92.


「唉…尷尬死。」阿kay為左同我養聲,專登又走左去幫我買枝蜂蜜飲料。

到底點解我會咁情不自禁呢…唔通無食藥就係咁…

『喂。』突然我後面有把熟識既女聲,我向後望一望。

冰瑤。


 
「冰瑤…點…點解妳係到既?」我好錯愕

咁岩岩我既一舉一動,咪比冰瑤睇哂…啊…好尷尬啊…

冰瑤慢慢行落兩級,坐係我隔離,佢已經換返便服

『因為,kevin間學校同呢間學校係敵對關係,所以專登叫我黎睇下敵方情報啦。』

「點解佢唔自己黎?仲要專登搵妳黎睇…」



『都話明係敵對關係,咁佢地班人就自然認得kevin嫁啦,而且佢今日都好忙。』

「但係冰瑤妳熟足球嫁咩?」

『我…』冰瑤難得地有小小面紅『玩遊戲玩過啦…而且都成日睇kevin既比賽。』

「但叫個唔同學校既人幫佢睇敵人情報,而且仲係女朋友,呢件事真係好奇怪囉。」

『唔好講呢樣,妳今日食左藥未?』冰瑤問



「下…我…我今日無帶。」

『記住…隔三日食一次…岩岩妳…』冰瑤望住球場邦彥所在既方向『邦彥…妳鍾意佢?』

「我…我邊有喎…佢…佢佢…係同班同學…所以…所以…」冰瑤咁直接既問法令到我語無倫次…

『妳覺得妳昆到我?』冰瑤又直接講『妳岩岩既表現…』

「唔好講啦…」我捉住冰瑤既雙肩…「真係…朋友…朋友咋!」

『其實我知道家蔚妳都係身不由己…』

冰瑤咁樣退一步,令到我有d意外,平時既佢一直都係步步進迫…
或者就因為咁,所以我先覺得可以將我既感覺講比眼前呢個冰瑤聽?



「其實…咁我…我…係有少少在意佢啦…但女仔…在意…男仔…唔係…好平常咩…」
我扭扭捏捏將感覺講出黎,紅都面曬。

『果然係咁。』冰瑤笑一笑,非常滿意『原來有時講野婉轉d都有用。』

下?原來妳贓我!女人果然好可怕!

『我只係怕家蔚妳忘記倉庫發生既事咋…』

「倉庫既事…」一言驚醒夢中人「…我同樂宜…互相既告白…」

我望一望球場…但我而家…但我而家…

根本就錯哂。



望到我個樣,冰瑤拍一拍我肩膀…『睇黎妳明嫁啦,有事就打比我啦。』之後就轉身離開。

『表姐?個個係咪妳細妹?』抱胸夾住兩杯蜂蜜綠茶既阿kay一返黎就問

「嗯…」我點一點頭「佢又黎點醒我。」

*

足球選拔完之後,我搵左個機會洗開左阿kay單獨去搵邦彥。

「邦彥…」夕陽西下,我充滿決心望住飲住寶曠力既邦彥

『家…家蔚?』邦彥有d驚訝咁望住我…『多謝妳岩岩咁支持我…』



「等我幫你…」我鼓起勇氣…

『幫我?』邦彥放低抹汗既毛巾望住我

「等我幫你!將陳芷螢追到手!」我終於講出口

下定決心,一不做二不休,要做就要狠心去做!
 
『幫我…追陳芷螢?』雖然邦彥背住夕陽,但睇得出佢個樣有幾分驚訝

「嗯…其實我…我已經知道邦彥…你在意既人就係芷螢…」

『嗯,無錯,但係…』邦彥照直咁承認…令到我內心心處有d唔舒服…『點解家蔚妳會打算幫我…』

個理由好單純又白痴,就係只要邦彥你有左女朋友…


咁我就只能放棄,咁我就唔會再對你有感覺,一心一意對表妹…
所以我先決定幫你…但呢個原因點可以同邦彥講喎!

「我…我…」我醒起黃道輝,靈機一觸「如果邦彥你唔再行動,芷螢就會比黃道輝搶走嫁啦!」

邦彥瞪大眼望住我…睇黎我果然講中左佢既要害…

『嗯…黃道輝…的而且確…』邦彥若有所思咁講『但都無理由要家蔚妳幫我…』

「邦彥!」我向前行兩步,點都…點都唔可以放棄「你之前都幫左我咁多次…就等我幫返你一次咁多啦!」

呢個係事實…
動漫節幫我趕走狗衝既毒撚,海旁借個身體比我喊,之後睇相簿令我明白到表妹有唔對路…
每次每次,都係關鍵時候幫到我,所以…或者我對邦彥你有感覺,係一點一點累積而成…

但係,我已經有表妹,所以,陳家…陳嘉為今日就要下定決心!

「而且啊…我有好多經驗嫁…一定幫到你!」

呢個就係大話,作為一個原毒撚邊有經驗可言。
但我從冰瑤身上都學唔小野既…一定有用!

『咁…』邦彥個感覺就係唔好意思推左眼前人既好意『嗯…靠妳啦,家蔚。』

「包係我身上!」我拍一拍心口。

『但係家蔚妳打算點做?芷螢佢…一直都只係當我朋友…』邦彥淡淡咁講

「比d時間我諗下,一有辦法我就黎搵你啦!」

好多時都係我比人幫,而家變左由我去幫人…真係好奇怪。

同邦彥講完拜拜之後,我就會合返阿kay,樂宜而家係佢隔離。

『家蔚妳岩岩去左邊?』樂宜瞇係雙眼望住我

「我…我岩岩肚痛啊…」我睜返樂宜轉頭「M.到.嘛。」

樂宜即刻唔好意思咁另埋一面,我得到一次久違既勝利。

*