74.


九月一日…朝早六點鐘。

冰瑤好早就黎到我屋企,佢已經換好校服...

『我幫妳準備好哂啦…』冰瑤係佢個袋到拎起一套第二間學校既校服

女裝校服。



「我…我真係要著?」

『家蔚…妳唔係而家先黎後悔嘛…』冰瑤用歧視既眼神望住我

平…平時睇AV校服妹就睇得多姐…估唔到會有自己著既一日…

我拎起件女裝恤衫…「透明白色…會唔會…乜都透哂架…」

我又聯想起AV情節,一落雨校服妹D恤衫就濕到乜都透哂出黎…


點解校服既設計係咁古怪架…

『所以我都幫妳準備左件短袖冷衫…』冰瑤又係袋到拎起件黑色冷衫

「下?大熱天時…仲要加多件咁既野…肯定熱死人啦…」

『著住冷衫妳咪唔洗著背心囉。』冰瑤好從容咁講,

我望一望都係著住短袖冷衫既冰瑤…
原來班入面咁受人專敬既女班長都係無著背心?



「但…唔著背心又好似…唔太安全…咁喎…」

『咁妳就著哂佢啦!』冰瑤唔耐煩咁講

之後我就開始換件校服裙…「咁…咁短既?」

『妳唔係想著長到膝下面個隻裙下!咁唔好睇!』

「但…但安全好多喎…而且…而家下面涼浸浸…比風吹一吹又會…乜都露哂…嗯…」

冰瑤反一反白眼『家蔚…妳記住食藥丸啊…』

換完套校服…望一望塊鏡…嘩…真係好適合…



『咁先好睇嫁嘛,係咪?』冰瑤係我隔離好滿意咁一笑

應該無問題掛?

*

因為我係轉校生,要早半個鐘返學校報到。
所以我同冰瑤就好早出發…冰瑤決定送到我去我地兩間學校附近既一個公園

『我就送到妳黎呢到啦…費時比人發現…而家我地唔同學校…之後就要靠妳自己…』

「冰瑤…好多謝妳…唔係妳既話…」

冰瑤搖搖頭『唔好講咁多客套說話啦…總之…最好既結局,就係對我最好既答謝,明未?』



最好既結局…表妹…

「咁…再見啦…」

『加油…』冰瑤向住我一笑『陳嘉為。』

我一定唔會辜負妳幫我既所有野…冰瑤。
然後,我就踏入新既校園…表妹間學校。
 
入到學校,首先我要去校務處搵一個叫MISS LEE既人
佢應該係我班入面既女班長。

至於點解我可以入表妹間學校, 事實我都唔知到Kevin點做到,
總之我而家就有個新既身份…係岩岩係外國返黎既十六歲少女。
更加勁既係,竟然係可以編入表妹個班到。



有錢真係大哂…我甚至開始懷疑佢同李+誠有密切關係。

去到校務處 (係七樓,所以我搭lift上去),去到門口就禁鐘…好快就有人開門

『同學?咁早既,想搵邊個?』一個帶眼鏡幾後生既阿sir開門

「早晨…我黎…」我非常緊張「我黎係想搵miss lee…」

『哦…等陣啊…』之後個後生阿sir就伸個頭入去『miss lee有同學搵妳!』

好快,miss lee就出黎,佢係一個長髮後生既女老師,
我估佢同岩岩個眼鏡老師一樣,大約都係廿三到廿五歲左右。

『係?同學妳…唔通就係陳家蔚?』Miss lee一見到我就講



「係…係啊…我今日轉校黎…所…所以」我口窒窒

『嘩…話就話外國返黎,但係家蔚同學妳廣東話都好好喎…』Miss lee好開心咁講

「因為…因為我都係香港住過5,6年…」冰瑤教我講既「所以廣東話都算唔差…」

『咁我就放心啦…妳一定好快同班同學熟略姐…而且妳又咁靚女…』

老師竟然會講d咁既野,我真係想像唔到…

「老…老師…」我dup低頭,比老師讚既感覺真係怪「妳都…妳都靚女姐…」

『哈哈…好多男同學都係咁講嫁…』miss lee笑得好忘形
『啊…掛住傾計都唔記得左tim…入黎入黎…有d表要妳填返…』

…呢個就係我既班主任?

『家蔚妳一陣想直接坐係班房入面定到時候我叫妳入黎?』miss lee問

「下?」有得簡我更係唔想做出好轟動既動作…「更係…」

『不過妳點都要自我介紹嫁啦…家蔚』miss lee控個頭埋黎
『妳咁靚女一定要黎個轟動d既出場…嘿嘿…一於我叫妳入黎啦!』

咁妳岩岩又問?

填填下表,好快,就到左八點十五分…

『差唔多要落去啦…家蔚同學…跟我行啦…』

「哦…」我越黎越緊張,因為就黎會見到表妹…「係呢…miss lee,點解妳唔洗去早會既?」

『哦…呢間學校放學前係禮堂有個集會,所以今日無早會,係喎,家蔚同學妳知道今日返半日可?』

「嗯…我大概知道…」

『而且呢兩個星期都係…』然後我地就去到班房門口,Miss lee轉身笑住同我講
『嘿嘿…家蔚妳係到等我喎。』

同學兩個字去左邊?去左邊呀?仲有妳笑得令我好不安啊…

班房入面非常熱鬧,好明顯班同學係到討論更暑假既經歷…
我原本以為miss lee入去會令到佢地靜哂…點知班人竟然歡呼起上黎,
睇黎miss lee係非常受佢地歡迎…

而我呢…個感覺就好似準備去死刑場…裡面…有齊表妹…紫晴…阿kay…邦彥佢地…

我完全唔知點做…總之我就好緊張…

『入黎啦…同學…』然後我就聽到死亡既呼喚。