93.


樂宜送完我返屋企 (記住沖涼朦眼啊!)
我隨隨便便除完校服之後,得返內衣褲咁就躺係床上面…

終於都做左,諗返起真係好衝動,但要忘記一個人就唯有咁…
我相信冰瑤,樂宜知道都會好支持我…

而家諗返起,呢個做法令我聯想起某套動畫,


但我唔係西園寺世界,邦彥唔係人渣誠,陳芷螢亦都唔係桂言葉...

無事既…嗯。
 
一路沖涼,就一路回想更今日發生既事,眼眉跳都唔係無道理,
M到會喉嚨痛相信會成為學校既七不思議事件,
仲要幫自己在意既人追第二個人,我估現實世界得我會咁做,

不過最差既事應該都係咁嫁啦,唔會再發生,嗯。



沖完涼之後,我開著部電腦,希望可以搵下d追女攻略,
身為男仔個陣並無去睇呢d,等而家變左女仔先睇,諗起其實真係幾奇怪。
我上上下網,msn有人搵我,係樂宜。

(衰人你關左電話?)

(吓?無喎…)

我電話基本上24小時長開嫁喎。



我拎返校服裙入面部n73…無電。
睇黎部電話用左咁多年都係時候換?
買部iphone4好無呢…而家好似個個女仔都帶一部咁…

但我又邊有咁多錢喎,老豆辛辛苦苦係上面打工既錢先係夠我平時生活用。
而且琴日仲買左一堆衫比樂宜,而家分分鐘要食杯麵度日。

(原來電話無電啊)

(快d叉好佢丫,我要同你傾計。)

(係既...)

一幫部n73叉電,開返著部電話,即刻顯示左幾個未接來電。



表妹,表妹,表妹,老豆…?

老豆?

我記得老豆無重要事情都唔會打比我嫁喎,到底攪邊科呢…
我見到老豆仲留埋言…我而家把聲咁樣費時打比佢啦…

『衰仔!你學校班主任打黎話你休學呀!到底發生乜事!?
電話又唔通!總之一聽到留言即刻打返比我!衰仔!啪!』



大鑊鳥。
 
 


而家我地係附近一間老麥,冰瑤,樂宜都係到,
一見面我就即刻將老豆件事講比佢地知…而家我部n73仲係維持關機狀態。

『所以…妳就咁急搵我地出黎?』冰瑤問

『呢件事真係好嚴重丫…』樂宜望一望冰瑤,露出擔憂既神情

『真係百密一疏…』冰瑤咬一咬手指…『嗯,不過大概都唔麻煩既…』

「下?」唔通係冰瑤眼中,又係一件錢可以解決既事?

『仲之,聽日下午放lunch個陣黎學校附近個個公園,到時所有野都可以解決。』冰瑤好有信心咁講

唯有相信妳…冰瑤。



『係喎,咁家蔚妳同邦彥…』冰瑤突然問…

「下?我同佢…」我見到樂宜即刻瞪大眼望住我…

『我仲記得個日係餐廳…家蔚…你唔係真係鍾意左邦彥嘛?』樂宜有d不滿咁問
『你明明…個日…倉庫…仲…』dup低頭。

「所…所以我已經下定決心。」對住眼前兩個關心我既女仔,唯有將事實講出黎,
「我要幫邦彥追到芷螢,當邦彥有左女…女朋友,我就無理由再對邦彥有非份之想…」

『家蔚…』樂宜聽完即刻眼濕濕

『哦?』冰瑤即係嗤之以鼻『咁家蔚妳打算點幫呢?』

「今次我打算自己黎。」我同冰瑤講「唔洗妳幫手…」



『嗯…』冰瑤露出少少既失望『不過我同樂宜可以一邊監視妳可?』

「下?真係咁唔信任我?」我有d難以置信。

『家蔚…』樂宜扭扭捏捏『我都想信你…但…但係…我真係放心唔落啦…』

我估樂宜係諗起我餐廳個日對邦彥做既事。
不過為左表現我既決心,同旁邊有人得閒點醒我都係好事黎既…

「就咁話啦…」我嘆一嘆口氣。

『『嗯。』』兩個女仔同聲同氣。

『咁就講到呢d先啦,我要去搵kevin準備野。』冰瑤企起身講

「冰瑤妳打算點解決呢…我老豆件事…」我望住冰瑤問

『秘.密。』冰瑤單一單眼『不過越有挑戰性我就越興奮啦,拜拜。』

「拜拜…」我望住冰瑤既背影,又多左件事將來要報答佢。

『家.蔚。』樂宜瞇起雙眼『你唔會鍾意上冰瑤嫁可。』

「點會呢!」我好大反應「冰瑤係女仔黎嫁嘛!」

咦?又好似講錯野…

『家.蔚!我都係女仔啊!』所以樂宜今次真係比我激到…
 
第二朝,樂宜又係好早就黎到我屋企。

『表哥你記得帶體育衫可?』樂宜問我

「有…有…」體育堂係食飯之後,希望lunch真係可以解決所有事…

然後我就可以用平靜既心情欣賞下…天堂既美景…呵呵…

『表哥你…』樂宜望住我,又瞇起雙眼『絕對唔洗指意。』

「下?樂宜妳幾時又識讀心嫁!」

『表哥你個衰樣已經現哂形...呵呵...
我已經幫表哥你諗好計仔,等你無得偷睇我地換衫。』樂宜挺起胸膛講

樂宜妳既計劃同冰瑤好唔同,一d都唔可靠。

『而且呢,我地班女仔好猴琴嫁…話唔埋你換衫個陣會不段玩你個胸…』
表妹斜眼睜住我個胸『一陣玩爆你個胸就唔好啦。』

眼前呢個,係因為無胸比人玩所以相當有怨念既女仔王樂宜。

睇黎天堂都係同我無緣,嗯。

時間一轉,到左lunch。

樂宜用左個『我同家蔚要同親戚食飯,所以今日唔陪你地啦~』相當勉強既藉口。
然後好快我地就到左公園,冰瑤已經坐左係水池隔離,佢隔離有個大袋。

「所以呢…」我同樂宜一坐低就問。

冰瑤打開個袋…有部macbook,同一個不明既機器,再加一枝咪既物體。

『變聲器。』冰瑤直接講『首先呢,我地一定要知道班主任因乜事打比妳老豆,
所以就要靠妳打比妳老豆講返件事,順便話佢聽你根本無休學,所有野都係學校攪錯左。』

「咁如果老豆唔信呢?我覺得呢個可能性真係好大。」

『咁到時就比個電話我。』冰瑤講『我同你老豆講。』

哦。