230.


但係成個用餐過程,邦文都表現得超紳士,甚至阿彥都要退埋一邊…
而且,雖然我唔想承認,但佢真係好風趣…比起阿彥…
 
可惡…可惡…
 
『哈哈,哈哈…』阿kay又比邦文既一個笑話笑到禁住個肚『唔得…頂唔順…』
 


連樂宜都好開心…
 
我彈起身…『小蔚?』阿彥望住我…
 
「我去一去洗手間…」
 
『出去轉右。』邦文同我講
 
「我知呀!唔洗你教…」
 


出到去,我即刻拎起部iphone4s…

計劃已經定左…我要係到打個短訊比樂宜同阿kay…
話哂d衰野比佢地知…嗯…

但係…『咦…iphone4s喎。』邦文突然出現係隔離

「嘩!?」比佢嚇一嚇我甩左部手機「呀...」

『喎!』但邦文好敏捷咁接住左『所以話妳應該要買個殼。』好彩無望到螢幕就遞返比我…



「多...多謝…」雖然我真係唔想講…但係佢始終救左我部手機…

『啊…我唔記得我都要去洗手間tim…』

「你到底想點?」我同邦文講

『下?』

「點解要對佢地咁好喎!」

『我有無講過我同條女分左手?』邦文望住我

我無答佢,只係點點頭



『咁妳明啦?』邦文笑一笑

「唔得…唔可以!」我睜住邦文「個兩個你都唔可以…」

『點解呢?唔通…妳同佢地有不尋常既關係?』邦文試探性咁問…

「我…我地係好姐妹!所以唔可以比佢地同你呢種人一齊!」

『我用情好專一嫁...』邦文講『今次分手唔係我既錯。』

「無人信囉!」

『佢地會信,』邦文壞笑『個個…點講呢,小樂,好岩我口味。』

果然…你對樂宜…



『係個胸唔夠大…不過我諗會繼續發育既…』

「如果你亂黎!我唔放過你嫁!」我恨恨咁望住邦文...

『你唔係想阻止我掛?』

「我…我當然!我而家就入去話比佢地知…」

『我有幾衰?』邦文接著講『跟住呢…佢地當然會信哂妳…然後我就無哂地位…乜都無。』

「更係…嗯…無錯,就係咁!」

『但妳又得到d乜?』邦文眼神變得銳利…



「下?我…我得到d乜…你…你講乜…」

『乜都得唔到,妳破壞左妳好姐妹識到好男人既機會…好…就算我真係唔係好男人…
妳都係唔放心比機會佢地睇清楚我,妳信唔過佢地,就好似妳信唔過我,妳乜都唔明。』

「我…我唔明?我唔明d乜呀!?」

『我睇得出妳對小樂有一種微妙既感情。』邦文銳利咁講

「下…」點...點解你會知...

『呢個感情害更妳,』邦文繼續講…『妳明明清楚,但妳唔肯承認。』

害…害更我…



『妳自己諗下啦…』邦文搖搖頭『阻止我唔應該用打短訊呢d小人做法,』

…我…我唔想承認…

『最佳做法,應該係係我追到小樂之前,比另一段感情我。』

嗚...

結果…原本已經打好既短訊,我並無傳送出去。
 
雖然邦文講既野…唔多唔少係有d道理,
但我始終唔能夠認同…特別係最後個句…

比另一段感情佢,先係阻止佢最好既方法,
如果我無理解錯…佢要既另一段感情…

「我…?」我望住塊鏡既自己…

嗯…可能性好大...佢做一大輪野既目的…都係希望我做佢女朋友…
如果唔係,佢好有把握,可以將樂宜追到手…

只要我將短訊打出去…邦文就唔會再有機會…但係…

『妳信唔過佢地,就好似妳信唔過我,妳乜都唔明。』

我會唔會…真係理解錯?或者邦文…
佢對自己愛人真係可以好似阿彥對我咁...咁溫柔...咁好?

我同佢始終識左唔夠24個鐘…阿彥都話過佢本質唔壞…
我就算唔信佢…係咪都應該信下阿彥?

『去咁耐既?』到我返到去…樂宜細細聲問

「咁岩肚痛…」我回答…

『會唔會…係d野食唔乾淨?』樂宜擔心咁問

「唔係啦…小問題。」

我決定,再觀察多邦文一排…
始終短訊在手…決定權永遠係我到。

『各位有無興趣…食完唱下k?』係我地都差唔多食完個陣,邦文提議…

『好喎!好耐無唱過啦!』阿kay讚成

『下…但聽日要返學…』樂宜講

『車,十二點前走咪得囉!』

『但係…』

『係囉,』邦文笑一笑『其實我手上面有優惠卷,仲有個度我都識人…或者又可以計我地半價…』

『嘩!真係好得喎!邦文你!』阿kay講『去到邊都識人…
去啦,樂宜!就黎考試唔唱又有排無得唱嫁啦!』

『家蔚…想唔想去?』樂宜決定問我

「我…」雖然唔太想,但如果多個機會觀察邦文…「如果阿彥都去…嗯…可以既…」

『我睇小蔚頭。』阿彥講

『咁即係得啦!』阿kay講『唔好婆媽啦!』

『咁好啦…』樂宜最後講『我都好耐無唱過。』

『好野!』阿kay好開心咁講

『咁埋完單就出發啦…』邦文笑一笑

果然,呢餐飯係平左五折有多…
然後我地五行人,就出發去附近既k場…
 
『hi!阿傑。』一入到去,邦文就同個職員打招呼

『唷,又黎呀。』個個叫阿傑既人回應

『係啦,無野做嘛。』

『五位?』阿傑雙眼掃一掃過我地之後問

『嗯…個房可唔可以大d先。』邦文細細聲問

『阿文開到聲…點可以唔得呀。』阿傑笑一笑,之後係到禁禁禁…

『攪掂,如無意外可以有個20人房。』

『嘩!』阿kay雙眼發光…

「車…五個人咁大個房托咩!」

『小蔚係咪想我叫多d人先。』邦文笑一笑『我一個電話就得嫁啦。』

「免啦!」都唔知你識個d係咪豬朋狗友

入去到,果然係二十人房…我地5個人只要分開坐可以每人相隔成兩米。