46.


『都講左唔係好刺激架啦。』表妹講
 
『係囉,實在比我想像中弱得多。』堂姐點頭
 
「下?」
 
唔刺激?咁樣叫唔刺激?


個種離心力…我而家心口仲有d唔舒服…又feel到就黎想嘔…
 
『玩返鋪跳樓機先囉不如?』堂姐問表妹
 
『好丫好丫』表妹同意
 
「我…我想抖下…」唔得…再玩我真係反胃
 
『嘉為你個樣真係好唔掂…咁你休息下啦…我同柔姐姐去玩。』
表妹有d擔心咁望住我


 
『嗯…阿哥又唔知走左去邊!唔係叫佢睇住妳…』
 
「唔…唔洗…我一…一個就得…」佢黎我嘔得仲快。
 
最後佢地兩個去左排跳樓機,我就坐係附近既木椅到休息下,
因為呢到係摩天輪附近,所以我都見到有唔少情侶經過,
見到一雙雙情侶,我又諗起我而家既情況…
 
搵一段更深刻既愛情…而且要變返男既話,對象就一定要女仔…


 
果然就只有表妹…?
 
『喂靚女?得一個人?』突然有兩個mk仔走埋黎聊我
 
「我…唔係…」我因為有少少反胃,所以講野都要小心d
 
『不如賞下面,同我地兩個去坐下摩天輪啊?』個頭gel到成個悟空咁既mk仔講
 
「唔…唔係咁好既…我等更人…」快d走啦
 
『車,咁唔比面架,懶有寶咁!』
 
「…唔…唔好意思…」我其實真係好想破口大罵,但為左唔嘔出黎都係決定唔咁做
 


『放開個女仔!』突然兩個mk仔後面有人大叫,把聲咁熟既?
 
『乜水?』兩個mk仔另轉身
 
係堂哥。
 
『哈我一直想講呢個對白好耐,今日終於講到。』
堂哥擺出一個好浮誇既姿勢指住其中一個mk仔,另一手拎住部相機講
 
…救命。
 
兩條mk仔望到呢個咁奇怪既人,gel到個頭好行既mk仔即刻講
『你…你講乜撚野,我都無捉住個女仔!』
 
『你地既罪行我已經影低左,真係ps (photoshop)都唔洗。』堂兄保持姿勢繼續講


 
『呢條友傻既…我地走囉,阿輝。』另一個mk仔同gel到個頭好行既mk仔講,
然後兩個人就走左
 
之後堂兄就望到我『咦原來係家蔚妹妹。』
 
「原來你岩岩以為係其他女仔…」我好無奈咁講
 
『嗯,一段浪漫既愛情故事往往都係咁開始,不過既然係堂弟既女朋友,
咁就無得再發展落去囉,所以妳唔洗多謝我。』
 
「哦。」我無諗過多謝你,我認真既。
 
『咦…我阿妹同樂宜呢?』堂兄問
 


「佢地去左玩跳樓機。」
 
『我真係唔明呢d自殘遊戲有乜好玩。』
 
難得地我地係意見一致喎…堂兄。
 
『家蔚妹妹妳一個人坐係到,肯定係有唔少煩惱啦…』
堂兄坐係我隔離,一路望相機既相一路講
 
咁你都知?「嗯…唔多唔少都有d啦…」
 
『妳又咁唔舒服…唔通…』堂兄望一望我…『妳個日到?』
 
「下?」堂兄你又講乜春
 


『m到啊。』堂兄一路用布抹相機螢幕一路講
 
「點…點會喎!」我好激動咁大喊,即刻chok親個胃…啊…
 
話時話,我都唔知我而家身體會唔會有m到呢回事…
到底會係點?我真係唔敢想像…
 
『唔係m到…唔通』堂兄今次更加驚訝…『妳有左…』
 
「下?有…有左乜?」
 
『有…有左堂弟既骨肉?』
 
下?我有左我自己既骨肉?乜撚野國際玩笑
 
「咪攪笑啦!」我今次激到企起身,終於…
「唔…」我禁住個口「…你…有…有無膠袋?」
 
最後我始終都係嘔左。
 
『妳睇…嘔係徵兆黎...而家d青年人真係大膽,我真係舊時代既人啦。』
 
無你咁好氣…表妹妳地返黎未呀?
 
『哈,唔講笑啦…唔介意可以將煩惱講比哥哥知喎,
哥哥係外國都有唔少人生經驗,話唔埋可以比少少建議妳。』堂兄難得地認真講
 
雖然堂兄係一個怪人,但始終大我6年,
話唔埋真係可以比d意見,但我都唔知點解釋好…
 
「我有個朋友…比另一個女性朋友告白…
但我朋友一直都係當佢係自己細妹咁…所以而家好煩惱…唔知點解決。」
 
『妳答我一個問題先。』堂兄好認真咁望住我
 
「嗯…?」
 
『妳朋友係唔係妳?』堂兄問
 
「更…更係唔係…何況我朋友係男仔。」我開始後悔點解要將件事同個怪人講
 
『我識得有對人,有類似妳講既情況。』
 
「咁個對人之後點呢?」
 
『佢地啊…就係試一試囉,真係有feel既,
自然就會一直落去,無feel既,就會明白兩兄妹始終係兩兄妹。』
 
「嗯…你講得又好似有d道理…」
 
『個對人就係我同阿妹。』堂兄RR鼻講
 
「下?」我呆左
 
『我同阿妹…正確d講唔係親兄妹,佢係我繼母同另一個男人生既女黎。』堂兄講
 
下?我完全唔知呢件事...我一直都以為堂兄同堂姐係親兄妹…
 
「我從來都無聽過…」
 
『我阿妹,有一期真係鍾意過我…仲同我告白,我下定決心就同佢試一試…』
 
首先唔理點解堂姐會鍾意你呢個怪人,
但呢個情況真係熟口熟面…我同表妹…
 
「咁最後…」
 
『最後阿妹同我都明白到個種”感覺”終歸只係錯覺。我地自然就和平分手,
但我地關係並無差到,反而變得更加好,成為一對比起其他兄妹關係更好更穩固既兄妹...
 
...而家諗返起,好彩我當初係選擇嘗試,如果我當初拒絕既話…』
堂兄感觸咁望一望前方,表妹同堂姐行更返黎『或者我同阿妹就唔可以再咁快樂去生活。』
 
我愣住左,
聽完堂兄呢段咁認真既對話,
真係令到我心入面既結解開左。
 
『所以…加油啦…堂弟…個女朋友。』堂兄拍一拍我背脊講
 
「嗯…咦?都話左我朋友唔係我囉!」
 
『明啦明啦。』堂兄笑住講
 
雖然硬係形住有樣野好奇怪,但我醒唔起係乜黎,
因為我而家心入面好舒暢,覺得世界已經重新再次轉動。