99.


送樂宜返屋企既途中,我地都無講到野…因為我仲係諗更芷螢既事…

芷螢...佢真係好堅強。

就算係我,用十六年男性記憶去對抗呢兩個月女性既記憶都有難度…
更何況一個無左十三,十四記憶,有印象個陣自己已經係女仔既佢…



佢呢兩年到底係點生活?我真係想像唔到...亦唔敢去想像...

如果我…都係無左男仔個陣既記憶,或者我唔會考慮咁多…以女仔既身份重新開始…
反正,男仔個陣既記憶又唔係咁值得懷緬…

「樂宜…」就快到樂宜屋企樓下,我終於開口

『家蔚?』樂宜好似一直都等更我開聲一樣

「如果我…我失左憶…無哂男仔時期既記憶…得返女仔既記憶…」



『咁…』樂宜放開拖住我既手,跑去我前面,再另轉身望住我

『我一定會努力幫家蔚你記返起所有野…就算記唔起…永遠記唔起…
我都會令妳愛上我…即使你係女仔!我要證明比其他人睇…我對…我對…我對你既愛超越所有野!』

我微微一笑,我同芷螢唔同既,就係有一個對我不離不棄既人…

芷螢…或者妳就係需要一個咁既人?



如果妳肯打破妳既執著…邦彥…佢會唔會係妳想要既人?
 
*
 
返到屋企,即刻沖個靚涼,然後躺係床上面…
玩左成日真係好攰…我估應該好快就會訓著…嗯…

閉起雙眼你最掛念誰眼睛張開身邊竟是誰~

…邊個咁夜打黎呀?

阿kay…

「阿kay?咁夜既…」



『表姐,嘻嘻,我就估到妳未訓嫁啦!』

其實我差d就訓著囉唔該。

「係呀…」順帶一提,今日去迪士尼一事係無同阿kay講過。

樂宜,冰瑤就一定唔講,同邦彥都提過下;至於芷螢,反正佢同阿kay都無交流。
所以應該好安全,如果比阿kay知道一定好大鑊。

『係啦…我租左幾隻電影…想…想約表姐妳聽日上黎我屋企睇啦…』

睇電影租碟,乜野時代呀?上fxzone,5p,pkdiscuss一堆有得dl啦…
但諗諗下,上次同紫晴睇完戲之後都好想再睇下其他戲,都唔錯既…
而且一班人睇氣氛都會唔錯…講起一大班人…



「樂宜…紫晴會唔會去?多d人熱鬧d…」

『喔!而家咁夜…』阿kay越講越細聲…『我…我會問埋啦…哈哈…』

「嗯,就咁話啦。」

『嘻嘻,聽日見啦!』

*

「所以…得我一個?」第二日,去到阿kay屋企門口,阿kay向我道歉…

『係呀…對唔住呀表姐!』

聽阿kay既解釋,紫晴就話要陪屋企人,而樂宜呢,就話遲d到…



有我係到樂宜會遲d到?我對呢個講法深感懷疑…

「不如等我打比樂宜…」

『啊…唔好呀表姐。』阿kay禁住我個手機…
『睇…睇左一套先啦…有套鬼片我唔敢同樂宜一齊睇呀…實會比佢笑…』

「阿kay唔通妳…驚睇鬼片?」

『嗯…』阿kay點點頭

又要驚又要睇,人就係咁矛盾。
 
結果阿kay播左套午夜來嚇 (從包裝,明顯係老翻),基本上我就無比套戲嚇親啦…而係…



『嘩!嘩!』比阿kay既大嗌嚇親。

阿kay側側身,用雙手攬著我隻右手,成身都震哂…而且仲有d面青青tim
何苦呢。

「阿…kay…」

『嘩!』阿kay嚇一嚇,望住我『表姐妳做乜成隻鬼咁叫我個名喎…衰人衰人!』


為左形做氣氛 (阿kay叫既),所以個廳落哂窗簾,所以而家個室內環境係非常之黑。

『嘩…表表表姐...妳睇唔睇到呀…岩岩有黑影掠過呀…嘩…好驚呀…』

咁有無野卡住攝錄機啊?

*

『表姐妳好似唔係好鍾意套戲咁既…』播完套戲之後,阿kay悶悶不樂咁問

「唔係呀…套戲幾好睇呀…」如果唔係妳係質邊係咁大叫既話…

『咁就好啦…嘻嘻…下套囉,表姐飲唔飲d野?』

「唔洗啦…哈哈…」我係袋到拎起個水樽…「我自己有帶水…」

自從偽紫晴個次之後,我講過以後自己帶野飲,我記得嫁。

『車~我仲見樓下阿信屋平掃左一堆可樂tim。』

「可樂?」諗起上黎我都好耐無飲過「唔係zero嘛?」

『更係唔係啦…zero都無味既!』

嗯,罐裝應該ok既…「咁比罐我啦…我自己開就得…」

『嘻嘻,等陣啦!』

開左罐可樂,飲左啖…啊…果然可樂原味先係最好,遺憾既唔係82年百事!

『好啦…到下一套…』之後阿kay又拎起第二餅DVD

「又係鬼片?」

『唔係啦!鬼片睇一次就夠啦…呢套係劇情片。』阿kay搖一搖手上面名叫127小時既DVD…

「咁都好d…」我望一望封面,個演員好似叫占士法蘭高,幾靚仔嫁…笑容又迷人喎...

『嘻嘻,其實表姐妳都係驚恐怖片既...呵呵…』阿kay一路笑一路入餅碟。

「我…我先唔驚啦…」只係怕再睇恐怖片會比妳嗌到耳膜穿…

之後套戲就開始。

一開始就有個靚女坐係梳化上面,有人用日文問佢問題…
喂?字幕呢?無字幕都算啦…點解係日文?我記得個封面係男人黎嫁喎…

『奇怪啦…』阿kay都一臉好奇望住螢幕…

一路問條女都一路笑笑口,唔知問左幾耐之後,場景就轉左,變左條女同拍片個條友係餐廳食飯。
食飯?我記得呢套係遇難片黎嫁喎…

食完之後,條女就帶左拍片條友係街到周圍行,最後去到一個類似酒店大堂既地方…

咪住…呢d劇情咁熟口熟面既…

「阿kay…妳呢d DVD係邊到黎架?」

『下?』阿kay好專注望住套”戲”『係小藍借比我嫁,佢極力推介我睇呢套…』

然後鏡頭一轉,就係個女同拍片條友入左間套房,之後…

條女開始除衫,

無錯,開始除衫。
 
眼前呢套127小時,絕對唔係講一個男人被困深谷爭扎求存同生命搏鬥既感人故事,
而係講更一個女人如何同一個或者n個男人進行深度交流既愛情動作片…

咪即係A片!