紫晴主動搵我,又無理由推,所以我都係回佢可以,
反正聽電話應該無問題既…


 
(ok。
 
(^^
 
之後電話就響起 (唔~天氣不似預期,但要走…)
 
「喂?」
 
『係唔係家蔚…?』
 
「係啊…」
 
『今晚…不如一齊出去食飯?』
 


「一齊…有邊個去會去?」我諗起表妹,阿kay佢地
 
『我同妳…兩個…』紫晴細細聲講
 
下?兩個人食飯,果然宿營之後紫晴就對我產生左微妙既感情變化…
女人型版子朗又浮現係我腦海,唔得,唔可以…應該要推….但點推呢…
 
「啊…紫晴!」我激動咁大喊
 
『係!係?』對面既紫晴好緊張咁回應
 
「我醒起今晚要同親戚食飯」我講大話「今晚應該唔得」
 
『哦…咁聽晚呢?』
 
「聽晚…我…記得老師約左我地全班出去打邊爐…」我繼續講大話
 
『咁後晚呢?』對面既紫晴開始有d焦急
 
睇黎紫晴事在必行…呢餐飯走唔甩…
 
「後晚…」我攪盡腦汁,諗唔到「應該可以…」
 
『嗯…咁就後晚見~我搵地方之後再call妳啊!』紫晴好滿意
 
「嗯…到時見…拜拜…」
 
『拜拜』之後就收左線
 
雖然紫晴真係一個好可愛既女仔…除左眼鏡又係女神級…
但…但係…只要有一絲可能性會失敗…都係搏唔過
…睇黎遲下又要搵冰瑤,度下呢餐飯應該點做…
 
結果晚餐,我又落左樓下求其買左個叉雞飯
(雖然係叉雞飯,但斬料條友見到我即刻送多舊燒鵝)
拎返屋企,試下邊睇動畫邊食,
 
睇睇下,發現世界一初戀呢套野都幾好睇喎,
點解當時男仔個陣會咁抗拒?
反而I.S.呢D就越睇越無興趣。
 
食食下,屋企電話響起,係老豆。
我好懷疑我扮聲昆唔昆到老豆,所以我無聽,等佢打我手提。
 
之後我手提果然響起,我即刻開大個電視喇叭
 
「喂喂」我壓低聲線
 
『喂,仔,你係邊啊,咁嘈既?』老豆問
 
「老豆我係街啊…」
 
『你把聲咁奇怪既?』
 
「老豆你聽錯啦…條街好嘈啊!」我壓低聲又用力講,真係覺得自己好勁
 
『嗯…我寄左錢比你啦,應該夠你用幾個月,記住乖乖地溫書啊!』
 
「知啦知啦」例牌都係講呢d野
 
『啊,仲有,我前幾日收到電話,你係英國既堂兄堂姐啊,會返黎香港玩一陣。』
 
哦…堂兄堂姐,我記得佢地間唔中都會返黎,堂姐而家係大學生,
份人好玩得,佢黎個陣我成日都同佢周圍玩,
至於堂兄,應該已經打更工,係我印象中,係一個非常古怪既人。
 
「嗯…」我又好似醒唔起d野,係乜呢
 
『到時你記住帶佢地玩下啊。』
 
「哦…無問題」點解會有份違和感?「咁佢地會住邊?點搵佢地?」
 
『仔…我地屋企大把位啦,佢地更係住係我地到。』
 
「哦…吓!吓?」我終於醒起點解咁奇怪…
 
係就係,但而家我…而家我…我係女仔喎!
 
『我地仲有間大房,你比佢地訓就得架啦。』
 
「咁…咁佢地幾時到?」希望仲有時間比我諗下計…
 
『我記得好似係今晚機,應該聽朝會到。』
 
仲要聽朝tim,即係明玩9我,不過仲有時間…
 
『就咁啦,記住讀書啊,再見。』
 
「拜拜…」
 
估唔到岩岩同紫晴講既「同親戚食飯」真係靈驗,我以後唔講大話啦!