56.


我發左個夢。

係夢入面,我說服左上世既自己,
然後變返男仔,之後我好開心咁去表妹,
表妹無同任何人開始過,我地好快樂,紫晴佢地係隔離祝福我同表妹

我同樂宜既關係再唔係表兄妹…而係更親密…



更…

『睇黎你受既傷都唔少。』一個少女 - 上世既"我"係隔離講

「妳唔會明。」我斬釘截鐵咁講

『至少,你仲可以選擇祝福佢地,如果你真係愛佢。』

…我望住眼前既少女…佢遭遇既…其實比我更加淒慘…



「對唔住…」

『唔洗。』

「但如果我從來都無變做女仔…一直都係男仔…」

『咁你就唔會明白佢有幾愛你,就係因為你變左做女仔,
發生左各式各樣既事情,先會明白到咁多事情。』



「如果我可以變返做男仔…我…我一定可以將所有野都扭轉過黎…」

我望住眼前既少女…只要妳肯將我變返做男仔…只要妳肯…

『唔得…』少女搖搖頭『我明白你既心意…但係…我既心意仲係比你強烈得多…』

「點…點解…」

『抱歉。』

然後眼前就被黑暗覆蓋。

我醒了。

今日係七月三十一日,星期日,我已經成為女仔二十日。



堂兄堂姐已經走左,表妹亦都有第二個…
現實果然係現實…毒撚就算變左索女都係唔配有女…

當我掂到濕透既枕頭,我明白到...喊已經喊夠了

已經唔再奢望表妹可以幫忙…
而家只係得返我一個人…
但我都要努力…我要變返男仔…

我久違地開一開msn,一個叫 GAY不可失 既人即刻搵我
佢係阿澤,班入面其中一個毒撚,
佢唔係GAY,只係覺個改咁既名好好玩。 (註: 佢暗戀對象就係冰瑤)

毒撚始終係毒撚,寧願曝住msn等我online都唔肯打電話。



『喂死仔去唔去動漫節啊。』

「我…」我醒起而家係女仔…「唔啦…你呢,仲未去咩?」

『日日都有去啦,今年d cosplay好有水準啊,更係去影到夠。』

果然係毒撚。

『算,我同埋阿沖兩條友去。』阿沖亦係我班入面另一個毒撚。

「加油。」

諗諗起下其實去動漫節行返轉都好…當轉換下心情…當然,係自己去。
 


 
果然係星期日…去動漫節條龍真係好長…我排左一陣已經有d後悔,
到排到入會展裡面,已經差唔多用左成粒鐘。

今次買飛場地仲要另外落一層,而唔係平時咁係正門口,最麻煩既係
買完飛之後仲要專登走返上一層再去排過隊,到底邊個安排架?

途中都有好多大中小毒撚係到講我...「哇…條女唔去cosplay真係哂哂…」
「佢肯著小炎件衫我乜都得」「仆街仔快d影…」「哇...哇...哇...不得鳥」
「點解咁靚女會黎動漫節…」「佢一個人喎...唔知受唔受溝呢…」
真係…大驚少怪。

當我入到會場,先發現外面排隊只係第一步,
裡面先係真正既排隊地獄…



無論係買書,買精品,定所謂既女僕書房,都要排隊…

咁到底有乜意義?

動漫節既意思已經完全變哂質…

唯有一興趣既創意地攤,根本就多人到迫都迫唔入,
因為我而家係女仔身份,所以都廢事迫入去…免得比人抽水…

唉…

結果我入左去半個鐘,就有個念頭打算走人。

我正打算由大門走人,『小…小姐!』突然有把女聲係我後面大嗌

小姐?應該唔關我事,但又再聽多聲『著住綠色TSHIRT小姐!』

我係著住綠色衫喎…但係我係男…咦…我而家係女…

我另轉身望一望,係一個帶眼鏡既女仔,樣就但係好普通,但都唔算差既,
大約比我細一兩歲,佢隔離都有幾個女仔,都露出好焦慮既神情…

「乜野…事?」我有D緊張咁問…

『小姐…我…我叫小蝶丫…我地…我地想搵妳幫下手啊…』小蝶口窒窒咁講

「幫…幫乜?」比一班小妹妹要求幫手,如果我係能力範圍之內既話…

『我…我地有個朋友今日唔得閒黎唔到…所以搵唔齊人…所以…所以…』

「所以…」

『可...可唔可以同我地一齊玩cosplay?』
 
「coss…play?」我比突如其來既要求攪到唔小心走左音

『嗯…我望到小姐妳個樣…一定好適合…所以…所以…』小蝶捽捽隻手講

「好…好似唔係幾好意思喎…」

『小姐…我地…我地幾個為左今日準備左好耐架啦…d衣著我地都係自己整…
但唔齊人總係…總係…』小蝶急得好似就黎喊…

我望一望小蝶以外個三個女仔…佢地都用哀求既目光望住我…

唔好咁望我啊…我…

我最後都係比呢四個女仔拖左入女更衣室。

『唔該哂丫!小姐!』小蝶向住我90度鞠躬。

「唔洗…唔洗客氣…哈…仲有…妳地可以叫我做家蔚…」

其實諗諗下玩cosplay都無乜所謂姐…
反正我目標都係要變返男仔…到時呢個身份做既野都會洗白哂!嗯!無錯!

「咁…妳地係打算cos乜野…?」

『哈…家蔚姐姐有無睇過?魔法少女啊…』

「哦…奈葉?」

『唔係…魔法少女小圓…』之後小蝶係個袋到拎起一件黑白色主調既衫『我地係想cos個五人組。』

所以…我即係…

『家蔚妳個氣息…cos小炎真係一流丫。』小蝶好開心咁講

…我諗返起岩岩有個毒撚講既野「佢肯著小炎件衫我乜都得」

What the fuck。