201.


「唔係掛?」好彩我今次夠冷靜,唔係又會掃哂D書落地下。

但個手…依然係震得好利害。

『唔係乜野呀?』突然隔離出現一把男聲…

「唔好嘈我呀!」我不滿咁望隔離個個人,係阿彥「呀…呀…阿彥你唔係幫我霸位咩?」



『我見到有個位置仲有一堆位,所以就黎搵小蔚妳。』阿彥講
『但小蔚妳唔似搵更書喎,似係睇更野。』

「你八卦啦!」我同阿彥講「返…返去先啦。」之後推佢

但當然就推唔郁佢啦。

『佢…咪係紫晴?』阿彥望住個空隙之後講『點解佢係到既?』



「唔知呢…呵呵。」我同阿彥講

『哦…今日黎圖書館其實就係為左紫晴?』

「真係咁岩咋!」我急忙解釋

『係既係既,咁就一齊睇啦。』阿彥笑一笑,之後繼續望

「哦…」無辦法,唯有咁…



再望返”紫晴”同阿芝個邊,佢地仲係企定定係到…

『即…即係阿…阿芝妳對我…唔係…對子朗…無…無任何感覺?』”紫晴”終於講

阿芝無回答到…只係點點頭。

『點…點會…』”紫晴”向後退一步『唔…唔會既…』

『雖…雖然咁真係對唔住子朗…而且妳又係佢家姐…但…但的確…』

『唔好講啦…唔…唔好…』”紫晴”再向後退兩步…

『但係…但係…』阿芝反而向前行…靠近”紫晴”『但我係鍾意阿晴妳嫁!』

『鍾…鍾意我…?』”紫晴”講『真係鍾意我…?』



終於到呢一步啦,之後就係”紫晴”既拒絕…
佢講過嫁嘛,佢會拒絕,因為佢要夠阿芝鍾意既係子朗…唔係”紫晴”…

『哇…』阿彥好驚訝『竟然係發生咁既事。』

阿彥就花生MODE,難為我,越睇越唔安樂。
又無計既,鬼叫阿彥唔知到子朗同紫晴交換左身份…

快D拒絕啦!”紫晴”,快D啦!

『嗯…好鍾意,即…即使我同妳都係女仔…但…但都係鍾意!』阿芝繼續講

『即使都係女仔…我係女仔…都…都鍾意…』”紫晴”重覆咁講



「拒絕啦!」我緊張得濟,嗌埋出口。

『小蔚妳好激動咁喎。』阿彥笑住咁講

「你唔明!」

『嗯…我睇過書…愛係可以超越性別嫁!可以嫁。』阿芝捉住”紫晴”雙手…

『超…超越性別…』

『所以…所以啦!阿晴,可唔可以比我做妳女朋友…啊…』

仲唔拒絕!"紫晴"你係到諗乜野呀!
 
『做…做我女朋友… ?』



『嗯…我…我地一定會好幸福嫁…阿晴…』阿芝講,仲係緊緊捉住"紫晴"隻手

攪邊科呀?”紫晴”?仲唔拒絕!?你唔係想...唔會掛...

「呀…激死我啦!」唔得啦,我要過去阻止”紫晴”繼續發呆

『小蔚妳想做乜?』但係阿彥捉住我隻手

「阿彥你唔明啦,而家係緊急情況呀!」

『但係人地告白個陣騷擾人地…好似唔係幾好…』阿彥講

「呀…而家好難解釋嫁…之後先…」



『好…』”紫晴”突然開聲…打斷左我講野...

「好!?」我唔敢相信自己雙耳「好!?」

『阿晴…?』阿芝開聲…睇黎佢都未反應得切…

『做…做我女朋友啦!阿…唔係…小芝!』”紫晴”講

「唔好呀呀呀呀呀!!!!!」今次我真係嗌左出黎

『家蔚!?』呢一嗌令到”紫晴”發現左我『小芝…我…我地走啦!』

”紫晴”捉住小芝隻手,之後跑左去…

「追…要追呀!」我同阿彥講

『但…但係我唔明。』阿彥疑惑咁問

「總之跟住我黎啦!」之後我拉住阿彥去追佢地

『又係你地班友!』個女服務員又講『呢到圖書館黎嫁!』

「無下次嫁啦!!拜拜。」我邊跑邊講

去到升降機大廳,已經無人係到…啊…佢地已經入左升降機

「可惡!」

所以我地唯有係到等升降機...

『估唔到紫晴會答應…』阿彥講『我仲以為佢係對小蔚妳…』

「佢唔係紫晴呀!」我同阿彥講

『下?』

「佢係子朗,子朗同紫晴交換左身份呀!」

『小蔚…妳身邊既事真係樣樣新鮮樣樣新…』

我係咪應該開心呀?

落到樓下已經搵唔到佢地兩個既蹤影,打”紫晴”電話亦好正路唔通…

「我已經唔知點好啦…」好混亂呀...

『我諗我大概明白啦,小蔚。』阿彥係隔離講
『妳係怕呢件事會令到而家既紫晴,即係子朗...唔想回復原狀?』

我點點頭。

『咁的確係好嚴重…對唔住,小蔚,我係上面係咁阻住妳…』

「無…如果我一早同阿彥講就唔會咁…」

但就算講左,都唔會改變”紫晴”答應阿芝,成為情侶呢個事實。

『咁我地分頭搵啦,小蔚,一搵到就聯絡對方。』

「嗯。」我企起身,而家一定要阻止佢地…

一定要!
 
『搵唔搵唔到?』大約半個鐘之後,我同阿彥又係圖書館樓下撞返

「搵唔到…」我搖搖頭

『咁既話...佢地如無意外都已經離開左呢頭。』阿彥講

「嗯…」

『除非妳諗到一d佢地應該會去既地方…如果唔係已經無辦法。』

「大概…有一個地方…就係佢屋企…」

呢個可能性係相當大…越危險既地方就越安全…
而且,因為我無紫晴屋企既鎖匙,所以就算我地搵上門,佢都大可以扮唔係到…

『咁…出發啦我地?』阿彥講

「唔洗啦。」我搖搖頭「就算去到都唔會有結果。」

『小蔚…』

「返去先啦…」雖然而家都仲係下午時份「今日我無心情做其他野啦…阿彥。」

無…真係無,完全無。

所以阿彥就送我返屋企,
返到去,芷螢係到,而且以成屋都係酒味黎估,堂姐都應該返左黎。

『家蔚…』芷螢望住我『”紫晴”呢?』

之後我就將”紫晴”同阿芝件事話比芷螢聽…

『唔…唔係掛?』芷螢難以置信『呢個唔通就係愛情既魔力?』

「但咁樣實在太蠢啦!」我同芷螢申訴「呢個身體唔係佢嫁嘛!」

佢之後點同紫晴交代喎!
雖然而家係偽紫晴姐!都係好麻煩囉。

我試過打比冰瑤叫佢諗下計,但神奇地冰瑤電話唔通。

咁無辦法啦,唯有等…等…
雖然我覺得”紫晴”佢今晚唔會返黎…

佢大可以同阿芝返自己屋企…呢對新情侶一定好多野可以傾,
仲可以做好多野…情侶先會做既野…仲有大大枝雙龍頭比佢地玩tim…

唔得,諗起都好恐怖呀。