213.


係lunch時間,我嘗試挑起話題…
 
「係呢…阿kay妳係乜野星座嫁?」
 
『嗯?白羊座呀…』阿kay講
 
「哦…白羊座!好岩喎!妳咁活力充沛…」我繼續講


 
白羊座…即係阿kay大過我?
 
『嘿嘿,好多人都係咁講我嫁!話我係白羊座既代表!』
 
黎啦!阿kay好快就會問返我乜星座…之後我就…
 
『係呢,我都唔知樂宜妳係乜星座。』出聲既係小藍。
 
佢今日好神奇咁同我地食飯。


 
『下?我呀…魔羯座嫁…』樂宜講
 
『咦…魔羯座?咁咪即係就快生日囉!?』小藍講
 
『嗯…』樂宜有d尷尬咁點點頭。
 
我仲以為小藍一定會知樂宜生日tim…原來唔知道…
 
『樂宜生日呀!係好特別既日子嫁,嘻嘻。』阿kay接住講


 
『我就知道妳會提起!鄭青琪!』樂宜不滿咁講,睇黎對於自己生日係特別日子唔多鍾意…
 
『…唔通…係聖誕節?』小藍估
 
『唔係,不過近啦。』阿kay笑一笑『平安夜呀…』
 
嗯,樂宜雖然係我表妹,不過佢其實只係細我二十三日…
十二月二十四日…就係佢既生日。
 
不過重點唔係樂宜嘛!重點應該係聽日就生日既我呀!
係我呀!快d問我啦!

『嘩!平安夜!』小藍感嘆『感覺好浪漫啊!』



『唔好笑人啦…』樂宜尷尬咁講

『我好認真嫁!』小藍再講『如果有仔個日真係雙重浪漫。』

『如果有仔丫嘛!』阿kay笑一笑『嘻嘻。』

『哼!』樂宜睜住阿kay

唔好再講呢d啦…問我啦…

『而且假期都有假期好處啦…好似我生日咁,
唔單止係平日,仲要成日都係考試前喎…真係激死人!』小藍唔多開心咁講

『我咪又係…』阿kay再講



「我都係嫁!」我插嘴…等佢地可以問我…快d問啦!「超慘囉!」

『呀...再唔埋單遲到啦!』阿kay突然講

「下?」點解唔問我呀?我射手座嫁…

嗚…

返到學校,我決定打比冰瑤…
今次,我決定直接同冰瑤講…以防止岩岩既情況。

『哦…我一早知啦。』冰瑤一聽完即刻講

「下?點解妳會知嫁?」我好驚訝…



『家蔚…妳唔係唔記得妳叫我幫妳整身份證件事嘛?』冰瑤講

「咦係喎…傻左tim!」

『家蔚,妳係咪擔心聽日無人陪妳呢?』冰瑤講中左我既要害…

「邊…邊係喎!」

『呵呵,放心啦,家蔚妳禮物我已經準備好,妳一定鍾意。』

「冰瑤…識到妳真係太好啦…」我感激咁講

『作為女朋友係應該既。』冰瑤講

「女…女女女朋友?」對冰瑤突然咁講我嚇一跳


「我記得啦!個陣夾埋昆老豆個陣妳講過…」

冰瑤唔係認真話?

『呵呵,講笑咋。』冰瑤講『家蔚既反應真係有趣。』

「呢d野唔講得笑嫁!」會心臟病發嫁!

『咁妳親愛既阿彥個邊點?』

「我…我唔知…」一提起阿彥又有d失落…「我一陣試下問…婉轉d…」

『家蔚真係唔老實姐。』冰瑤講

「嗯…如果我老實d…對個個都好似冰瑤咁講…就唔會攪到而家咁…」

放學…我小可咁係阿彥戳我之前另轉身…

『小蔚?』結果阿彥有d驚訝

「阿彥!」我覺得自己太過激動「聽日有無地方想去下?」

『聽日…』阿彥臉有難色『我聽晚要全晚練習…唔得閒…所以…先想今日陪下妳…』

一聽完,我覺得自己有少少頭暈…

唔係…掛?
 
「下…?」我仲係…唔願意相信岩岩阿彥講既野…

『對唔住…小蔚,但妳都知道星期五就係比賽…聽日練習好重要…』

「啊…嗯…星期五…比賽…」

而且之前聽阿彥講,對手今年係明顯強左...所以要進行針對式訓練。

『小蔚…明白就好。』阿彥溫柔咁笑一笑

我明白…但係…

唔想明白呀!

結果,雖然阿彥話呢晚陪我…

但因為我心情一直都係處於低點既關係…
所以係食完野之後我就決定返屋企…

『拜拜…小蔚。』去到樓下,阿彥講…

係呢瞬間,我想衝去攬住阿彥,
之後大大聲同佢講,聽日係我生日,好想佢陪我…

但係…佢既練習真係好重要…如果我咁做…就係自私…
作為好既女朋友…唔應該自私…

唔應該…

結果,就當然係喊左成晚,最後就留左係屋企訓...