50.


『啊…大豐收!』表妹買左好多書 (好彩唔洗我比錢),但佢點都唔肯話比我知係乜書黎。
 
「睇下書原來都幾唔錯…」我開始明白點解d女仔鍾意拎住本書睇,因為書真係有佢既魅力。
 
『食野囉,去邊食好?』表妹問
 
「呃…」係老銅呢d地方搵野食…真係考起我…


 
『睇嘉為你個衰樣都諗唔到嫁啦,一於去食拉麵,嘉為你請喎。』
 
「係係…」老豆我估我好快又要問你拎錢。
 
『係喎,我見到嘉為你靜靜雞走左去比錢,買左乜書?』
 
「唔話妳知。」反正妳又唔比我睇妳買左乜。
 
『點解!係咪咸書黎?唔通…係…女性向既咸書?』表妹好驚訝咁問


 
女性向既咸書…即係封面有個男人係到露肌肉個d…
 
我面紅一紅「更…更係唔係啦…更何況個度點會有喎!」
 
『唔得…嘉為你好可疑啊…我要知…我一要知!』之後表妹就係到攪我個袋…
 
「喂…d野會跌架…」
 
『收收埋埋一定有古怪!』


 
「我拎出黎啦…唔好攪…啊!」我唔小心撞到人,個個人跌左本書。
 
「唔好意思…」我拾起本書,本書咁熟口熟面既…
「『每個人心裡都有另一個自己』咁岩既…我岩岩都有睇啊…」之後我將本書還比撞到個個人…
 
紫晴。
 
「紫…紫晴!」弊…我琴日仲同紫晴講今日要陪親戚…唔陪得紫晴食飯…
 
『咦!紫晴妳又會係到既!』表妹即刻問
 
『係啊…我…我岩岩去左睇書…妳地…』紫晴愕然咁望望我地
 
『咁岩既…我地都係啊…去左時代睇…』


 
『係囉…真係岩…哈哈…』紫晴既笑聲好明顯係無感情『點…點解家蔚妳要打扮成咁既…』
 
係紫晴既眼中,我而家係男性打扮,隔離係表妹…
死火,一定係產生左唔小既誤會!
 
「紫…紫晴…」你聽我解釋先啦.jpg
 
『紫晴,係我叫表姐打扮成咁,妳覺得點?』
 
表妹唔好再火上加油啦…
 
『家…家蔚妳唔係話同朋友親戚食飯…點…點解既…?』紫晴無理表妹既問題繼續問
 
「因…因為佢地話今日唔洗我地陪…」


 
『妳…妳地!』紫晴突然好激動,之後又平靜返『嗯…我明白…』
 
「紫晴…」我覺得妳肯定唔明白。
 
『紫晴!我地而家想去食拉麵,一唔一齊?』表妹問
 
表妹妳真係唔識睇時機做人!
 
『…一齊?唔洗…我屋企煮左我飯…已經遲左…拜拜…』之後就係我旁邊走過…
 
紫…紫晴…
 
望住紫晴離我越黎越遠既身影…
或者我呢一刻決定唔追…對我同佢…都係一件好事?


 
*
 
而家既我大字型訓係一張床上面,
全身只係得返一件白色bra同埋內褲,
至於堂兄,就係我正上方用雙手加曲腳支撐住身體,維持一個orz既姿勢
 
呢個情況…唔通…唔通就係傳說中既推倒?
 
但我而家係被推倒個個喎…
 
至於成件事...點解會變成咁…
就要由返琴晚開始講起…
 
*


 
話說琴晚紫晴走左之後…

『點解紫晴走得咁急既…?』表妹相當疑惑咁望住我

「表妹…妳真係唔記得紫晴今日約左我食飯?」我好無奈咁問表妹

『下!我真係醒唔起!』表妹即刻愰然大悟『咁…咁即係…』

「嗯…我同紫晴講左話今日要陪親戚唔得閒…但而家…」

『但而家比紫晴見到我同你係到行街…』

「而且我仲要著住呢身咁男性既打扮…肯定比紫晴以為我地係拍...拍更拖。」

『表哥!』表妹急到唔記得講”嘉為”『你快d打去同紫晴解釋啦!』

「我…仲諗更…」

『點解要諗喎!?紫晴唔係你好重要既人咩?』

「就係咁…我先唔想我地再有關係…」我認真咁同表妹解釋
「咁我先有可能變返男仔!」

『就算嘉為你同紫晴一...一齊…都有可能變返男仔姐…紫晴而家係女仔喎!』

「未必…」我將冰瑤既諗法講出黎…
「既然上世既我可以將我由男變女…咁上世既子朗亦可以將紫晴由女變男…」

『咁…一定好奇怪…』表妹一聽完即刻呆左,
我覺得表妹又係形象起女人形版既子朗『咁我明…我明啦…』

我諗起紫晴岩岩睇個本書…唔通…徵兆已經出現左…?

「唉...去食野啦…唔好再諗咁多…」

食完碗無乜豬骨味既豬骨拉麵之後,我今日決定都係返自己屋企。

『咦,家蔚妹妹今日又返黎訓呀?』堂姐一見到我開門即刻講

堂姐係到睇更電視,堂兄唔係佢隔離,亦無用我部電腦。

「嗯…屋企人見一日夠啦…以達哥哥呢?」

『佢係房用更佢部notebook啊…佢話嘉為部機無佢想要既野。』

無佢既野?分明係x-art全集啦...
可惡既堂兄...有notebook仲攪我部電腦…

突然堂兄間房既房門打開左,堂兄探個頭出黎,

『咦家蔚妹妹返得黎岩啦…入黎哥哥房,比d好野妳睇。』堂兄講

我考慮更應唔應該入去…但堂姐係到應該無事既。

『阿哥你咪對嘉為既女朋友亂黎啊!我一定唔放過你!』堂姐大喊

『放心,放心,正經野黎。』堂兄回應

你會有正經野?我邊諗邊行入堂兄間房。好,就睇你攪邊科。
 
一行入房,首先映入眼簾既…
係堂兄notebook螢幕入面一個灰色赤裸上身既外國肌肉男…
下身只係著住一條黑色三角褲,突顯下面暴凸既漲起部份。
 
「睇黎我都係出返去好d,哈哈…」我冷冷笑一聲
 
『咪…咪住!』堂兄好著急『件事唔係妳諗咁樣!』
 
「堂…以達哥哥…我明既…每個人都有佢既喜好,我明既。」
 
『我唔係gay架!』堂兄繼續講
 
「我都唔係…咁…哈哈…拜拜。」我急急腳轉身想開門走人
 
但個手即刻比人禁住。
 
『既然比妳知道左我既秘密,咁就唯有…嘿嘿嘿』堂兄邪惡地微笑
 
「你…你想點呀…我…我嗌架…」
 
但堂兄無進一步行動,反而鬆開手,坐返係床上面。