199.


然後,因為宴會差唔多開始,D親朋好友都開始到…
我地兄弟姐妹負責輪流收禮金同分配坐位,而家輪到我地去分配坐位。

因為新郎新娘都係外國返黎,所以今晚宴會係以西式為主,
其實咁真係唔錯,可以周圍行黎行去…

最重要,可以同阿彥傾計嘛!



『喂,小蔚。』當我安排完一個新郎個邊既舅父坐之後,阿彥係隔離講

佢而家手上面拎左d野飲,雜果賓治…橙汁…可樂…

「阿彥。」如果唔係周圍咁多人,我一定捉住你空左個隻手姐!

『橙汁。』阿彥遞左杯橙汁比我『我同同事調左位,一陣係我負責小蔚妳個張台。』

「下,咁好既!咁一陣咪可以成日傾計囉!我仲可以餵埋你食野嫁!」



『咁就離譜D啦。』阿彥笑一笑。

「嘿嘿。」

係預定既時間,我地兄弟姐妹就企定定係安排好既位置…
之後就係新郎新娘進場…我地係一邊撒花…

呢個情景真係好美妙…好幸福…
我完全明白點解d人話女人結婚個日係最開心嫁啦…



因為…既然連旁邊既我地都濃濃地感受到…
咁當事人…一定幸福滿瀉姐!

係合照時間,到我地兄弟姐妹一齊合照個陣
我同阿理都刻意保持距離…

就算到自助餐自己,我都只係同阿彥樂宜芷螢佢地傾計…
我見到阿理一個人寂寞咁坐係一邊…

雖然…有少少對唔住阿理,但咁係最好既…
我同阿理點都只可以係朋友,唔會更進一步。

無可能,亦唔可以。
我呀…陳家蔚,心只有阿彥一個。



就係咁,今日既婚禮正式完結。

『妳地可以返去先。』堂姐係大部份賓客走左之後同我地講

「下?我地唔洗留係到?」『係囉。』我同樂宜都抱相同疑問

『唔洗啦。』堂姐搖搖頭『因為而家係大人時間。』

『咁…等我送你地返去?』換好衫既阿彥係隔離同我地講

『嘩…真係好好仔呀!阿欣妳睇下!』堂姐拍一拍佢隔離既阿欣
『點解我堂妹會搵到咁好既貨色嫁!不如認真考慮下讓比我啦?家蔚?』

「妳都傻既!」我即刻講「拜訪你啦…阿彥。」



雖然我有心係堂姐面前隱瞞我同阿彥既關係,
但係我試圖餵阿彥食帶子個陣(以為旁邊無人),始終都係比堂姐發現左…

所以,堂姐係成個自助餐時間都不斷追問我同阿彥既事,
仲對阿彥讚口不絕,不斷利誘阿彥飛左我同佢一齊 (差在未色誘)

雖然知道堂姐只係玩玩下,但我都有D激氣,
不過算啦,其實堂姐終有日都會知道阿彥既存在,不如早D仲好。
 
所以,係阿彥帶領下,我地就離開左會場,結束忙碌既一日。
 
第二日,我起身個陣,堂姐仲未返到黎。
唔洗問佢地一定係去左飲通宵酒。



『女生校…校服…真係好奇怪。』”紫晴”著完套校服之後好擔憂咁講『涼浸浸...』

「嗯,好快會習慣嫁啦,想當初呢…啊,無野啦。」好險,差d就講漏口。

『嗯,我而家都好習慣啦。』芷螢就照直講

『妳…妳好正常姐,妳一直都係女仔。』好彩”紫晴”參透唔到乜野,係好事黎。

講返”紫晴”同圖書館女仔交流件事,其實我已經有個計劃,
連冰瑤 (lunch時間係電話到) 聽過都讚唔錯。

『所…所以就今晚開始?』”紫晴”講

「嗯,但首先你記緊要準時食藥,隨時保持最佳既狀態。」我同”紫晴”講
「電視都有講,最鋒利既刀都有生銹既一日,更何況係人呢。」



『嗯。』所以”紫晴”無再好似之前咁抗拒食藥。

但有無效都係其次,至少我真係睇唔出個功效,

點解我咁講呢,因為除左d同學問”紫晴”關係紫晴既問題佢唔識答之外,
基本上無露出其他既馬腳,姿勢呀…態度呀…無,完全無。

咁相當唔掂,所以我一定要加快腳步。

夜晚,食完飯之後,我同”紫晴”兩個去左個間圖書館。

『啊…佢…佢真係係到!』”紫晴”怕羞咁同我講,之後指住遠處既一個女仔。

個女仔叫阿芝,而家企係文學同小說兩個櫃既中間睇更書,
帶眼鏡,札左個馬尾,連身裙,比人感覺相當斯文,

點講呢,就好似當初我第一次見到既紫晴咁,
但而家既紫晴已經戴慣隱形眼鏡,就算係”紫晴”都有照戴 (應該係被迫既)。

「講返個計劃先,簡單d就係書信來往。」我同”紫晴”講
「你作為家姐既身份,話比阿芝聽你身體抱恙黎唔到,但希望同佢保持聯繫。」

『嗯…』”紫晴”點點頭。

「既然大家都鍾意讀書,書信交流當然係最好不過啦。」

『嗯,最好不過。』

「然後你都可以用返而家既身份同佢傾下計,知道多d細節對將來都有幫助嫁。」

『嗯。』“紫晴”繼續點點頭。

「咁就行動啦!書呀信呀都已經準好囉!就係你手上!」

『嗯…下?但…但我怕羞。』

「怕乜鬼!你係男仔黎嫁!」之後我就推佢一把「加油啦!」

因為始終有d唔放心,所以我就企係佢地隔離既櫃,
偷聽到佢地講野既位置觀察佢地。

『即係…妳話子朗佢…』呢把應該係阿芝既聲,感覺好柔和好治療。

『嗯,但無事嫁!真係無事,好快就會好返。』”紫晴”講
『所以佢希望呢段時間可以同妳書信來往…當…係互相支持。』

咁咪幾好,唔會口窒窒,咁先似返個男仔嫁嘛!要做到既始終都係做到!

如是者,"紫晴"每日都去搵阿芝傾計,阿芝每次都有回信,
好順利咁就過左四日,今日係星期五。

『子朗佢呀…越黎越精神啦。』”紫晴”同阿芝講『好快就會好返。』

『係…咁就好。』阿芝回應

更係精神啦,有異性滋潤喎…雖然而家係同性,
不過的確係事實,”紫晴”而家都越黎越精神,而且呢,感覺開始似返個男仔…

當初知道佢有在意既人實在太好啦,
咁落去,"紫晴"同"子朗"重新交換返黎既日子應該唔遠…

我對而家既情況相當滿意地點點頭。