我首先返會場同小蝶佢地道歉「小圓…唔好意思…我諗我要返去先啦…屋企人搵我…」
佢地都無怪責我,『無…其實係我地唔好意思!』小蝶講

之後我地仲交換埋電話 (其實佢地有問我拎facebook,我扮無,費時佢地tag我...),
睇下有緣再玩過cosplay,然後我就自己去更衣室換返衫,離開展場坐地鐵返屋企。

我發現,我腦海入面仲係岩岩邦彥救我件事…
其實諗返轉頭,呢二十日我都比人救左好多次…
子朗一次…堂兄兩次…今次到邦彥…



子朗個次因為係冰瑤計劃哂…所以無乜野…
堂兄…就算佢救我幾多次…佢都係我堂兄,而且佢係怪人呢點係唔會改變。
但今次…無任何計劃...救我個個又唔係怪人…所以…我特別深刻…

以前覺得呢種劇情好老土…但自己親身感受個陣…
總覺得…嗯…唔知點講...

唔通…女仔就係鍾意呢種王子降臨既感覺…?

但…但我係男仔喎…



我返到屋企,雙腳屈曲坐係梳化上面,
抱枕放係身體同腳之間夾住…臉再控埋係個抱枕到…

啊…估唔到邦彥仲會打暑期工搵錢…
唔似我咁,只會浪費暑假浪費人生…

邦彥…

估唔到佢份人都會講下野…並唔係好似宿營咁沉默…掛住聽歌…


而且仲係一個好人…

邦彥…邦彥…

點解宿營個陣唔同佢傾多d計呢?我發現我連佢姓乜都唔知…真係失敗…
係喎…宿營個陣我問過佢拎電話…其實可以打比佢姐?

但…咁又好似唔係幾好,人地開更工,而且打比佢好似好唐突咁…

啊…啊…點算好呢?

邦彥…邦彥…邦彥…

不如打比表妹…嗯…表妹同佢同班…應該知道好多關於佢既野…



嗯…打比表妹…

表…妹…

表妹…已經唔會再關心我既事了…
或者可能只係我一廂情願,話唔定表妹仲會幫我,但點都唔會放係第一位…

而家佢第一位,係臨記,唔係陳家蔚。



嗯…

我放低手上面握緊既n73,岩岩既興致已經冷卻不少,
甚至到底係點解有呢個興致,我都無去深究,


或者,我只係想識多個朋友姐?

然而,呢個興致令我重新發現,原來我已經係孤獨一個…
無人可以再幫我…
 
就係咁,我無無聊聊係屋企呆左個星期一,
今日係星期二,我都係留係屋企上網。

我久違地上返論壇,睇返論壇上面有關動漫節既post,
果然有人將星期日既相放上去…好彩既係,我地魔法少女五人組既相並唔係好多,
唔好彩既,就係我既個人照比班人係咁熱烈討論…

乜野”屌你正丫喂,肅肅北行鳥,seed呢,法官大人,淨係隻腳都可以玩幾日”都出哂黎,
佢地又點會知道眼前呢個女仔本身係男既呢…



反而其他質素無咁好既cosplay,就係咁比人話”重口味,哇屌xx (“,
真係your face your fate,其實我真係有d慶幸,自己變左女仔會係靚女…

諗返男仔個陣,雖然老實講唔算樣衰啦,但就係屬於大眾臉,
就好似路邊既小石頭,或者係雜草一樣,無人留意無人理會…

越睇感覺就越差,我決定都係抽返d時間諗下之後應該點做…
變返男仔…要搵返段更深刻既愛情…

我諗返起夢入面上世既我:『我明白你既心意…但係…我既心意仲係比你強烈得多…』
…即係我對表妹既感情…仲唔足夠…
但已經…已經唔可以再發展落去…

我唯有去搵第二段感情…而且一定要係女仔…
紫晴…唔得…呢個係一個賭博,我變返男同佢變做男既機會都係5050,唔賭得…


阿kay?佢同表妹咁熟…感覺好似好奇怪…表妹知道左又唔知會點諗…

唉…咁…我仲有其他選擇咩…?

我而家呢個身份去識男仔就易姐…
應該咁講,就算我唔主動去識男仔,都會有男仔痴埋黎識我…但係女仔…

感覺難度分分鐘比我係男仔個陣仲難…
我以女仔既身份識女仔其實係為左更進一步!諗起都覺得件事好奇怪。

女同女…

我拎起電話…起勢禁個個短到爆炸既電話list,
有邊個可以選擇?有邊個可以幫到我…

然後我禁到一個名,文冰瑤…
我發現我真係幾傻,點解我從來都無諗起個冰瑤?
冰瑤知道我既秘密,冰瑤係企係我呢邊,就算無左表妹…我都有冰瑤可以幫我…

佢同我講過,幾時都可以搵佢幫手…
因為佢同kevin拍更拖,所以我無可能同佢有更親密既關係架啦…
但佢係學校咁受歡迎…一定可以介紹女仔比我識…

嗯…我仲有個一個救命稻草!
 
『喂?』冰瑤好快就聽左電話

「冰瑤…家蔚啊…」實在太好啦…打一次就通

『咦…睇黎妳已經開始習慣而家既身份啦喎…』冰瑤講

「點…點解妳咁講?」我好驚訝…

『妳岩岩叫妳自己做家蔚,唔係嘉為。』

「我...」岩岩完全係下意識咁講出口…「唔好講呢d啦…冰瑤!我想搵妳商量一d事…」

"可唔可以介紹女仔比識!"
真係打電話個陣…原來係咁難講出口。

『家蔚…其實呢排學校都測更驗…所以…我諗呢期都未必幫到妳…』冰瑤好抱歉咁講

「下…?而家暑假補習都要測驗咁麻煩?」心諗好彩我無返學校補習…

『妳知黃sir嫁啦…』我地學校既副校,教我地物理『出名嚴…我而家溫到人都癲…』

「咁…咁…」

『等我得閒我再call妳?得唔得?』冰瑤再講

「…ok…既…」我既救命稻草,就咁就消失左…

『嗯...就咁話…唔好意思呀…家蔚…』冰瑤再道歉

「唔洗…咁再…再見啦…」

『家蔚…』冰瑤突然再講

「係...?」

『其實…妳有無諗過繼續做女仔?』