283.


『家蔚…我都知道妳係到猶豫更乜。』冰瑤講『但妳要記住妳而家係女仔…』
 
「我…我係女仔…」的確…但係…
 
『而且你同邦彥仲要郎才女貌!好多老師都係咁講嫁!』
 
「下…老師都講呢d野?」我驚訝「不過…郎才女貌呀…」


 
邦彥…邦彥…
點解呢…有d開心咁…
 
『係啊!係學校一文一武既代表!』
 
「真係?」
 
邦彥…邦彥…邦彥…
 


咦…呢種感覺…好似咁熟識咁既…
 
邦彥…天台…告白…
 
「啊…我醒起一樣野啦!」
 
『嗯?』
 
之後我將我記憶另外消失左兩日件事同冰瑤講…
 


佢地兩個聽完都沉默左…
 
「有無…乜野想法…」
 
『小瑤…會唔會係芷螢佢…』
 
『好大可能…』冰瑤講『最衰家蔚失左憶…如果唔係…我其實想知道多d關係小芋既事…』
 
「小芋…?」
 
『就係樂宜生日黎既女仔…』
 
乜水?
 
『我硬係覺得個小朋友有d野…』冰瑤講『可惜…』搖搖頭…



「我完全無印象…」小芋…芋頭?

『家蔚…其實我有諗過。』冰瑤態度突然好認真『有無打算去催下眠?』

「下?催眠?」

『係喎!』表妹突然好激動『一定得姐!』

『無錯…搵返記憶既其中一個好方法…』

「呃…但係我無錢喎…」

老豆寄比我既錢邊可能夠催眠呢…



『我…應該話係kevin既朋友,應該可以幫到家蔚妳。』冰瑤講『當然係免費。』

「咁樣…但係好似怪怪地咁…」

而且kevin既朋友喎...我永遠忘記唔到kevin對我做既野嫁...佢朋友會唔會都...

『但家蔚真係想一直係咁?乜都唔清楚…乜都唔了解…』

「呃…經過呢兩日…我的確…有少少轉變…」

想知道更多…同邦彥…既野…
啦,唔係因為gay啊,只係想了解多d咋!

然後到時再作決定…



決定乜鬼喎!痴~線!

但如果我記起返D野…係咪就唔會再對表妹有感覺呢…
唔知點解…我唔想…我真係唔想…

『既然家蔚決定左既話…咁我就打去預約啦。』冰瑤邊拎起電話邊講…

「下…但係…」

『家蔚…真係好機會黎嫁!』表妹講

「咁樣…」

如果表妹都想…既話…



「好啦…就…就試下。」

試下姐…都未必成功嫁嘛?係咪?

令我估唔到既,就係第二日夜晚就即刻可以見個醫生…

「下咁快…我未有心理準備喎…」

『呢d事係越快就越好。』冰瑤認真咁講

『係呀…唔拖得!』表妹比冰瑤更加認真…

「但…一個人…」

『我地會陪家蔚妳嫁嘛!』表妹講

冰瑤點點頭…

如果係咁…

「好啦好啦…」

催眠師…希望行得通啦。
 
第二日夜晚,去到診療室樓下個陣我真係好緊張…
心跳得好利害…雙腳微微顫抖…
 
到底個醫生會係男定女啊…仲有…過程係點…會唔會有後違症嫁…
種種既疑問…都令我唔敢再踏出一步…
 
『家蔚…頂住啊…』表妹係旁邊鼓勵我…
 
點解我會失憶喎…唔失憶咪唔洗煩咁多野囉…
終於…半拖半就抵下我都係去到診療室門口…
 
開門既係一個好後生既女醫生…歲數…我諗大約都係二十七左右…
雖然帶住眼鏡,但都睇出佢五官係好端正同完美…
 
『啊,冰瑤好耐無見啦,』個個女醫生微笑住同冰瑤講
 
『嗯。』冰瑤回應,不過態度有少少冷淡。
 
然後…
 
『妳就係陳家蔚?』個女醫生望住我…
 
「唔…呀…係…」差d緊張到開唔到聲。
 
『然後妳係…』
 
『王樂宜…我係家蔚既表妹。』表妹講
 
『唔,妳地三個入黎啦。』
 
入到去診療室,個感覺果然好似無間道梁朝偉去見kelly個度咁…
不過就無咁高級啦…地方亦無咁大…
 
靠窗既位置應該係醫生既寫字台…
而正中央…好明顯有一張好大既躺椅係到…
 
一陣…我會訓上去?然後…比佢催眠…
 
『係咪好緊張?』個女醫生問…
 
「小…小啦…哈哈…」唔知點解呢…我硬係覺得呢個女人有少少熟口面…
 
『其實好輕鬆,而且一d都唔難。』個女人坐返自己個寫字台上面
『啊我都唔記得自我介紹tim…我叫做文冰韻。』
 
「文…冰…」
 
『韻?』表妹幫我講埋…然後我地兩個同時望住冰瑤…
 
咁即係…
 
「下?」『耶!?』我同表妹驚訝大嗌…
 
『無錯…我就係文冰瑤既姐姐。』冰韻笑一笑
 
唔怪得熟口面啦!一來髮型唔同(冰韻係黑長髮),而且冰瑤無帶過眼鏡,
如果冰瑤帶左眼鏡,或者冰韻除左眼鏡…根本就有7,8成相似!
 
『嗯。』但冰瑤都係好冷淡…
 
我記得冰瑤明明係電話到話係kevin既朋友…
但結果…係佢姐姐…
 
而且…佢一直都對冰韻好冷淡…
 
唔通…佢同佢姐姐關係係唔多好?