75.


我慢慢行入班房,雙腳就好似石化左咁。
一入到去,就有個人激動到企左起身,係阿kay…
佢前面伏係台到既,應該係表妹?

佢今日唔舒服?

『入黎同人介紹下自己啦…』Miss lee笑笑口咁望住我…



「係…」完全估唔到自己會係一班人面前自我介紹「我…我…」

我真係想搵個水池跳落去!

班入面既同學,好明顯係到熱鬧討論更我『好索啊』『女神』『嘩』既字眼滔滔不絕

「我…我叫陳家蔚…請多多指教。」啊…真係好羞恥…

『家蔚同學,唔洗咁緊張喎…』miss lee安撫我咁講



「嗯…唔好意思…」

然後,伏係到既表妹終於抬起頭,用難以置信既眼神望住我,我向住佢微微一笑。
表妹…你既表哥黎搵妳啦…

『家蔚同學岩岩係澳洲返黎,但廣東話都唔差架,你地記住要好好相處喎…』miss lee接住講

『『肯定啦!』』大部份男同學即刻回應



…先唔會同你地班咸濕仔好好相處

『咁妳就暫時坐去…啊…陳芷螢隔離啦…』
miss lee指住近門口既角落,有個女仔坐係到,隔離有個空位…

「哦…哦…」然後我又慢慢行去角落…

而家我就好似行cat walk咁比成班同學既視線射住…啊…唔好望啦…
行去角落呢幾秒就好似幾個月咁長…又好似跑完9分鐘長跑一樣辛苦。

但獎品係…

『hi…家蔚。』邦彥原來坐係個個叫陳芷螢既女仔前面…

「…邦…邦彥…好耐無見啦…」嘩…嘩…邦彥你著校服好型啊…我轉黎呢間學校果然無錯!



咦?

唔係…我係為左表妹…唔係其他野…

然後我就坐低…隔離既陳芷螢一臉無奈咁另埋一面望住班房出面既走廊,
好明顯係因為隔離有人坐所以覺得好無癮。

對唔住喎。

但我望真d又覺得呢個人熟口熟面…

「hi…係咪叫芷螢…我係家蔚啊…」我嘗試打招乎

佢決定無視我,正怪人。



算我繼續望邦彥背脊算…

嘩…好結實啊…
 
當我正望得著迷個陣,Miss lee又開聲講野

『啊,我醒唔起一樣好重要既野要做...係乜呢...』非常煩惱

…妳到底係咪老師黎架。

『老師,選班會幹事啊!』坐前排既其中一個女仔舉手講

『啊…係喎…哈哈…不過其實跟返上年咁都得啦?』



咁...咁求其?妳到底係咪老師黎架... (順帶一提,我地而家係中五)

之後miss lee就係黑板到寫左幾個職位…

『班會主席…』

『老師!』阿kay彈起身『王樂宜!』

咦?

『下?』坐係阿kay前面既表妹好明顯岩岩游左魂,唔知發生乜事

『我都係咁諗,上年王樂宜都做得好好啊…』miss lee點點頭回應

成班同學都和議,原來表妹妳之前係班會主席…我真係唔知…



『咁一於就由王樂宜繼續做班會主席啦…妳ok可?』Miss lee望一望表妹

『係…我…如果各位唔厭棄既話…』表妹有d怕羞咁講

『更係唔會厭棄啦…樂宜!』隔離既臨記即刻激勵表妹

但係表妹一d都唔開心。

睇黎表妹妳同臨記既關係…果然係假既…

『咁男女班長呢?都係照舊?邦彥同埋芷螢?』Miss lee望一望我坐既方向

『我…我ok。』邦彥應一應

『係…是但啦…』我隔離既芷螢好無聊咁回應

『提起精神啦!你兩個!今日第一日返學咋,你地應該向鄭青琪學習。』Miss lee非常有朝氣咁講

『咁呢到就會變街市嫁啦老師。』阿kay即刻講

全班哈哈大笑,我當然都笑埋一份,

但隔離個個陳芷螢…應該係全班唯一一個無笑既人。

我又嘗試同佢講野…「恭…恭喜哂喎…芷螢同學。」

『女班長有乜恭喜…咪又係麻煩工作無人做所以搵正我黎攪,哼。』之後又將個頭另埋一邊…

怪人。
 
最後選埋財政 (阿kay做,我對班會錢既安全程度深感懷疑)
同埋其他職位之後 (都係由我唔識既人做),而家又變左半自由時間

因為我同表妹佢地隔得幾遠,所以無得同佢地傾計…
邦彥好明顯無聊得濟訓左,而坐我隔離個個…唉,唔好提。
所以我而家成為左一個孤島。

啊啊啊…

『喂妳真係澳洲返黎?』芷螢無啦啦聊我講野,但個頭都係望住走廊

「係…係啊…」

『有無睇過艾爾斯岩?』芷螢問

艾爾斯岩?乜野黎嫁…但為左唔穿崩…我一於講大話...「有…有啊…」

『嗯…』芷螢若有所思咁諗『真係羨慕啦…』

「其…其實都唔係好特別姐…」雖然我唔知係乜黎

『妳唔可以咁講!』陳芷螢好激動,將個頭控埋黎『喔!』之後又縮返去

下?面…面紅?啊…啊!唔怪得妳咁面善!

「啊…我醒起妳啦!妳就係個晚係海旁…啊唔」之後我個口就比佢禁住…

『唔好咁大聲啊!』陳芷螢禁住我個口係隔離講

我點點頭,希望佢可以鬆手,之後芷螢就放手。

「妳就係個個小影…女…女女同好…」我細細聲講

『都話左妳有個好深既誤會囉…』芷螢好無奈咁講

而家望返眼前呢個人,因為著左一身女裝校服,又無帶鴨嘴帽,
長頭髮既佢扎左個馬尾,同個日男裝打扮既佢完全唔同,唔怪得岩岩唔認得佢…

「係乜誤會呢...」我警戒性問一問

芷螢load一load『我唔直接去答你,用例子答...』

原來係絲打?