138.


話咁快,又一星期...
我同阿彥呢,已經係學校入面公認既模範情侶,
而且我都開始習慣佢班足球隊球員阿嫂前阿嫂後咁叫我。

阿嫂幾好聽呀…係咪先?嘻嘻…
有時一聽完,同阿彥兩個互相對望之後傻笑,真係幾開心既一件事。



但高興既事都唔係日日都有既,
因為阿彥佢地既球季就黎開始,所以練習都加重左,
而且啦…因為佢星期六日都要打工,所以我地見面時間都唔係成日有。

所以呢,我啦…真係好珍惜同阿彥一齊既每一分每一秒。

點講呢,就好似努力追返…一個消失左既自己過去失去既時間咁。

嗯…



今日係十月二十一日,星期五

『所以呢,下個星期三就開始統測啦…各位都應該有努力溫書嫁啦…』Miss lee係班會時間講

誒?統測?
耶?!我完全…完全無左件事既!

「芷…芷螢…幾時講過話有統測嫁?」我問隔離既芷螢…

『家蔚…星期一呀…星期一,miss lee係放學前講過,仲有派時間表嫁喎…』芷螢講



下…下!?
星期一…點解我完全無印象既…星期一…

...

邦彥話約左我上天台,所以成個下午課我都係完全無上心…死火!

「…但…但芷螢,點解妳好似完全唔擔心咁既?連屋企溫書都無見過…」

『我…』芷螢望住我『我有溫呀…係家蔚唔為意個陣…』

呀呀丫!!!點解要咁呀呀!

唔...唔係既…仲有時間呀…其他科都溫得切…係會計…會計呢科…



*

「紫…紫晴…」某一日小息,我去搵紫晴「拜託妳啦!」

『家…家蔚?』

偽紫晴事件之後,我都有搵過紫晴補習啦…
但次數明顯係小左…而且紫晴係澳洲返黎之後就直程無左件事...

係啦,我知衰!我根本就無將讀書既事放係心啦!我一直腦海都係諗更其他野啦!

樂宜啦…芷螢啦…最重要…阿…阿彥啦…

「再咁落去我…我會計一定會炒嫁…紫晴…」



『唔…唔洗怕…雖…雖然會計第一日考…不…不過仲有時間既!』

「仲要第一日考tim,殺左我啦!」

『不…不如…今日放學我就黎妳屋企幫妳溫?』紫晴再講

「嗯,拜託妳啦!紫晴…」

而家諗返,我其實只係單純決定左自己做女仔呢件事…
但我唔知道,呢個決定所帶來既問題,仲有好多好多,

以女仔身份留係呢間學校就要應付考試,呢個係其中一件事。
 
*


 
『但紫晴咪會知道芷螢同家蔚你一齊住囉。』
lunch我地食完飯之後,我同樂宜提起呢件事,之後佢講…

「係喎…」我望住隔離既芷螢

『咁不如…』芷螢都望住我『我…我嘗試出去搵個地方訓…』

「唔洗喎…」一個女仔人家點可以出去搵地方訓咁危險!「實…實有辦法既…」

『辦法我有』樂宜講『只要大家一齊溫咪得囉…』

「咁…的確唔錯既…」我望一望前方既阿kay,佢同更紫晴傾計「但如果阿kay都去…」

『阿kay佢好重視自己既成績嫁!而且有我監住佢就得啦!』樂宜講



「嗯…咁就無問題...而且就算太夜最多咪大家一齊過夜…反正星期五…大家又係女仔…」

樂宜一聽完我感覺到佢身體chok左一chok…『係囉…就咁話啦?』

「嗯…」我點點頭。

『下!』返到班房,阿kay一聽完樂宜講就好興奮行埋黎
『一齊溫書更係好啦!我英文呀…真係唔掂嫁…但有紫晴就唔怕啦!』

我見到紫晴好似唔多開心咁,睇黎佢原本係打算同我兩個溫就算。

『紫晴唔得啦…佢要幫家蔚補會計,英文等我黎啦!』樂宜講

『下?原來表姐會計唔得嫁?我會計唔錯嫁…』阿kay一聽完即講『不如…』

但佢比樂宜扑一扑個頭,結束左話題。

我同阿彥提起件事...雖然佢今日唔洗練習,但一知道我要溫書,
佢就決定同同事調班,咁聽日或者後日就可以抽一日黎陪我,

嘻嘻…真係好!

所以,一放學我地一行人 – 阿kay,樂宜,紫晴,芷螢就去左我屋企,
唔知堂姐會唔會早返呢,不過以往績黎講,九成都唔會嫁啦。

讀書團,正式開始。

樂宜果然盡全力監住阿kay,所以佢都算幾安靜,
所以我可以專心聽紫晴教書,而芷螢呢,佢決定自己一個靜靜溫。

實在太好啦…以呢個進度…趕得切!

晚餐呢,我地就隨便係樓下茶記食d野,之後就上返去繼續溫。

嗯,其實一齊讀書感覺都唔錯呀!
以前總係自己一個讀,就算有問題都唔會成日問人,
所以成績始終上唔到一個位,一班人讀呢…就唔同啦…

好快好快…就到十一點…堂姐仲未返。

『咁…不如今日就到呢到?』紫晴首先開口。

『下?原來十一點啦…嘻嘻…完全唔知tim。』阿kay坐係梳化到睇更漫畫。

唔知由幾時開始,佢就已經無溫到去左睇漫畫,
所以就變左我,樂宜,芷螢三個去聽紫晴教會計。

『不如係到訓啦!今晚!』阿kay講『反正聽日放假!』

果然會發生咁既事!但紫晴佢…又點會…

『我…我可以既…』紫晴回應『我之前同屋企人講左...嗯...可能會過夜..』


 
『係到過夜...家...家蔚...會唔會…唔方便?』紫晴再講

「點會呢?」我向紫晴笑一笑「反正屋企人今晚都唔會返黎!」

『就咁話啦!』阿kay彈起身『咁就沖涼先啦!表姐一齊涼?』

「唔…唔好啦…」點解個個都鍾意一齊沖涼?「浴室唔大其實分開沖好d…
啊…如果要換睡衣呢…其…其實我有多啦…」我指住我間房既位置…

『著表姐既睡衣!嘻嘻』阿kay好興奮『好呀好呀!』

『房唔大...我地之後…』樂宜講,隔離既紫晴點點頭。

所以我就帶左阿kay入房,打開衣櫃…

『嘩…真係好多可愛既睡衣喎…』阿kay一望到就講

「嗯,之前有日出去買左好多…」同堂姐…當然,係佢出錢。

『我就呢套啦!』阿kay拎起其中一套我幾鍾意既粉紅色白邊睡衣
『係呢…今晚表姐你打算點訓…』

「我…?」無啦啦問我呢個問題…「大…大概我一個訓廳啦…」

『喔!』

我開始理解阿kay點解咁問…佢知道我曾經係男仔…
所以我無論同邊個一齊訓佢都應該唔會接受到…樂宜可能除外啦…

加上…佢唔知道紫晴同芷螢都知道我係男仔呢個秘密…

咦…係喎…原來呢到全部人都知道我曾經係男仔!除左樂宜之外…

紫晴…佢唔知道阿kay同芷螢知道…
芷螢…佢唔知道阿kay同紫晴知道…

成件事真係好奇怪…
不過就算有人爆響口...應該都無事掛…?