116.


『家蔚有無聽過星期六既足球隊友誼賽呀?』第二日食更飯(正確d係沙律)個陣,小藍突然問。

「我…我聽過下…」係邦彥到…嗯...

『下?聽過下?阿kay無約妳咩?』小藍另轉頭望住阿kay…

『我…唔記得左。』阿kay講



『咁一唔一齊去呀?家蔚…我地差唔多半班女仔都會去睇。』小藍講

原來邦彥講既係事實,班入面真係好多女仔會去…
咁我去…都唔奇怪姐?

就好似之前選拔咁,係為支持而去,無其他原因既,嗯。

「好呀…咁…咁我就一齊去…支持我地學校!」



嘻嘻…

『咁就好啦,有多個靚女支持我地學校表現一定會好D!』小藍講

阿kay就無任何反應繼續食野。

『係呢,小藍…』坐小藍對面既阿麻講『妳覺唔覺得呢,今日班男仔好古怪。』

『班男仔古怪?』小藍不解咁問『講開又係,我見到阿明同阿強今日好似水火不容咁。』



阿明同阿強…好似係琴日小息同我傾計既兩個人…

『係囉』阿麻好失落咁講『唉,佢地原本老死黎嫁嘛,
聽講琴日放學佢地打左場大交,之後比訓導捉左去罵,之後今日就咁。』

「因乜事打交?其實我見到佢地琴日小息已經有d唔妥…」我諗起琴日,佢地係我面前推黎推去

『唔知呢…我只係知我既好素材…嗚嗚』阿麻非常唔開心咁講

「素…素材?」我完全唔明阿麻既意思

『家蔚妳唔知啦…阿麻呢…係正宗既腐女黎!』小藍講『阿明阿強呢對組合就係佢既主要素材。』

『腐…腐女萬歲!』阿麻一聽完反而表現得好自豪『我相信而家只係阿明佢傲嬌姐!嗯!』



…講開腐…「咁…咁阿麻妳係咪有睇開世界一初戀呢d...動畫嫁?」

『更係啦!神作點解唔睇喎!而且同人本我都收齊呀,家蔚妳咁講即係都有睇開啦,
唔通,唔通家蔚妳都係腐既一員!?好耶,有人可以比我分享啦!!!』
阿麻源源不絕咁講,連隔離台既人都望過黎,投以不滿既目光。

「我…」早知唔提套野「我只係睇過一集姐…」其實我一直都有追開「之後都唔…唔得閒…」

『下!一定要睇哂佢啦!』阿麻繼續講『聽日我借成套第一季Blueray比妳!』

「哦…哦…」

Blueray...即係會有特典啦...而且畫質又會好d喎,到手之後一於睇多次先!
 
隔離既小藍只係搖搖頭『講開又講,其實唔指呢對,我見班入面既宅男都好唔妥。』



『係呀…我見到佢地成班人今日好似生意失敗咁,見到就嘔心啦。』呢句係阿kay講既

『嗯,特別係凡士林,聽講佢告白比人拒絕左。』小藍講

下?我拒絕阿林件事咁快就通左天!?

『下?同人告白!?』阿麻好興奮咁講『係咪男仔?』

『唔係,女黎既。』小藍向失望既阿麻笑一笑

『車,仲以為同佢既宅男朋友告白tim…』阿麻講

『宅男總會有個女神的…而唔係男神。』小藍講



「咁…咁呢…」我有d緊張咁問小藍「知唔知…個個女仔係邊個?」

『唔知呀…我只係從線人到知道佢告白比人拒絕,至於係邊個佢就死都唔肯講…』小藍帶怨恨咁講

到底邊個毒撚咁衰仔出賣阿林!?
但好好彩既係,佢無爆到阿林告白既對象就係我呢件事…算係不幸中之大幸。

『但佢都講左拒絕既原因。』小藍講

「唔係掛?」我好激動咁望住小藍

『係…係啊…哈哈…家蔚妳咁激動既?』小藍問

「無…我只係好奇點解妳個線人肯講咁多野姐…」



『哼哼,我只係比幾張自拍照佢之嘛,就乜都肯爆出黎囉,除左個人名啦...
佢話係同凡士林既友誼約定,所以先唔肯講。』

都講左拒絕原因啦!唔講人名都改變唔到個個毒撚係二五仔呢樣野!

『咁拒絕原因呢?』阿kay問…

『聽講係個女仔有鍾意既人,個個人真係講妳地都唔信呀!』

『『邊個?』』阿麻同阿kay同時問

唔好講出黎呀...小藍...
就算講...都一定要係錯既資料呀…

『邦彥。』小藍始終都係講左個我最唔想聽到既名。

唔...唔好啊...

『竟然!』呢個係阿麻既反應

『嗯…』阿kay即係語重心長咁嗯左一聲…

無啦無啦…知道左係邦彥既話…咁好快都會知道告白對象係我…

唔制呀…
*
 
放學,我拾更袋個陣,邦彥又戳一戳我背脊…

『家蔚,星期六個度,諗成點?』邦彥問

「我…我…」我臨急臨忙望一望周圍,好彩,班女仔已經走哂

「我諗過下,應該得既…我…我會去支持…邦…邦彥你。」

『咁就好,我去練波啦…』邦彥微微一笑,之後就離開班房。

但呢日我無即時返屋企,我上左去電腦室。

因為我記得呢,有套漫畫入面既女主角專登整蜂蜜檸檬比球員食,
一來消暑,二來可以解渴,我決定上網睇下要點整,之後去街市買。

咁星期六呢,就可以親手拎比邦彥食。
嘻嘻,佢一定會開心姐!

陳家蔚你係得既!

去到電腦室,好快睇完網上面既教學,就動身去街市買料。
返到屋企,就跟返個網既做法去做…整完就放入雪櫃,之後就等幾日…

到底成果會係點呢?哎也...我好期待!

*