200.


『係呢,阿芝妳有無男朋友嫁?』”紫晴”突然問

「下?」我叫左出黎,好彩既佢地聽唔到 (好似係)

點解”紫晴”咁大膽嫁?問呢個問題!?
雖然佢而家係女仔,變相係女仔問女仔,但都好奇怪囉!



唔通…佢係想利用呢個身份知道阿芝有無仔?

『我…我呀…無。』阿芝回答。

『哦…咁啊…』我雖然睇唔到”紫晴”個樣,不過佢應該幾開心『咁…妳覺得子朗…』

『紫晴!』阿芝打斷”紫晴”講野『咁紫晴妳呢?有無男朋友?或者鍾意既人?』

『我?』”紫晴”睇黎估唔到阿芝會咁問『無男朋友…但…鍾意既人…有…』



更係有,因為就係阿芝…但”紫晴”佢無可能講出口…

『有啊…』阿芝講

我突然聽到書跌落地既聲音。

『書跌左啦…哈哈…阿芝…講返子朗呀…你地呢…』”紫晴”應該拾更書…

『我…我鍾意妳。』應該係阿芝既聲音突然講



「下?」『下?』我同”紫晴”同時反應。

發生更乜野事?我岩岩係咪耳嗚?聽錯野?

『紫…紫晴…阿晴!』阿芝緊張咁繼續講

我左手捉實本「妳是我的財產」,右手捉實本「無與論比」,
係櫃既空隙望住佢地兩個,而家到底係乜野情況呀?

『阿芝?』”紫晴”睜大眼,一臉難以置信『哈,妳…妳岩岩講乜?』

『我話…我話…』之後阿芝突然,伸個頭錫左”紫晴”嘴唇一啖,無錯,係嘴唇。

痴線嫁!?



我因為激動得濟,旁邊既書都比我掃哂落地。

『我鍾意妳呀!阿晴!我真係好鍾意妳呀呀呀呀』阿芝邊講邊跑左去。

呢個情況令我諗起當初芷螢比阿彥錫完之後既反應。

『圖書館唔比大叫同跑呀!』一個女管理員講『而家D年青人真係…』

我同”紫晴”既時間仿佛都停左五分鐘,
到我醒返個陣我即刻拾返D書上架…

之後拿拿臨跑去”紫晴”旁邊…佢而家就好似靈魂出竅咁…

「喂…子朗…喂。」我同子朗講,但佢完全係無反應。



呢個係咪就係失戀呀?又唔可以咁講…
因為阿芝鍾意既人都係子朗自己...只係身份唔同...

失策,我完全估唔到阿芝原來係LES…今次真係大濟…

「子朗…醒呀喂!」我繼續同子朗講,佢仲係一面呆相。

我望一望佢手上面原本係阿芝睇更既書,「100個成功告白的例子」…

唔得,而家需要既係冷靜,要慢慢分析返岩岩既情況…

『家…家蔚。』”紫晴”終於回歸…佢望住我…個表情我唔知點形容。

「你...無事丫嘛?」



但下一句…

『其實…做女仔…都唔錯呀…?』”紫晴”個樣,而家我識形容啦,

一臉幸福。
 
「喂…子朗…唔好嚇我呀?」做女仔唔錯?唔好咁諗呀!!!

『阿芝呢…哈…哈哈…話鍾意我呀…』”紫晴”繼續沉醉係佢既世界。

我決定搖佢,搖醒佢。

「佢話鍾意既係紫晴,係紫晴呀!唔係你!」我一路搖一路講

『係…係紫晴…唔…唔係我…』一講完,佢沉默左。



「無錯,唔係子朗你,呢個情況完全錯哂呀。」

“紫晴”只係dup低頭,應該係明白件事之後好失落。

「返…返去囉。」我拍一拍”紫晴”肩膀。

『嗯。』

老老賽賽,我完全想像唔到事情會咁發展,
阿芝既信我都有稍微望過,佢同子朗既感情明明係相當好,

點解只係幾日,就攪成咁?
諗唔通…完全諗唔通。

第二日,我起身個陣,”紫晴”已經食更早餐。

「咁…早既?」我問”紫晴”

『嗯…訓唔著。』

我坐係”紫晴”隔離,之後打開電視…

「係呢,食左藥未?」

『係食早餐之前食左。』”紫晴”回答,應該係真掛?

