240.


「姓于…」我望住miss lee「呢張相係幾時影?」

我唔知我而家表情係點…但見到miss lee有少少吃驚咁望住我…
我估…我事實係隱藏唔到我心入面個份激動。

『唔…已經係二十年前啦…』miss lee回答『個陣我先五歲…』



「咁…咁樣…」我指住相片中間個個人「呢個人…」

『啊…佢係我阿公。』miss lee講『我記得啦…呢餐飯就係慶祝佢70大壽。』

70大壽…餐飯係二十年前…計返條數…咁即係…佢係1921年出世…
點解…會咁適合…點會…

「佢…仲在唔在生?」

Miss lee搖搖頭『係影完呢張相唔夠兩年,佢就過左生。』佢講



「過左生…」

雖然知道係理所當然…但…心,難免會沉一沉…

「咁…咁樣…」我指住佢隔離個個女人「呢個應該係妳婆婆?」

『嗯…』miss lee點頭

「佢呢…佢仲在唔在生?」



『仲係到。』miss lee笑一笑『家蔚妳對我屋企人咁有興趣既…唔通…』

「可以比我見下佢嗎?」我衝口而出…

『下…』

而家…唔係猶豫既時候…
真相…就係眼前…忽然出現係眼前…

我要捉住。

「我想見下…miss lee既婆婆。」

『點解…』miss lee疑惑…



「我遲下會同妳解釋…miss lee…但我真係好希望可以見佢一面…」

『但係…』

「係咪唔得?」我有種感覺…如果錯左今次機會…就唔會再有…

『唔係唔得,』miss lee講『但係婆婆唔係住係香港,佢住係福建。』

「我…我可以上去搵佢嫁!」我彈起身…好激動「只要有地址…」

『唔洗…唔洗嫁!』miss lee講『我婆婆遲下會返黎,到時就可以...』

「幾時?」我好似已經忘記左…眼前呢個人係老師一樣…



『聖誕…聖誕節之後。』

*

『家蔚?你咁靜既…』放學行返去既途中,樂宜講…

「下…我…」我靜…係因為思緒好混亂…

一切都講得通…雖然相入面個個人…年邁而蒼老…
但我認得佢…打從心底認得佢...

「樂宜…今晚九點可唔可以去一去麥當勞…我會搵埋冰瑤同偽紫晴…」

『係咪…發生左乜野事?』樂宜擔心咁講



「樂宜,」我流淚…但係我搵唔出原因「我諗我已經搵到于子朗。」

係開心,定係傷心?
 
*
 
『家蔚…』呢把...應該係樂宜既聲音
 
「唔…」
 
『家蔚哦…』呢把…應該係偽紫晴既聲音
 
「嗯…」
 
『家蔚!!』冰瑤大喊


 
「下…係!」
 
『妳已經發左呆好耐啦。』冰瑤再講
 
『自從幫你買完個奶昔之後。』樂宜接住講
 
『而且…已經飲完啦…但你仲係到吸。』芷螢再講
 
「下…」我望一望杯奶昔,果然已經無哂「啊呀…」
 
『洗唔洗再買另一杯?』樂宜問…
 
「下…唔好意思…」
 
『咪傻啦。』樂宜企起身,之後就行去買
 
望住樂宜既背影…感覺…哀傷又多左兩錢重。
 
『估唔到會咁樣發現到于子朗。』冰瑤講
 
「嗯…我都…覺得好巧合…」
 
『其實或者…唔係巧合。』冰瑤接住講,之後望住芷螢…
 
『下…?』芷螢愕然…
 
『總之…我地其實而家都做唔到乜野。』冰瑤講
 
「點解…?」
 
『其實最好既方法應該係直接打電話上去…同個位婆婆聯絡…但係…』
 
「但係,佢聽覺唔係咁好…已經始終係太唐突。」
 
呢個係miss lee同我講既。
 
『咁樣,個位miss lee既媽媽呢?』
 
「我都有問過…但佢係外國。」
 
自從離婚,miss lee同佢妹妹一齊住之後,
佢媽媽就去左外國,但佢都會係聖誕節返黎…
 
『所以,我地就慢慢等到聖誕啦。』冰瑤笑一笑
 
「但係…」
 
『反正,都等左咁耐啦。』呢句係芷螢講『都唔差在等多陣…』
 
「咁又係…」反正都已經...過左咁多個月…
 
『而家…妳地首先應付好考試先啦…』冰瑤講
 
「嗯…」我點點頭
 
『朱古力奶昔到!』樂宜開心咁放低杯野
 
『要走啦。』冰瑤傾起身
 
『下!??』樂宜驚訝。
 
聖誕…見完呢位婆婆之後…
我…子朗…紫晴呢件事就會解決…
 
好快…好快。