94.


之後我地就開始調音既環節。

『家蔚妳仲記得自己男仔個把聲可?』冰瑤好奇咁問

「我諗…記得掛…其實我都唔知…要試下…」老實講,我腦海又好似有印象,但又好模糊...

『咁妳表妹係到最好不過。』冰瑤望住樂宜



『嗯…我一定記得…』樂宜面露出淡淡的紅『記得表哥你把聲…』

樂宜淡淡既一句,真係百般滋味在心頭。
 
「樂宜…好彩有妳。」我同樂宜講

樂宜有D驚訝咁望住我『家蔚!我...我講過我永遠都會幫你嫁嘛!』

結果,用左大約十五分鐘,終於調到把好相似既聲…



「喂…喂喂…我係陳嘉為…我係陳嘉為…係呢把聲啦…大概...」

雖然把聲總係有小小違和感…但其實已經係好相似...
我開始有一種好熟識既感覺浮現上黎…呢個係我把聲…我男仔個陣把聲…

『準備好未?』冰瑤問我

「嗯。」



我就一手拎起n73,另一手拎實枝咪…
之後開始打老豆既大陸電話…真係呢世人第一次打電話比屋企人係咁緊張…

通話原理就係咁,打完電話之後部n73就比冰瑤拎住,佢就放一部機仔係n73隔離,
之後只要我對住枝咪講野,部機仔就會出左我把聲,
至於我點聽老豆把聲呢,就更係用耳筒啦。

等左一陣『喂!衰仔!』老豆一聽電話就即刻講『終於肯打黎啦?』

「係…係啊…係呢…老豆你呢期點啊…身體好嘛...」我好緊張,有少少口窒窒

『點?點?更係比你激死啦!你好快趣同我解釋!學校點解會打比我話你休更學?』

「老豆?解釋乜野先…我啊…我都無休到學…」



『無學校又會打黎?衰仔!而家我趕更工程走唔到咋,唔係我一定返黎打死你!』

「老豆…你聽我解釋先啦…真係無呢…唔信…唔信…
我叫個人同你講啦…」我望住冰瑤,佢點點頭。

之後冰瑤就放低個機仔,除埋個耳機,聽電話。

『喂世伯啊…知唔知我係邊個呀…文冰瑤啊…』一聽電話冰瑤就即刻講

真係奇怪,老豆應該無見過冰瑤嫁?
除左…開學日呢D可能會見過而我唔知到啦…

『哈哈,過得幾好啦…讀書都唔錯…』冰瑤同我老豆談笑風生

我同樂宜都一面錯愕咁望住冰瑤,睇黎樂宜同我一樣都覺得眼前既事不可思議。



『唔會!點會呢!嘉為點會有休學喎,我日日都同佢一齊我最清楚啦。』

嗯,原來係咁,以女班長既名聲證明我無休學。

『哈哈,其實你個仔都幫左我好多啦…』

…睇黎進展好順利。

『點解?點解你個仔係我隔離?啊…』冰瑤望住我

係囉,一個內向既小毒撚同一個女神級既女班長,點會lunch出去食飯,
老豆睇黎問左個好難既問題…嗯,根本就無可能…

我好擔心咁望住冰瑤,但冰瑤只係load一load,笑一笑…然後。



『嘛~世伯...因為我係佢女朋友丫嘛。』
 
「下」『咩話!』我同樂宜即刻作出反應,叫得非常大聲。

冰瑤即刻用一個叫我地唔好出聲既眼神望住我地。

『哈,無啦…餐廳多人嘛…世伯。』冰瑤急忙補鑊。

...玩咁大?
雖然…男女朋友一齊食飯係好合理既事…但係但係…

『喔。』冰瑤又望一望住我『無啦…嘉為對我好好啦…好啦…我叫返佢聽…』

插返耳筒,又到我行動。



「喂喂…」

『衰仔,估唔到你咁本事識到個好女仔喎…』老豆即刻講

「哈…哈哈…」我望住冰瑤「係幾本事嫁。」

『既然小瑤咁講我就放心啦…即刻真係學校講錯啦…』

小瑤?What the ?

「嗯,我一陣返學校問返阿sir點解會攪錯…唔洗老豆你操心啦…」

『咁就最好不過,我而家真係好忙,食飯都無時間。』

「嗯,就咁話啦…」

『估唔到我個不肖子竟然識到個好女仔…你阿媽在天之靈一定好開心…』

「嗯…嗯…」老豆又開始長篇大論了。

『你記住對人地好d啊…如果比我知道你對小瑤唔好,我一定趕返黎打死你!』

「嗯…我明啦…我明啦…唔講咁多啦老豆…我個豆腐火腩飯到啦…」

『記住夾幾舊比小瑤食啊!而家做人男朋友就唔可以咁自私!』

「得啦長氣…拜拜啦…」之後收線。

『所以你無問到點解學校會打去搵你老豆?』一收線冰瑤即刻問

「仲好講…妳…妳岩岩咁樣一講令到我完全不知所措。」我抱怨咁講

『呵呵,咁幾好玩啊…』冰瑤笑笑道『而且咁樣我既證明先有公信力。』

『係玩就好啦!』樂宜望住我地兩個『千…千其唔好黎真…』

「樂宜咁妳完全可以放心…冰瑤心入面只有kevin一個,係可。」

『嗯…或者啦…』冰瑤壞壞一笑

「等我仲專登幫你解圍!」

『呵呵,咁而家轉個對象啦…打比班主任。』冰瑤繼續講

「唔明…」

『基本上當初幫家蔚妳攪休學個陣一齊都準備好哂…
應該係突然有d資料性既野要問返你或者你老豆,咁如果由你本人去解答一定係最好不過。』

「咁老豆個邊…」

『呵呵,等你解答完,再用變聲器扮班主任聲打返比你老豆話攪錯咪得囉。』

真係好冒險…但事實上都唯有係咁。