294.


行到去羽毛球場個陣,佢地大概已經開左波好耐
 
『咁遲嫁!家蔚!』阿kay一見到我即刻講…
然後…佢張大嘴吧…愣住係到…球拍應聲倒地…
 
『家…家蔚…』紫晴都好驚訝…冰瑤即係微笑…
 


點解會咁呢…
 
因為…我同阿彥…而家係手拖住手…
雖然有少少尷尬…但我唔在乎啦…
 
然後我望到表妹…
 
而家既佢…令我諗起琴日既紫晴…
 
係一樣嫁…一樣笑得咁燦爛。


 
係呢一刻我下定左決心…今晚搵冰韻…
我一定要搵返其餘…同阿彥既記憶。
 
我同阿彥手拖手行到去羽毛場中間
同表妹佢地集合埋一齊…

『家蔚你…』表妹正想開口…

『表姐!』但係比阿kay打斷左『妳妳妳…』


佢不敢相信咁望住我同阿彥拖住既手『記憶已經全部返哂黎?』

「未…未呀…」我頭dupdup「不過而家既記憶已經好夠。」

起馬我知道返我在意阿彥既原因…令到我唔會再抗拒...呢種感覺...

『咿~~~~』阿kay好激氣『可惡可惡可惡…』細細聲喃喃自語

『太好啦…家蔚…』表妹好開心『真係太好啦!』

『家蔚…今次一定要得到幸福!』紫晴向我同阿彥講

「多謝妳地...表妹...紫晴...」

『總算…』冰瑤即係語味深長咁講左句…



「咁我…同阿彥過去坐先…我…我想同佢傾下計…有…有好多野想講…」

包括…

「對唔住…阿彥…」坐係長椅到…我一開口就同阿彥咁講

『下?點解要道歉…』

「我之前…個態度一直對你咁差…仲覺得你煩…」

『唔…』阿彥搖搖頭,溫柔咁微笑『我事實的確有d煩既…』

「但你係為左我嫁嘛!而且…今日又比你救左…
係啦…點解阿彥…會咁岩係個度既…明明射箭場都未開始活動...」



『啊…其實…』阿彥唔知點慌張起黎…

「阿彥…?」

『其實我一發現到有兩個人鬼鬼祟祟跟住小蔚之後…我就跟住係佢地後面…』

「下…?咁即係…」原來我無估錯?阿彥真係有跟住我?只係性質有少少唔同...

『但個兩條友一直都無出手,所以我都唔方便出黎…』

我既美好情緒突然有少少變調…
即係阿彥…阿彥阿彥見到我同阿澤阿沖講我愛你囉!?尷尬死啦!

「咁阿彥你咪同冰瑤一樣…都係見到哂成個過程囉?咁點解唔一早就出黎幫我…喎!」



『我有…!』阿彥連忙解釋『但正當我想出去個陣…就比妳細妹阻止左啦!』

「下?冰瑤…」

『係…佢話叫我睇定d先…之後就拎起部攝錄機開始拍…』

「然後…」

『等到咁上下…係…係小蔚妳同佢地講完個句野之後…佢就叫我準備…之後…』

係計好既時間…阿彥衝出去打飛左阿沖…
亦因為時間同事件咁準確…我既部份記憶先回復到…

冰瑤…真係乜都比妳計盡哂!



「咁…既然係冰瑤要求既…」我撇過頭「今次就原諒你啦!」

『但小蔚妳好似仲唔係幾開心咁既…』

「邊有呢…哼!」

『仲哼tim…』

「我只係介意我同個兩個人講”我愛你”比阿彥聽到之嘛…仲要兩次…兩次...」我怕怕羞…細細聲講

『小蔚…』阿彥突然捉實我雙手『咁一於公平d啦…』

「下…」

『我愛妳…』阿彥突然開口講『我愛妳…小蔚。』

阿...阿彥...

『咁大家都係兩次啦...』阿彥嘴唇...又慢慢接近...

然後又係一吻。
 
阿彥…

嗯…邊有得咁計喎…

但係…

嗯…好開心...

『激死人啦!!!』突然有人係旁邊大嗌嚇到我同阿彥縮返開…

係阿kay…

『拾羽毛球就拾啦!係到大嗌!』遠處既表妹不滿咁講

『妳唔明乜野係眼怨嫁啦!!!王樂宜!』

『下!?』

然後我同阿kay對望…

『一陣比老師見到你地嘴對嘴就麻煩啊!』阿kay同我講

「係…係喎…而家都算係返更學…」我四圍張望…好彩…無老師係到…

不過有少量學生岩岩應該有望住我地…
而家都不約而同唔好意思咁撇過頭。

「最衰都係阿彥你呀…而家…」

『我唔介意喎…』

「我介意嘛!」

『小蔚介意我錫得太少?』阿彥開玩笑咁講

「口花花!」

『小蔚既感覺終於返黎啦。』阿彥好似鬆一口氣…

「下…」比佢咁講一講我又面紅「我之前都係咁咩?」

之後既時間,都係我同阿彥係周圍散步…傾計…(阿kay好唔滿意)
雖然同之前一樣都係行…但今次係兩個人…感覺呢...真係好唔同…

係一種淡淡既幸福感覺…

去到指定既時間,我同阿彥就行返去集合既地點,
因為會進行班會活動…大概表妹之前同其他主席傾既野就係呢d吧?

至於活動,都無乜特別事情可以講…
玩既野都係意料之內…

好快好快…時間已經到五點…
我地又重新係大球場集合…登上回校既校車…

有少少唔同既…今次坐我隔離既阿彥…

『小蔚…攰唔攰?』

「嗯…少少啦…」

『如果攰既話…我肩膀隨便比妳訓…』阿彥溫柔咁講…

而家呢,我完全理解到點解之前既我對阿彥咁著迷…
因為佢就係咁…一直都咁溫柔…一直都咁…愛我。

「我先唔…會訓啊!」話就咁話…但我個頭已經放左係上面…慢慢合埋眼...

口裡說不…身體...嗯...原來我都係呢種人。
 
*