253.


處於遊魂狀態既我,可能仲清楚時間無多既關係…
所以我都係帶住阿彥既衫袋,出一出旺角,係精品店買左樣禮物…

但我唔清楚樂宜會唔會鍾意…我已經無心情去考慮…

買完之後,我都係旺角亂逛…漫無目的…
因為…我未諗清楚之後應該點做…未清楚…



但係…終歸都要面對…

去到黃昏時間,我先慢慢返屋企…
企係屋企門口…我心情好複雜…

電話入面既名稱...

「陳芷螢」



芷螢…
點解會係妳…

點解妳會打比阿彥…點解妳會叫佢出尖沙咀…

我一陣應該…點問出口…
點解要咁做?打比阿彥做乜?一直以黎到底有乜原因...

但係…個理由大概都離不開一個…
想拆散我同阿彥…無錯…



由唔知幾時開始,芷螢一知道我同阿彥有乜野活動,就會變得好唔開心…
到係陸運會,佢仲一度希望我同阿彥分手…

芷螢…

芷螢…

我要冷靜…一定要保持冷靜...就算芷螢係點,佢都係我個女...
我慢慢…打開大門…

一開門…

『哇,竟然係姐姐!?』係我面前既係小芋,
佢而家拎住枝水槍咁既咁物體向住我做一個準備開槍既姿勢。



佢隔離…梳化位置坐係到既,係非常緊張既…芷螢。

發…發生左乜野事?

『姐姐,我捉到佢啦!捉到佢啦!係咪好叻呀!』小芋自豪咁用另一隻手指住芷螢…

芷螢只係dup低頭…無出到聲…

「我…我唔明?」

『姐姐點解會係到既?唔通家蔚姐姐係住係到?』小芋問

「我…啊…」應該點解釋好呢?



『唔通,家蔚姐姐一早已經識陳芷螢?妳私藏罪犯!?』小芋再次將枝水槍指住我

「點…點會喎!?」我激動「我係住係到,但我唔知道佢叫陳芷螢呀!?」

唯有係咁講,為左…得到小芋既信任,
但係…小芋到底會唔會信…

『哦…原來係咁。』小芋點點頭

竟然信左。
 
因為小芋既出現,我一分鐘前仲煩更既野被迫暫時拋諸腦後。
 
芷螢…就算係背後做左d乜,
我都唔可以比人捉走佢…唔可以…


 
「係…係呀…佢用第二個名既…唔係叫陳芷螢…」
 
芷螢抬起頭望住我,神情非常緊張…
 
『罪犯一定係多計嫁啦!以家蔚姐姐既智慧比佢昆左都無計!』小芋繼續點頭
 
…以家蔚姐姐既智慧?
 
「我而家好蠢咩!」我反擊
 
『我無咁講啊。』小芋雖然咁講,但之後既『啦啦啦』出賣左佢
 
 
「係…係囉…」我將阿彥既衫袋,同禮物放係台到「咁…咁小芋妳之後打算點做?」


 
『唔…未到限期我未可以返去啊。』小芋講
 
「係呀…點解既?」我用非常好奇既語氣問
 
『唔…因為人地個時光機要到某個時間先會起到作用。』
 
「咁樣呀…」時光機…只要搶到個時光機「咁樣呢段時間…小芋妳…」
 
『我要徵用呢到。』小芋拍拍心口講『為左廿四小時監視住陳芷螢!』
 
咁實在太好啦!
 
「咁樣,不如等姐姐都幫手一齊監視?」我提議
 
『姐姐…信唔信得過嫁?』小芋用懷疑既眼神望住我
 
「其實姐姐我啊…最憎罪犯嫁啦!我一定唔會比佢走甩姐!」我指住芷螢
 
『嗯,咁又係,』小芋點點頭『姐姐個樣成個天使姐姐咁,一定唔會昆我既!』
 
對唔住啦,小芋相信既天使姐姐,我而家係惡魔姐姐。
 
「一於咁啦,妳就放心係到住,我地一齊監視住佢嫁啦。」
 
『係呀好耶!』小芋拍拍手,之後成個人軟哂『但我而家肚餓呀…』
 
「等姐姐煮啦…」我同小芋講「一路煮個陣…我有部psp啊…小芋玩唔玩?」
 
『psp!』小芋雙眼發光『我個年代係古董黎嫁成50萬一部嫁!』
 
50萬!我而家有樣值50萬既野係屋企!?唔係掛?
以後一定要收埋係保險箱,唔係…應該先入手幾百部…
 
啊…而家重點唔係到…
 
『我見到家蔚姐姐雪櫃有雞脾,我要食啊!但唔要雞皮!』
 
「係既係既…」而家要做既…就係要令小芋信任我…
 
之後…諗計…令到佢放棄捉芷螢…
如果唔係…就搶走…或者整爛佢個時光機,
 
你做到既…家蔚…一定!
 
食食下晚飯…(姐姐隻雞脾好好味呀!同我媽媽煮既差唔多!)
我收到個電話…係阿彥…
 
「喂…阿彥?點解而家先打比我嫁。」
 
『係我啊,小蔚。』點知係邦淫…
 
「點解你會用阿彥既電話打黎嫁?」我不滿咁問
 
『都講左啦,因為我無電嘛…』邦淫笑住講
 
「再見!」
 
『喂,唔好收線住啦,今晚打比妳係為重要事嫁。』
 
「下?你會有重要事?告白呀?」
 
『咦…小蔚點解知既?』
 
「下?」我估下…咋喎…
 
『無錯,聽日咪係小樂生日既…小蔚。』邦淫繼續講
 
「你唔係都會出現呀?」唔係掛…
 
『呵呵,係小樂邀請我嫁,真係榮幸。』
 
樂宜…竟然會邀請邦淫…點解…點解會咁…
 
「咁…告白…告白…」
 
『而我呢,打算係派對之後…』邦淫停一停
 
 
『同小樂告白。』