117.


星期六,我好早就彈起身,因為打扮需要時間嘛!
但首先就要試下個蜂蜜檸檬既味道…

我打開雪櫃,打開裝住蜂蜜檸檬既食物盒…
甜甜既味即刻湧出黎,我拎起其中一塊放入口…
嗯…可能時間唔夠,我記得上網話要放一至兩星期…我只係四日…



不過味道都算係咁,我相信邦彥一定唔介意既!

之後我就小心翼翼放好個食物盒,
換返套堂姐睇過都話好既白色連身裙,就出門口。

*

呢日我地一班女仔約左係地鐵站等,之後一齊去球場。
我係好早到個班,果然早左三個鐘起身係岩既!



『咦?』小藍好奇咁望住我個膠袋『家蔚妳手上面拎住乜野呀?』

「嘻嘻,係秘密秘密。」我要親手係邦彥面前先公開盒野

『嗯~好可疑。』小藍講,我見到阿kay不為意咁望左我一眼

去到球場,今日溫度唔算特別熱,而且都有d雲,算係比賽既好天氣。

我地成班女仔就搵左個近我地學校球隊教練同球員後面既位置坐,
我見到班男仔已經換哂衫係到練更波。



『一定係比男仔食既野!係咪呢,家蔚?』小藍仲係追問更個盒野

「點…點會呢…」我有少少怕羞咁dup低頭

係喎!
我突然先醒起一樣野,之前一直忘哂型唔記得左…
小藍佢地雖然唔知道拒絕阿林個個女仔係我,但知道個個女仔鍾意邦彥…

如…如果我呢,只係將盒野比邦彥一個…

咁…咪同自爆無分別?

唔得呀…我唔要咁!我要諗個方法…係唔比佢地發現既情況下,
比邦彥明白呢盒野係我專登為佢而整既…



努力!fighting!陳家蔚!
 
『休息五分鐘!』教練大嗌

之後班男仔就開始返黎,當然包括邦彥啦...

『抖一陣,之後再練十五分鐘,就會開始比賽。』教練講

係時候行動!
其實呢,我啦...計劃就好簡單,就係等班男仔聚埋一齊個陣,
就扮到若無其事咁拎盒野請佢地食,
然後係小藍佢地見唔到既角度用眼神話比邦彥知係我專登為佢整既!

我見到黃道輝揮手叫邦彥同其他球員過去,應該想講d野,


係機會啦!雖然打擾佢地會唔好意思,但佢地見係我應該唔會介意既!

當我企起身,打算行落幾級個陣,邦彥就望到我
然後佢同黃道輝講左幾句野,黃道輝點點頭,邦彥就行埋黎。

『家蔚…妳果然黎左。』邦彥講,又展現出相當陽光既微笑

下?點會咁嫁?
如果變成我同邦彥兩個人講野…咁我個計劃咪…

「係…係呀。」我下意識將盒野放係背後面…但舉動太明顯比邦彥見到。

『家蔚,個盒野,係乜野黎?』邦彥問

『食物呀!邦彥,係食物呀!』小藍係到大嗌,阿kay就望住我地



羞死人啦!

但既然情況都變成咁…始終都逃避唔到既話…

我將拎住盒野既雙手,另返前…之後打開左個食物盒…

「邦…邦彥…係我親手整既蜂蜜檸檬…」我覺得我雙頰紅哂…
「希…希望可以比你同其他球員一齊食既…」

『嘩!』小藍唔知幾時都落左黎,而家係我隔離『我想食呀!』之後拎左塊放入口『好味!』

「丫!我比班男仔食嫁!小藍!」我即刻將盒野另埋一邊,不滿咁同小藍講

『小氣!明明有咁多塊,阿kay要唔要呀?』小藍另轉頭望住上面既阿kay



阿kay只係點點頭。

『家蔚…』邦彥唔知幾時已經拎左一塊,放係口到…『真係好好味。』

邦...邦彥...

「咁…邦…邦彥你呢…幫我拎比其他男仔食呀…我…我唔好意思呀…」我遞盒野出去比邦彥…

『嗯。』邦彥點點頭

「但…但係呢…邦彥記住食多d…」我dup低頭…因為我知道塊臉已經熱到可以煮蛋。

『我一定。』邦彥講完就拎左盒野比其他男仔…

邦...邦彥話好味呀...

太好啦…我既努力無白費…

好…好開心。
 
過多陣,比賽就準備開始了。
雖然係友誼賽,但我睇得出雙方既意志同情緒都好高昂。
 
加油呀…大家…加油呀…邦彥…
 
開波既係我地學校,由邦彥同黃道輝負責…
我見到遠處企係球場中央既邦彥…佢望住我…之後向我舉起個一個姆指…
 
感覺就係同我講更『家蔚,我唔會辜負妳整比我既蜂蜜檸檬…』一樣…
 
我個心…又跳得好快…
 
吹雞一響,比賽就開始了。
雖然我地隊一開始比人壓制得好勁,但邦彥一個好靚的傳球,
令到對方反應唔切,比隊長黃道輝好快就入左球。
 
「邦…邦彥!傳得好呀!」如果係邦彥你入就好啦…我好興奮呀!
 
我望一望隔離既阿kay同小藍,佢地只係望住我,
之後都各自擺出語重心長既樣貌。
 
咩喎!
 
但好景不常,過多一陣我地就比人追返一粒。
 
「唔好呀!點解咁嫁!?」
 
之後兩隊就維持僵局,半場完結。
因為下面佢地討論得好激烈,所以我就無落去比支持邦彥…
 
下半場開始,因為後防既一次錯誤,我地再比人入多球…1比2…
 
點攪嫁?
 
邦…邦彥…努力呀…唔好輸呀…
 
唔知係咪因為聽到我講野…邦彥係一次角球到將個球頂入追平…
 
「呀!呀呀!!!!!」我激動到企起身
 
『哼哼…』小藍係隔離竊笑…令到我好尷尬咁坐返低。
 
之後大家都打得好積極…互不相讓…我見到時間得返好少…
要嬴呀…大家…邦彥…入多粒啦!