270.


『咁樣呀…阿明…都係唔好打住。』個職員同個收銀仔阿明講

『哦。』阿明放返低部電話

『點呀…點解唔打?』個中年阿叔繼續插嘴

然後佢比阿彥睜一睜,即刻收皮。



『我唔信我女朋友會做呢樣野…』阿彥好堅定咁講『係咪有咩誤會?』

『我見到個女仔拎住本雜誌…之後行出去...』

『咁有無行出店鋪?』阿彥追問

『咁…又好似未…』

『可能我女朋友真係想比錢但唔記得呢?』



『呃…』個職員好苦惱…

『係囉,其實我都唔信呢位小姐會偷野。』阿明加把口講

多謝你呀…阿明哥哥…你果然識睇人…

『佢咁靚…係咪先?』阿明繼續講『要幾錢買野都得啦...洗乜偷野先?』

我收返。



『唔…咁又係…』個職員點點頭,竟然覺得有道理!?『賊其實都有樣睇既。』

『唔係掛…』個中年阿叔相對就好反感

『我一於幫佢比返錢…可唔可當無事發生過?』阿彥講

『唔,就咁啦…下次唔好啦。』職員望一望我講

「係…唔好意思…真係好唔意思!」我再次up低頭道歉…

好野…無事啦…阿彥救左我…
原原本本最最初初既阿彥救左我…

「嘻嘻…」行返出去個陣,我心情好返好多…



『小蔚…』

「岩岩完全可以寫個故仔呀…『白馬王子勇救時空少女。』」

『時空少女?』阿彥笑一笑『點解既?』

「呀…無野啦…哈哈哈。」

順帶一提,雖然過去既我同阿理係行呢個方向去食自助餐,
但根據我自己既記憶,我同阿理都係無發現到係7-11既我同阿彥既…

即係…計返個時間…

歷史已經改變左?唔係掛…就係咁簡單?



『係啦…小蔚妳點解係尖沙咀既?』阿彥問

「下?」阿彥佢…唔係應該知嫁咩…係芷螢電話到…

定…佢係想試一試我?

「我…」唔通…我應該要講真話?

唔係…如果錯左…咪再黎多次囉…

「我係…黎買野…阿彥呢?」我嘗試反問

阿彥佢…又會點答呢…



『芷螢佢打比我…話係海旁有d野想同我講。』阿彥回答。

下?

乜原來…唔係芷螢叫阿彥黎撞破我同阿理…
只係…咁岩…咁好彩?
 
唔通…唔係芷螢爆響口?而係阿彥咁岩發現到...?
唔會既…我唔信…

係我思索更既時候,阿彥突然拖住我隻手

『行囉,小蔚。』

阿彥…隻手果然好溫暖…



『小蔚?』

「下…去邊?」

『去搵芷螢嘛。』阿彥講『既然小蔚都係到…就一齊啦?』

「係喎…」

但係…如果我都出現係芷螢面前,
咁芷螢原本想單獨同阿彥講既野…咪有可能唔同左囉?

但係我又好想知道芷螢講d乜喎…

『行囉…』

「唔啦…阿彥…」我同阿彥講

『小蔚?』

「我呢…其實…呃…」諗乜野藉口好呢?「係啦,約左紫晴。」

『下?』

「我約左紫晴一陣去睇書,係佐敦…就快遲啦!」

『咁啊…』

「而且芷螢係約你嘛,唔係約我。」我同阿彥講

『咁又係…』

「不過呢,唔好比我知道你同芷螢又想一齊返呀!」

『我同芷螢都無開始過。』阿彥笑一笑『亦都唔會開始,因為我已經有妳。』

「阿彥…」阿彥…阿彥…阿彥…阿彥…

因為已經有我...因為已經有我...

嗚…

同阿彥分別之後,我係阿彥發現唔到既距離跟住佢尾…
對唔住啦…阿彥…不過…為左知道真相…我有必要咁做…

然後阿彥,又沿住尖沙咀方向,過返我同阿理kiss既個條馬路…
一過馬路…阿彥佢拎起電話,dup低頭望…

咦?又係呢個位置…又係dup低頭…
呢種感覺…唔通…我上次用個陣…阿彥佢dup低頭個原因係一樣?

雖然時間唔一樣,但係做既野係一樣…

唔知點解…我有種奇怪既感覺…

唔會既…只係咁岩得咁橋姐…

唔好亂諗咁多啦...家蔚。