其實我都醒水嫁,我而家將d藥分左三包,之後收埋其中兩包,
一陣只要數下淨返個一包得返幾多粒藥就知道”紫晴”有無食到。

講返今日行程啦,我呀,約左阿彥,
但去邊到玩呢,就未決定好,但一定離唔開影相…

嗯,影相係今日最主要既目的,
我要將呢兩個月無影過既相,係今日影哂佢…

如果阿彥肯,閃卡都同佢影呀!嘿嘿,講笑咋!

「嘻嘻...」我不禁笑左出黎...

『阿芝琴晚打電話比我。』”紫晴”食食下野突然講

「嘻嘻,下?」

『阿芝琴晚打比我。』”紫晴”dup低頭再講多次『話希望一陣見面。』

「唔係掛?唔…唔通係為左琴日件事?」我好擔心咁問

『大…大概係,佢只係好希望見,之後就急急收左線。』

「咁…咁如果佢真係提返件事…子朗你打算點答?」

『更係拒絕啦…我唔係紫晴…我係子朗,我要令阿芝鍾意既人係子朗…』”紫晴”決心咁講

「咁就好…」

我約左阿彥嫁,應該唔洗觀察佢地啦掛?
 
『咦,咁難得小蔚妳會選擇去圖書館喎。』阿彥講

「係呀…唔好睇我咁呀…其實我好鍾意讀書嫁!」我同阿彥講

無錯,我始終都係唔放心”紫晴”,但又無理由放阿彥飛機喎,
所以就約阿彥係圖書館留下等。

「但…阿彥會唔會怕悶呀…」係lift到,我問阿彥

『如果小蔚妳認為我會悶既話,就太睇少自己啦,傻女。』阿彥戳一戳我個鼻哥。

「呀…痛呀!」

『有妳係到就唔會悶。』

「知啦,知啦!」雖然我扮到好似怪阿彥沉氣又口花花,但其實心入面都係甜到漏。

『係呢,小蔚想睇乜野書?』入到圖書館,阿彥問

「呃…」一時三刻我諗唔到tim「小說啦…我其實想搵小說。」

『咁行啦。』阿彥笑一笑

「咪住~」我阻止阿彥「圖書館多人呀,阿彥幫我搵個位先啦,一陣無位就好傻嫁啦!」

『唔…』阿彥望一望周圍『好啦。』

「阿彥你是最好的!」我向佢笑一笑,之後就自己行去小說區

“紫晴”同阿芝都應該係個度…

無錯!佢地係度,仲講更野!
我以一個路人做掩護成功企返係琴日個位置…

到底佢地講到邊到呢…”紫晴”拒絕左阿芝未呢…

『所以呢…』”紫晴”講『點解…會變成咁?』

『記唔記得…』阿芝緊張咁講『我…我地第一次見面個次呀…』

『第…第一次見面?』”紫晴”講,睇黎佢唔記得…

正確D講係唔記得紫晴同阿芝見面件事。

『個陣我睇書睇到一PART好有問題,係妳…阿晴妳呢…過黎幫我…』

『哦…個次…哦!』睇”紫晴”咁作狀既反應,佢只係扮記得。

『我記得呢…個次子朗都係到。』阿芝再講

『係到咩?』”紫晴”講

『嗯…係到。』阿芝點點頭

『唔…唔係掛…』好明顯”紫晴”對自己個日存在都無乜印象。

『係之後我只係見到子朗…見唔返妳…』阿芝越講越尷尬…
『所以...我…我同子朗傾計…有機會就傾計…其實…其實…』

『阿…阿芝…』”紫晴”開始變得驚慌,好似已經知道阿芝想講乜咁...

就好似我而家咁...阿芝妳唔會...真係...

『其實我好衰呀!我同子朗傾計只係希望有機會可以再見返阿晴妳咋!』

雖然圖書館好安靜,
但唔知點解我聽得出”紫晴”既心聲,

晴天霹靂。