71.


之後,即使發生左好多事,包括表哥突然由男變女…
但某程度上都無影響到我地既關係…
 
直到…
 
『碗豬骨拉麵都無豬骨味既…』表哥一路食碗拉麵一路講
 


「係嘉為你無心情咋?因為岩岩激走左紫晴…」
 
『唉…我都唔知…但我覺得為左我同紫晴…而家咁樣或者係最好…』
 
「嗯…」
 
而且比人覺得我地係情侶…都唔錯啊…表哥…
 
我差d就想講出口…
 


雖然咁樣真係好對唔住紫晴…但我都唔知要點做啦…
 
然後,係第二朝,我出發去南生圍之前,就收到個封短訊…
一封改變一切既短訊…
 
(如果唔想陳家蔚個秘密比人知道,就同佢脫離關係。)
 
結果成個南生圍之旅我都係到沉思…無加入表哥冰瑤佢地一齊去影相...
柔姐姐係隔離不斷同我講野,我都只係敷衍了事…
 


一日既沉思…我下左個決定…
 
為左保護表哥…
 
脫離關係
 
我…我只可以咁做…
 
但我…我真係唔想…
 
明明我同表哥已經好接近…
 
嗚…
 
到…底…嗚…係邊個…


 
喊左一晚,唔算係無得著…我好冷靜咁分析左成件事…
就係表哥激走左紫晴第二日,就發生呢件事...咁如無意外...

但無理由...紫晴明明係好女仔…唔應該會咁…
所以…我決定約佢出黎講清楚。

『樂宜…點解咁急搵我既?』紫晴一坐低就問

「係個次時代廣場件事…我怕紫晴妳有誤會所以…」

『無…』紫晴面色一沉『其實我都無乜野…』

「妳有…紫晴…妳肯定有…唔係妳唔會走得咁急…」



『妳…妳同嘉為拍拖…又點會關我事…』紫晴細細聲講

嘉…嘉為?

「紫晴…果然係妳…」我拎起部電話,禁返封短訊…之後放係台上面…
「點解妳要咁做?」

『樂…樂宜?』紫晴望一望封短訊,好驚訝『我唔明妳講乜…』

「妳岩岩講嘉為…即係妳知道家蔚件事…唔好再昆我啦…紫晴…」

我以為紫晴會繼續扮唔知乜事…點知…

紫晴合一合埋眼幾秒,之後『無錯…係我做。』



「點…點解紫晴妳要咁做喎!」

『因為我鍾意家蔚。』

「下?」我比紫晴突如其來既發言嚇親…

『因為我鍾意家蔚』紫晴重覆一次『所以我唔可以比第二個人搶走佢…』

「所以妳就…所以…呢封短訊…」

『而家我明白到…呢封短訊既威力真係唔夠…』紫晴搖搖頭

紫…紫晴…?

『或者…對妳既要求要唔同d…』紫晴陰險地笑一笑…



對我既要求…即係有第二個人都收到呢封短訊…係…係邊個?

『樂宜…妳覺得臨記份人點…』

「點…點解妳要提呢樣野…上次宿營咪講左…我同臨記…」

『係無可能,我記得…』紫晴笑一笑『咁或者妳要學下接受佢啦…』

點…點解…

『嗯…簡直係完美,妳就去同臨記告白啦…如果唔係…』紫晴將手放係下巴下面…再笑一笑…

妳…妳係邊個…妳唔係我認識既紫晴…

「妳…妳又知我會受脅…或…或者我會走去同嘉為講呢?」

『然後呢?之後妳心愛既嘉為…啊…唔係…係妳表哥…就會比人捉走…』

…然後紫晴就拎起我部電話,打左個號碼…係臨記…

『聽電話…然後…妳明嫁啦…』紫晴再笑一笑

我…我…

表哥…我…我鬥唔嬴眼前呢個人…呢個我唔認識既人…
 
『喂…樂…樂樂宜?』臨記一聽電話就口窒窒『點...點解既?』

好明顯臨記估唔到我會打比佢…而事實都係咁,
每次要搵臨記都係由阿kay代勞,所以我真係一次都無打過比佢。

「臨…臨記…我…我有d野想同你講…」
我而家個情況就好似踩完陷阱,試圖爬返上去個陣跌返落黎,仲攪到越陷越深。

『係乜野呀?我好樂意聽嫁…』電話另一邊既臨記非常興奮…

但係為左…為左表哥…

坐係對面既紫晴開始有d唔耐煩,做左個 快-d-講 既口型…

「臨…臨記呀…」我強忍淚水「可…可唔可以…同我拍…拍拖…」

『下?樂宜妳講咩話?』

臨記你係真聽唔到定假聽唔到…我真係…嗚…唔想再講多次…嗚…

「拍…做我男朋友啊…」表哥…對唔住...「可唔可以…」

『更係可以…樂宜…我更係可以…嘩!…我真係估唔到…哈哈哈..
但點解要係電話講?呢d野出黎講唔係好d咩?』臨記好明顯開心到癩左

「因…嗚…因為出黎講好唔…好意思…唔講住…我電話無電…拜拜…」

『樂宜…?』

我即刻收左線。

王樂宜妳真係全世界最失敗既人。

『就咁。』紫晴企左起身,露出一個勝利既微笑『呢個情景真係有d似層相識,
啊…你地下次就出黎記住要表現返似個情侶喎…唔係穿崩就大件事哦…』

之後紫晴就轉身離開餐廳…

然後,我無理到餐廳係有幾咁多人…我而家能夠做既…就係放聲大喊…