161.


我衝埋去房門,但就衝到個陣

「啊!!!!!!!」我係斯巴達!!!!!!門開左「啊呀!?」

係樂宜打開門,我差d剎唔切制…撞埋佢到…

『家蔚…』樂宜個樣好驚訝…我見到佢臉上面有滴冷汗…



「樂宜…妳無事嘛…?」我問佢…

『無…有事既唔係我…』樂宜講…佢個樣面青青...

佢指住床上面…有一個人坐係到…

子朗…

紫晴個細佬…



上次見佢已經係宿營既事…

佢抬起頭望住我…眼睛有淚光…

嗯…!?

到…到底乜野情況…

終於見到你啦



上面呢句…唔係我講既…係…係邊個…

我等左好耐

到底係邊個…令到我心跳得咁快…

『家…家蔚…』子朗慢慢企起身…

但係又差一步

上世既我?

只差一步



『家蔚…我…我…』子朗比到我個感覺…好熟識…

呢一日就黎到


『我係紫晴。』從一把男聲到,我得到一個答案。
 
紫…紫晴?

「你係紫晴?」我問一問眼汪汪既子朗…

“子朗”點點頭…

『家姐…』係我隔離,”紫晴”望住”子朗”…



「家姐…」我望一望床上面既"子朗"…再望一望"紫晴"…「咁即係妳係子朗?」

『無錯…』”紫晴”好無奈咁講…

點解…會變成咁?

『家…家蔚...樂...樂宜...嗚呀呀呀呀…』”子朗”突然撲埋我到『救…嗚…救下我呀…』

救…但…但係點救…

…噗通...噗通…心…心跳得好快…
呢個感覺…比當初第一次見到子朗個感覺…更…更強烈…

*



而家”子朗”同”紫晴”坐係床上面…
我同樂宜就拎左張椅子坐係佢地對面…

望住眼前既子朗(紫晴),雙腳合埋一齊…雙手好唔自在咁扭扭捏捏…
十足十一個非常娘娘腔既男仔…

「簡單d講…」我唔太敢正視子朗(紫晴)「你地兩個交換左身體?」

佢地兩個點點頭…

『無…無可能嫁喎…咁…咁獵奇!』樂宜仲係唔肯去接受現實。

我用手肘戳一戳樂宜,提醒佢隔離就有一個獵奇既人物。

『喔。』樂宜醒覺左



子朗係紫晴…紫晴係子朗…
我最怕既事情終於發生左…紫晴佢變左男仔…

雖然係交換身體…但的確係變左男仔…

「所以…所以…」我望住紫晴(子朗)「事情係由幾時開始?」

『上個星期五。』紫晴(子朗)同我講『個日我地一醒左就變成咁…』

上個星期五...個日就係阿彥搵返我個日...

我好驚訝…「咁咪即係!你地呢四日都無出過街?」

子朗(紫晴)再次喊起上黎『嗚…嗚…以…以呢個身份點出去喎…嗚…』

『家姐!』紫晴(子朗)抱怨道『我…我身體好失禮妳咩!』

『嗚…唔…唔係啦…嗚…』子朗(紫晴)喊住講『但…但係…我…我係女仔呀…』

果然…紫晴就好似我咁諗,完全接受唔到自己變成男仔,
但因為呢個始終係佢細佬既身體,所以佢先可以支持到而家…

家姐同細佬交換身體…呢d情節真係相當謎片feel,
不過佢地兩個都係咁正經既人,所以呢幾日一定無發生乜野事啦…

『咁...咁你地屋企人…知唔知?』樂宜就係我諗更野個陣問

子朗(紫晴)搖搖頭,紫晴(子朗)『好彩既係佢地公幹…都唔係香港…』

咁的確係好好彩,就正如我變身個陣老豆都唔係到…

其實係咪一定要達到某種情況先會發生呢d事呢,
各位家人都長時間唔係屋企個d…要注意啦。
 
「所以…就係因為咁你地先無返到學…」

『我…我想返啦。』紫晴(子朗)講『但家姐唔比。』

『更…更係唔可以啦!』子朗(紫晴)盯住佢『用…用我個身體…』

『咁妳都可以用我個個返姐!』紫晴(子朗)回應

『更…更加唔得啦…』子朗(紫晴)dup低頭…『你…你男校…我…我唔得嫁…』

之後為左方便大家睇,紫晴靈魂既子朗就叫做”子朗”,子朗靈魂既紫晴叫”紫晴”。

嗯…叫紫晴用子朗既身份返男校不如殺左佢。

「但…但係…」我決定阻止佢地爭論「你地一直唔返學都唔係辦法…」

『點…點都唔肯!唔肯呀…』”子朗”望住我講,第一次見識到扭計既紫晴。

「但紫晴妳…話哂都係優異生…」我仲係唔敢正視佢…

『係…但係…』

如果叫冰瑤幫下手,或者可以諗到辦法幫佢地兩個攪休學既…
但…但休學真係解決到問題咩…

「一星期啦…」我再講

『下?』『一…一星期?』”紫晴”同”子朗”同時回應

「一星期…」我身體向前傾「我會同樂宜諗辦法…幫你地回復原狀…」

『家蔚…』”子朗”又開始眼汪汪…

唔好用呢個眼神望我啊…嗯…