73.


但當我醒返,睇返短訊記錄…就知道我鑄成大錯…

「應…應該無事掛?」

但事實唔係咁,表哥又好似上次咁留左個言…但今次...

『表妹…我會係妳樓下等妳…妳唔落黎我就一直等…』



但我實在都無勇氣去見表哥…而且...如果我接觸表哥...一陣比紫晴發現就大件事....
所以,我只係一直係附近望住表哥…同佢一齊…一步都無離開過…

但到夜晚,我見到表哥附近有幾個男仔開始蠢蠢欲動…
表哥而家係女仔…而且以表哥既性格佢肯定…肯定唔識應付佢地…

唔得…我要行動…但…但如果比紫晴知道…
唯今之計,就係打比紫晴…



「喂…紫晴…係我」

『樂…樂宜?』紫晴有d驚咁應『點解咁夜打黎既?』

「我…係有關表哥既事…」

但紫晴無即刻應我...等左幾秒...紫晴終於開聲…但係語氣…好明顯唔同左?

『係咪個封「我好辛苦」短訊?』紫晴平平淡淡咁講



「妳…」點解紫晴會知道?「點解知道…」

『因為…我啊…琴日係妳表哥屋企訓哦。』紫晴有少少高興咁講

「係…係表哥屋企…訓?」我簡直係嚇呆左

『無錯啊…而且…差d就發生左個d事…諗起...真係可惜哦…』

「妳…妳唔好對表哥亂黎呀…」

『就算亂黎,都唔關妳事啦…妳而家男朋友係臨記啊…而唔係嘉為。』紫晴刻意強調嘉為兩個字…

可…可惡…

『係呢?咁打黎做乜呀?臨記既女朋友?』



「其實…家…家蔚因為呢件事所以黎搵我…」之後我就將成件事講比紫晴聽

『咁妳咪出去搵嘉為囉…我都唔想嘉為身體有問題…』

就…就係咁簡單?

『不過呢…』紫晴輕輕一笑『電話唔好斷來電…仲要放係我聽到既位置…
我要聽到妳地既所有對話…如果唔係…妳明嫁啦…』

紫…紫晴…點解妳份人可以變成咁…

『仲有哦…記住唔好亂咁講野。』

 


所以,我就一直無收線,將手提渣係手再監視表哥
好好彩既係…當個三個男仔行動個陣,有個警察岩岩就係附近…

「警…警察哥哥…」我望一望個警察…佢應該係新仔

『係?妹妹有乜事?』

「個邊…」我指住公園個方向…「有三個男仔好似係到騷擾一個女仔呀…」

『係…等我去睇下。』之後我就同警察就一齊去搵表哥…

最後表哥當然就無事…但我又要再一次面對表哥…

為左盡量唔講錯野 (因為紫晴偷聽更)…我盡量少出聲…
但今日既表哥…好明顯有d野唔同左…



『表妹我有d野要同妳講…我…好對唔住,餐廳個日件事…』

「其實我先應該道歉…我唔應該將我個套強加係你身上…家蔚你都有你自己既自由…」

『唔好再叫家蔚!我係妳表哥,我係妳既嘉為,我係…我係…』

表…表哥…

『我係表妹妳最重要既人!我…我鍾意妳啊!』

鍾...鍾意我...表...表哥你都鍾意我...
你...你知唔知道我等左表哥你呢句好耐...

但...但點解…偏偏要選擇呢時間…選紫晴聽到所有野既時間…


如果表哥你可以早d…早一個星期…

或者成件事…唔會係咁…

我已經唔知我而家呢個心情…

明明已經近在咫尺…明明我同表哥係相愛…
但我偏偏無得去接受呢個感情…

我一方面開心…一方面又好難受…

「太…太遲啦…」表哥...「一切已經太遲啦…我已經同臨記一齊…」我都係鍾意你...

「對唔住。」你明唔明啊...

到…到底我而家係表哥面前露出既…係乜野表情…啊…

有無人可以話比我知...啊...

*

鈴鈴鈴鈴鈴鈴~

學校既鐘聲打斷左我既回憶…

『樂宜…去搵表姐傾計囉…』阿kay笑笑口望住我

表…表哥…

到底你而家同我身處同一個班房…係帶住乜目的?

王樂宜視角