139.


阿kay出左去之後,就到樂宜入黎…

當樂宜望到我衣櫃入面…

『d男裝衫…』樂宜問

「嗯…係…係接妳地機之前個晚…我將大部份都掉左…就..就當…」



『新開始…嗯…我明。』樂宜講

「樂宜…」

『就呢件啦…』樂宜只係隨便拎起最頂個件淺藍色睡衣…『我出去先啦…』

然後到紫晴…比紫晴著好似都係無著過既比較好?

「隨便選得啦…其實有d我無著過嫁…例如…」



『唔洗就我嫁…我…我隨便就可以…』之後佢就好似樂宜咁拎起最頂個淺黃色睡衣…

「嗯…」

最後到芷螢…其實佢都係做下樣入黎…

『我都係著返之前個件嫁啦…媽…家蔚。』芷螢講

「我想...妳今晚同樂宜訓得唔得?佢話哂係妳表姨媽應該都無問題?』我問芷螢...



『可...可以掛?』

「嗯,咁就好。」
 
出返房,阿kay已經身先士卒去左沖涼…

「佢知D沖涼巾係邊咩?」我問其他人

『我同佢講左。』樂宜應我

「喔。」

然後我地就一個一個接住去沖…當我地沖完個陣…
廳到已經係滿滿既肥皂香味…



『呀~表姐屋企真係好舒服呀!同我屋企差得遠啦~』
阿kay大字型躺係梳化到,因為睡褲係好短既關係,露出雪白既雙腿。

「咁…咁呢…」我係房到拎左枕頭「今日溫左咁耐…早d訓啦?」

正當紫晴想企起身….『下!咁早!』阿kay好不滿咁講…

「唔早啦!阿kay!」我指住鬧鐘「遲訓對皮膚唔好嫁!」

『車~咁難得黎表姐屋企,搵d野玩下啦!耶~』阿kay撒嬌道…

「呃…」我天人交戰,如果唔隨便玩d野,阿kay肯定點都唔肯訓…

『我…我唔玩啦。』樂宜企起身『我聽日有d野做要早d起身。』



『嗯…我…我都唔慣夜訓…』紫晴接住講

『下…咁掃興嫁!』阿kay不滿…

『咁點分房訓?』樂宜無視阿kay問我『柔姐姐今晚唔返黎?』

「係呀…我岩岩係房到打左電話…佢話今晚去人地屋企訓
我諗過嫁啦…我就訓廳…阿kay妳同紫晴訓…樂宜就同芷螢…」

我望一望樂宜…佢應該無問題掛?

『嗯,就咁。』樂宜點點頭

果然係表姨媽!係唔同d既!



『咪住!我有提議呀!』阿kay舉起手…

「係?」我問阿kay,雖然我覺得唔方係好意見…

『我見到呢,表姐房個張床其實好大張呀…只要我地打橫訓…其實…』

「其實…」『其實?』我同樂宜望住阿kay

『其實我地五個一齊訓都得啦!』阿kay笑住講

「下?」唔係掛!

雖然事實係可以…我間房張床係打直訓可以訓到三個人既size,
所以佔左成間房既差唔多7成位置,而且我地五個都唔算好高,所以阿kay既建議係完全可行…



『又可以省返d冷氣錢喎!』

咁又係…而家天氣差唔多27度…所以我地溫書個陣都有開冷氣…
我屋企又無風扇…如果訓廳即係要長開冷氣…

『就咁啦…表姐❤』

「咁…只…只要其他人同意既話…」

『我無所謂既…』樂宜講『我…我可以呀…』紫晴講『是但…』芷螢講


 
所以而家,我地五個人係一間房入面…

『主人家訓中間啦!』阿kay伸出一隻手好似招待我咁『請…嘻嘻…』

「嗯…」我好尷尬就爬上床中間…

但我尷尬呢,只係因為阿kay呢種咁誇張既做法,而唔係因為五個女仔訓…
如果係一兩個月前,我就真係會因為咁而尷尬啦!

但而家呢,其實咁樣係聯繫感情既好方法,係咪先!

『我呢,就訓邊位啦…嘻嘻…紫晴訓我隔離!』
阿kay接住爬上床…拍拍佢隔離 – 即係我隔離個位…

然後紫晴都上床…佢望一望我…相當怕羞…

嗯,我覺得在場最尷尬既一定係紫晴…

之後係我左邊既兩個位…
咦?樂宜係到既!佢同芷螢幾時爬左上床嫁!

樂宜望住我…『芷螢話佢想訓邊位…所以…』

「無…無野啦...」

今次係我同阿彥一齊…同樂宜分開之後…再一次同樂宜同床…
雖然隔離仲有其他人啦…

「訓…訓啦…」我同其他人講…

『表姐呀…』阿kay望住天花板…

「係…?」

『邊個關燈呀?』

…所以…我專燈落返床關燈。

令我神奇既係…關完燈訓返上床之後…
除左阿kay講左幾個爛gag之外…都無人出到聲…

睇黎佢一個人係支持唔到呢個局面嫁啦…
咁係好事黎既…可…可以訓…訓返個好教…嗯…

多人訓既壞處…就係有時有人落床我都會感受到…
但明確d係邊個呢…就無張開眼去望清楚…

嗯…

但唔知訓左幾耐…我感覺到旁邊有人戳我…
我張開眼…紫…紫晴?

佢望住我…微微張開口…

『我…我想同家蔚妳講d野…』非常細聲…之後佢就爬落床…

紫晴…?
 
所以我等多陣,就靜靜雞爬返落床…盡量唔嘈到其他人…
行到出廳…我見到紫晴企係到…望住我…
 
『家…家蔚…』紫晴扭扭捏捏…
 
「紫晴?」我望一望鐘,原來已經係四點幾…
 
『我…我呢…想…想問…』紫晴欲言欲止咁…到底係…
 
「想問…?」我向前行多幾步,紫晴身體震一震…
 
『係…係妳同邦彥既事…你地真係…一齊左?』
 
「我同阿彥…係」我望住紫晴…「係…就好似星期一妳地見到咁…我地已經拍更拖…」
 
『咁…咁妳同樂宜呢…』紫晴眼汪汪…『妳同樂宜…』
 
「我地已經…唔再一齊…」
 
『點…點解…?』
 
「因為…我呢…已經決定做女仔…咁…咁就無理由再同樂宜一齊…」
 
『就因為咁?明明個次係倉庫…妳地仲…妳地仲…』
 
「個陣我地係認真…但過左之後諗深一層呢…其實都係事勢所造成…
而家呀…樂宜都明白我支持我…所以…我相信…紫晴妳都會明白…」
 
『我…我…』紫晴dup低頭『我…』
 
「但我對偽紫晴承諾都唔會變…無論鍾意既人係邊個…我…都會一直好好咁對紫晴妳…」
 
『家…家蔚…』紫晴都係口窒窒…『我…我返去訓啦…嗯…』
 
之後佢就係我身邊行過…
 
「紫晴…」我望住紫晴既背影…「我…我明白今次真係自私左…但…但係…」
 
『我明白…』紫晴企係門到…『我真係明白。』打開門,入返房。