277.


『表…表哥!?』表妹衝入房『發生乜野事?』

「哇…連內褲…全部都係咁…咁薄…點著呀?」

『下,表哥你而家咪著更…』

「我以為係表妹妳嫁嘛!」我係堆衫入面…不斷搜索…



原本整整齊齊既衫褲 (女裝) 已經比我整到亂哂。

「仲有…件黑色外套呢…表妹送比我個件…」

『個件…』表妹稍微低下頭『會唔會係表哥你掉左…』

「點會呢!」我望住表妹,認真咁講「表妹送既…我一定唔會掉!」

去左邊呀…



『但表哥你唔係已經慣左著女裝咩…係…8月之前已經…』

「無錯我係有好感…又覺得女裝順眼…但我都無諗過會掉哂自己d男裝衫嫁嘛,
仲有..你睇下…呢件橙色外套…太鮮艷啦掛!」

『表哥…』

七分袖橙色外套…著出去一定比全世界 (男仔) 望住哂…



「唔得…遲下一定要出去買返d男裝內衣褲…仲有無咁鮮既衫…」我講…

『表哥…』

「表妹妳會陪我去買嫁可?」然後我望到表妹個樣

表妹而家…一面受傷既樣…眼淚都好似就快流出黎…

「表…妹?」

『嗯…搵日…出去買…』表妹細細聲講…

到底點解…我…我係咪講錯左d野…

『夜啦…我…我都係返去先,聽日再見啦。』表妹講



「下…係…我去開門...」

表妹走左之後,我一個人坐電腦台前面…回想返岩岩既事…

我到底…講錯左d乜野…
唔通…表妹知道左過去既我掉左件黑色外套…所以嬲左我?

唔會掛…唔會掛…
到底攪邊科呀…過去既我…點解要咁傷表妹…

點解…

我望一望電腦台,咁整齊真係有d唔習慣…然後…



我留意到一罐果汁罐…因為好大罐既關係…
所以特別顯眼…我記得之前無呢樣野…

「重要藥…勿掉?」我擰開罐糖…一面有一包包既藥…

藥包透明袋上面…寫住…男性荷爾蒙藥…隔兩日服一粒,
我有種疑惑…之前既我…係咪一直食更呢種藥?

如果我而家唔食…係咪會變得奇怪…變得想做女仔?
唔得…為左表妹…我唔可以有”想做女仔”呢個諗法。

所以,我倒左杯水,食左一粒,
到底效果會點…我諗好快就會知道。
 
*


 
一月二日,亦係假期 (好似係) 既最後一日。
起身個刻,難免有種失落感,

一來,我竟然要著住女裝內褲訓教,事實證明我根本習慣唔到,
二來,我原本明明仲有成半個月暑假可以放,但而家竟然變左聖誕假,仲要得返一日。
三來,聽日我就要返學,仲要用女性身份,返第二間學校...

呃…第二間學校…

從冰瑤琴日係醫院既講法,我係為左幫表妹所以轉入佢間學校…
估唔到個陣既我犧牲竟然可以咁大,

但既然可以為表妹做到呢步,
點解係成事之後唔去追表妹…要選擇一個男人…要選擇邦彥…邦彥…



邦彥…

哇…我又面紅啦…哇!

唔得…唔可以…

我唔可以鍾意男仔…

下午約定既時間,我去到老麥,表妹同冰瑤已經到左。

『感覺真係好懷念…我地已經好耐無係呢到聚會。』冰瑤講…

「真係…?我地…應該係話之前既我…同妳地係到聚會左好多次?」

『無錯…』表妹開聲『但近期已經無…因為…家蔚你有邦彥…』

咁我係咪即係有異性無人性啊?

「表妹你又叫返我家蔚…可唔可以叫嘉為…」

『唔得…』表妹講『我叫唔出…』

「點解喎…」

『因為之前既你就係想我叫家蔚!而唔係嘉為!』表妹堅定咁講

「但係…」

『好啦好啦,呢個唔係今日既重點…係咪?』冰瑤打斷我地講野…

「係…」『小瑤妳岩…』

『今日要同家蔚妳交代返妳失憶既所有事…然後…盡可能整理返個情況…
聽樂宜講芷螢佢唔見左…咁睇黎家蔚妳既失憶…同芷螢有好大關係。』

「下…」

『樂宜妳係咪已經同家蔚講左芷螢係未來人既事?』冰瑤問

表妹點點頭『但係家蔚佢…』

「咪住先!冰瑤妳真係信?未來人喎…會唔會我地都係比芷螢昆左咋…」

『即係家蔚妳唔相信。』冰瑤笑一笑『但妳一定要先相信,唔係就好難繼續落去…』

「呃…」突然間叫我相信,點可能喎?

『我既見解係…家蔚既失憶…係咪同芷螢既失憶原因係一樣呢?』冰瑤講

『下?』表妹好錯愕『即係…』

『時光旅行…我有種感覺…就係過去既家蔚妳…曾經進行過時光旅行。』

我好希望今日係四月一日,又或者…而家有電視台係隔離偷拍更,

因為…我根本想像唔到,
眼前既冰瑤會用佢一貫咁認真既作風,去講咁天馬行空既事。
 
「唔得…」我舉起手「真係太奇怪啦…我一時三刻接受唔到…」

『家蔚!』表妹認真咁望住我『既然你都接受到自己男變女…點解會接受唔到呢點…』

「我接受唔到嫁!」我同表妹講「我既理念係要變返男仔…」

『家蔚…你真係要…』表妹接住講『變返男仔...?』

「係…我堅持。」

『咁樣…邦彥…』

「唔好再提佢個名…一聽到我就好頭痛…」

而且個心都會怪怪地…怦怦咁跳動…
唔得…我唔可以咁比自己咁…好奇怪囉真係...