82.


「但…消滅人格…果然都係搵心理醫生最好?」我提議...

『妳覺得咁對紫晴係最好?』冰瑤望住我『更何況咁做只會迫虎跳牆…』

「妳岩…」

冰瑤嘆一口氣『我暫時只係諗到兩個方法…』



「即係…?」

『其中一個…係較長遠既方法…慢慢一點一點去改變紫晴本人…
令到紫晴本身唔再咁被動,學識主動做人…咁偽紫晴就唔需要存在…』

呢個做法令我諗起潛行凶間…但我唔係里安納度,亦唔係Dom Cobb。

『呢個做法既麻煩…失敗率又高…』冰瑤難得地幾苦惱。



「咁…咁另一個方法呢…」

『另一個較簡單既方法…就係妳一直唔想做既野…同紫晴一齊。』


『同紫晴一齊,真心同佢一齊,咁就可以達成佢既心願…咁偽紫晴就無存在既理由…』

「呢個…」呢個其實真係好方法...但係...「我真係唔清楚…可...可唔可以比d時間我考慮下…」

『嗯…』



*

時間返去我同偽紫晴既對峙…

「如…如果…我決定同紫晴一齊…妳…妳係唔係可以放過表妹…」

『若果家蔚妳表現好既話,或者我可以考慮下哦…』

「如果係咁…我...」

『但咁樣…就好似我有意威脅家蔚妳咁,我會唔好意思哦…』

「唔會…呢個係我自願…我自願咁做…」



所.以.呢?』偽紫晴個樣非常高興…

「但有d野都要慢慢黎…要我突然就同紫晴成…成為…情…情侶…」

『呵呵,當然哦…我啊…應該係紫晴先岩…會同妳慢慢發展…』

「然後…先一齊…都唔遲…」

『就咁話。』而家既偽紫晴就好似岩岩食完滿漢全席一樣,超級滿足。

「嗯…」我dup低頭…就岩岩,我好似好似賣左我自己咁。

『啊!』偽紫晴大嗌『我好開心哦…我相信紫晴都係…』

「咁…妳係電話講過既野…話食…食左我…」我再講唔到落去…



『嘿』偽紫晴邪邪一笑『呢個當然都係慢.慢.黎哦。』

咁就好。

「咁妳應該將意識交比紫晴啦…」

『喔,我要搵個位坐底先…唔係我驚紫晴又好似上次咁暈低,壞左大事。』

然後我同紫晴就行去附近既一張木椅…
一切都好順利…冰瑤…

計劃就係咁,同紫晴慢慢開始關係…然後從而改變紫晴…
由簡單同困難方法組合一齊,得出既結論…
一切都係妳計算之內,冰瑤。



「紫晴…妳醒啦…」我同躺係木椅既紫晴講…

『家…家蔚…』紫晴水汪汪…笑得好開心…『我…我好似發左個好開心既夢…』

「咁就好。」我笑一笑…

之後就靠我了。
 
就係咁,我同紫晴就開始左所謂既”慢慢發展”…
但由於都係開學週,所以都未有機會進一步發展…

見到表妹一直都唔係好快樂,我真係好想...話比佢知所有野…
包括我知道表妹同臨記假拍拖,紫晴有雙重人格,同埋我要同紫晴暫時一齊…



所有所有…

但係…

『妳覺得咁樣真係好事黎?』冰瑤係電話到咁講

「更…更係!我唔想瞞表妹…佢…佢為左我…已經受左好多傷害…」

『我只係覺得…妳同表妹講左,同違背左偽紫晴既約定係無分別…』

約定...即係偽紫晴既底線 「但…但係…」

『而且…妳覺得妳表妹守到秘密?我指唔係由言語…係佢既表情同情緒…』

無錯,冰瑤講得好岩…表妹…從來都係將自己既感覺表現出黎…
唔識去掩飾自己既感覺…

表妹…

『所以…』冰瑤見我無講野,就接住講『妳就忍耐下啦。』

「嗯…」

*

望住專心聽書既表妹…我唯一可以解救佢既方法…就係盡快消除紫晴既人格…

話咁快就到星期五放學。

『去行街囉行街囉!』阿kay好興奮咁提議…

「唔得啊…阿kay…今日要去紫晴到溫書…」

『耶!又係咁,可惡啊,一個二個都係咁!』阿kay指既第二個應該係表妹佢地
『哼,我自己搵人!』

「阿kay…唔好再做出租女友啦…」我有d擔心咁講

『得啦得啦…我答應左妳表妹唔會再做就唔會再做!拜啦~』

阿kay走左之後,得返我同紫晴…

『咁…咁今日我去家蔚妳屋企?咁…咁好似安全d…』紫晴dup低頭講。

我心諗,偽紫晴發起癲上黎去到邊都一樣姐…但係今日…

「今日我唔想溫書…」我望住紫晴講「去行街休息返一日啦...就我地兩個。」

『家…家蔚…』紫晴怕怕羞咁望住我,非常可愛『嗯!』

或者…約會就係咁?
 
所以,我地各自返屋企換完衫之後,就約返係地鐵站等。

當然,事前我就做足功課…
上網研究定約會應該會去既地方…

「紫晴?」雖然係咁,我地有d緊張…話哂第一次約會喎!仲要係同靚女…

咦?但其實我自己都係靚女…
有時自己已經開始覺得見怪不怪...是咪悲哀…

『係…係?家…家蔚..』紫晴都非常緊張

有時都覺得偽紫晴有樣好,就係大膽,乜都唔驚…
紫晴如果妳可以學到偽紫晴既呢點就好…當然…其他野就唔好學!
包括…迷…迷暈...綁...綁人...

「我…我地去睇戲囉?有套戲…其實都幾有興趣。」

『好…好啊…』

唔係動畫,唔係驚懼片 (睇戲自虐為咩呢) 而係上畫無耐既情約一天。

同女仔睇戲睇愛情片是常識吧!

套戲主要係講男女主角呢對密友約定左每年只見一次…
介乎係友情同愛情之間…呢種咁微妙既關係…
過左大半人生先發現最愛既人其實一早已經係身邊…可惜已經錯過左…

睇唔到差唔多尾段我見到隔離既紫晴已經喊到七彩…
我…我就深深比呢套戲感染到…

總覺得呢套戲…有一種熟識既感覺比到我…
明明相愛…但最後唔可以一齊…