278.


『唔…』冰瑤若有所思咁點點頭『家蔚暫時接受唔到都係無辦法。』

『下…冰瑤…』

「嗯…冰瑤妳明白就好...」

『但如果家蔚妳唔肯去接受…即係妳就要放棄呢五個月既自己。』



「下…放棄…呢五個月既自己?」

『對我地黎講…呢五個月係真真正正發生過,對過去既妳都係,妳係咪真係捨得放棄呢?』

「下…妳突然咁問…」

呢五個月…我無同表妹一齊…同左另一個男仔一齊…
而且...好明顯想永遠做一個女仔…所以先掉哂自己既男裝衫褲…



咁樣既過去…雖然唔係話一定想放棄…但要接受都…唔係咁容易…

「我…我真係唔清楚…」

『咁就等家蔚妳自己清楚自己想點…先繼續呢個話題啦。』冰瑤溫柔咁一笑

「冰瑤…」

『但係…小瑤…』表妹雙手撐住台面彈起身,相當激動..



『我覺得而家就要迫家蔚妳去接受,真係太快。』冰瑤講『妳要明白呢點…』

『雖然係咁…但係…』

『太著急只會適得其反…』冰瑤繼續講『定係樂宜妳有其他個人理由呢?』

「個人理由?」我疑惑「表妹?」

『無…』表妹回應『點會呢...』搖搖頭

「表妹…妳真係咁想我做女仔?」我嘗試問…

『唔係我呀…』表妹講『係家蔚…過去既家蔚…佢一定都係想繼續做女仔…』

「過去既我…」



清楚自己失憶個刻,我曾經以為係上天比我既一次機會…
去將之前做既錯事修返去正軌…但到依家呢一刻…

我失憶…係好事定係壞事…我已經再唔清楚。
 
『好啦,呢個話題就到呢到先好唔好?』冰瑤講
『重點係…聽日開學,要點先可以幫家蔚容易去面對。』

『嗯…無錯。』表妹緩緩坐返低『因為學校個邊唔知道家蔚失左憶…』

「唔可以照直講?」

『唔係唔得。』冰瑤回答『只係唔知道咁做會唔會帶來唔好既情況姐。』



「下?」

『我建議...係先唔好公開呢件事住,』冰瑤若有所思咁講
『樂宜妳去同其他人知道既人講…叫佢地千其唔好講出去…』

『嗯。』表妹點點頭

「點解要咁秘密呢?」

『聽日,家蔚妳就會知道。』冰瑤講『如果情況同我諗既係一樣既話…』

「唔…」冰瑤又係一如以往咁神秘…但我相信冰瑤。

之後冰瑤又用左半個鐘時間,教下表妹點樣協助我等等…



「咪住先…即係…我要著女裝校服?」我不敢相信咁問一問冰瑤…

女裝校服…薄薄既一層…下面又涼浸浸…
就好似出院個日著既連身裙一樣…

冰瑤只係無奈咁笑一笑『而家感覺真係好似所有野重新黎過咁。』

『完全唔好笑囉…我唔想咁…真係唔想…』表妹接住講

『我諗…係搵到芷螢之前,我地的確做唔到d乜野…』冰瑤講

『芷螢…嗚…』原來情緒已經壞壞地既表妹終於喊起上黎…

亦因為咁…今日既討論就咁完結左…我地又約好聽日再見,
同冰瑤道別之後,我送完表妹之後…一個人行返屋企…



芷螢…係呢件事既關鍵人物…
搵到佢…就有可能回復返記憶…呢個係冰瑤既見解…

如果回復返記憶…就會記返起同邦…邦彥既野…
我同邦彥…拍更拖...而且…仲做左好多事…

會唔會…哇…真係個d事…都做左?…哇,應該唔會掛?
就算過去既我點接受到做女仔…都唔會咁快獻身掛?

唔會掛?唔會掛?唔會掛?

就好似夾好一樣…
當我行到去屋企樓下個陣,邦彥佢…企係大門外面…如無意外係等更我。

『小蔚。』邦彥用溫柔既語氣講

點解…「小蔚」呢兩個字明明係陌生嫁嘛…但又好似聽過好多次咁…

「唔得…」我低下頭「可唔可以叫返我家蔚?我會開心d…」

『唔得…我唔可以咁叫…』

「點解喎!」

『因為小蔚就係小蔚!』邦彥佢嗌出黎



「我失左憶啊!」我回嗌「我只係記得你叫我家蔚既時候!所以…」

我唔理邦彥…逕自係佢旁邊行過…

『我唔怕重新黎多次…由認識小蔚妳開始…』

我唔想聽…唔想聽…

『總有一日…妳會接受我叫妳小蔚…仲有…妳會叫返我阿彥…』

唔好再講...我唔想聽...

『然後...我地又會再一齊返!』

我行入大堂…邦彥佢無追到黎…
我無回頭,亦唔敢回頭
 
點解我會流眼淚點解
 
過去既我你同邦彥到底係乜野既關係?
 
*
 
依一晚,我只係求其整左個即食麵食…
食完就開始上網,盡量了解返呢五個月既事...

我有留意到我之前用陳家蔚身份開既fb…真係多左好多相…
雖然差唔多全部都係阿kay tag既我既…學校生活…陸運會…

下…原來我參加左啦啦隊表演?點會…
仲有…拎獎杯個陣我仲同明顯係學生主席既人同台…

我何德何能啊…我根本就無可能參加啦啦隊嘛…
然後係唔同既食飯活動…聖誕聯歡…

呢五個月…真係發生左好多事…
我仲要係以女生既身份完美咁融合係依個新生活…

唔通...只要我嘗試下去做女生…我既世界就會唔同好多?
識到好多朋友…參加左好多活動…仲…仲有拖拍…

邦彥...

『然後...我地又會再一齊返!』

哇!?我做乜又諗起佢啊!?
痴線痴線痴線!

思緒混亂到極點既我,決定關左電腦佢…早d訓。
賭個一絲希望,希望失憶前既我…可以報夢教我聽日應該點做好…

當然…就無夢報到。