128.


『咁我大概有個想法啦…』冰瑤企起身『今日就到呢到啦…我要返去整理下…聽日再傾過?』

「點解唔直接講出黎喎?冰瑤妳既想法…我…我地絕對會相信!」

『因為仲有好多問題係到…我真係要整理下,而且我都真係好攰啦…』冰瑤再講

係喎...佢地三個其實都係岩岩落機無耐...



「咁…唯有係咁…」

『咁我先走啦,拜拜。』講完,冰瑤就轉身離開
 
而家得返我地三個…我…樂宜…芷螢…
 
天已經好黑,係咪應該送芷螢返屋企呢,
如果佢真係我個女,我係咪應該要盡責保護個女呢…
 


「芷螢…不如我送完樂宜再送妳返去?而家咁夜…」
 
『唔洗啦…』芷螢企起身『我已經習慣哂…而且唔好睇少我呀…我學過柔道嫁!』
 
「咁…咁就好…但…但記住要小心呀…陌生男仔同妳講野唔好應…有乜事就大叫唔好呀…」
 
『哦…哦…』芷螢點點頭『咁我走啦…』
 
『家蔚…』有人戳一戳我背脊,係樂宜『不如你都係送芷螢返去啦…』
 


樂宜個樣…好似有小小失落咁。
 
「樂宜…」
 
『我屋企就係附近…而且周圍都好多人…無事既…相反芷螢住咁遠…』樂宜再講
『雖然唔想承認…但…但如果佢真係家蔚你個女…』
 
「就咁話啦…樂宜妳真係好…」
 
樂宜原本望住地下既雙眼即刻抬返起望住我…『行啦!唔好婆婆媽媽!』
 
所以而家就得返我同芷螢,送更佢返去…
話時話其實我都係女仔,一陣搵邊個送我?不如打比邦彥?嘻嘻…
 
「係啦…芷螢…」我問


 
『媽…家蔚?』芷螢問
 
「妳呢…平日妳食野夠唔夠飽嫁…個度好唔好住…生活費夠唔夠?」
 
咦?點解我好似真係代入左媽媽角色咁既…
 
『都…都勉強可以…』
 
「係呢,其實妳d錢點黎?妳應該無親戚會係到…」除左我…
 
芷螢妳唔會又去做出租女友呢d野嘛!?
 
『其實…我靠某人既幫助…係佢親戚開既餐廳打工…賺既錢勉強夠用…』
 


「我都記得妳講過…屋都係有人租比妳…個個人可唔可以話比我知?」
 
就好似媽媽關心自己個女既交友情況一樣,點解我會有呢個心態嫁?
 
『黃…黃道輝。』芷螢回答
 
「吓!?」我大嗌「所以…佢知道妳既秘密?」
 
『嗯。』芷螢點點頭『佢答應過會幫我守秘密。』
 
「咪住…即係佢知道妳秘密…但係又想溝妳…」估唔到足球隊隊長係gay!?
 
『可…可以咁講。』芷螢好尷尬咁講…
 
「唔得…芷螢…我睇黎要諗方法等妳可以搬黎我到住…」我接著講


 
『同…媽媽住?』芷螢好感觸咁望住我
 
「嗯…我屋企反正仲有好多位…大不了咪同我訓!我唔想妳再受黃道輝既幫助…一…一陣…無人知黃輝會唔會用呢d野做條件威脅妳…」
 
我年中睇唔少呢d人啦!傻女,妳完全係中左伏!
 
『媽媽,妳放心…』轉眼間已經到左芷螢屋企樓下
『黃道輝係好人黎,佢唔會對我點,不過如果真係可以同媽媽住…我會好開心啦…』
 
「放心…」其實要說服既人都係堂姐之嘛「妳願意既聽日就可以搬黎…」
 
『咁…咁我返上去打包…順便通知返黃道輝…走先啦…』
芷螢眼汪汪,衝埋黎錫左我臉頰一啖,就返上去。
 


傻女。
點解我真係好似為人母一樣,我十六歲咋!而家真係開拍十六歲的母親咩…
 
Ha~ 我猶豫要不要告訴你 我心裡的秘密 是我好像喜歡了你… 電話響起。
 
冰瑤?
 
「喂…?」
 
『家蔚…妳要認真答我。』冰瑤好認真咁講
 
咦?個問答遊戲仲未完?
 
「係…妳問…」
 
『妳係咪唔想再做返男仔?』
 
「下…下?冰瑤妳講乜呀…」

『上次係電話到已經察覺到妳既語氣好唔妥,但今日親身見到妳,就更加可以肯定…』

今日呢,我已經刻意扮到正常,但始終都係都瞞唔過冰瑤…

『妳唔答即係默認啦,家蔚。』

「嗯。」

『到底發生乜事,我真係想知道。』冰瑤再講

「係…係一個好長既故事…」

『嗯,我會慢慢聽,但電話傾唔好,妳先返屋企啦。』

「吓…?」

『我而家係妳屋企門口。』

*