305.


『哦…你爸爸就係咁同你講?』

「嗯…但我根本就唔明,冰瑤阿姨明唔明?」

『唔知呢。』冰瑤阿姨專心整更個個越睇越似頸鏈既野…

「冰瑤阿姨咁聰明,點會唔明喎。」



『咁我無理由知道我真係唔知既事嫁嘛。』冰瑤阿姨無奈笑一笑

「唔…算啦,咁係咪講得呢樣野係乜野黎啦?妳琴日答應我嫁喎。」

『呵呵,智影你聽完千其唔好周圍講呀。』

「一定啦,冰瑤阿姨唔係信唔過我嘛。」

『唔係唔係,只係今次有少少唔同姐,因為呢樣野…』


冰瑤阿姨小心翼翼咁拎住條頸鏈…慢慢行近我…『如無意外…會係一個時光機。』

呢個時候既我,完全估唔到…
因為爸爸唔清唔楚既一段說話,同眼前冰瑤阿姨既疑似時光機…

會影響得我地幾咁深遠。
 
「時…時光機?」

係聽完頭幾秒,我有諗過冰瑤阿姨係唔係講笑,甚或係終於研究到傻左,


但係…佢係冰瑤阿姨喎?全知全能既冰瑤阿姨...

而且從佢既神情黎講…一D都唔似講笑…

「即係類似多啦a夢個隻時光機咁?」個隻機械貓...坐既個部大機械...

『唔…類似叮噹個隻,不過用法同理念都唔同…』

「下?到底點整嫁?同埋點用嫁?」

『點整既話…我點講小影你都唔會明嫁啦,你太細個啦。』冰瑤阿姨拍拍我個頭…

「咩喎…」

『至於點用,小影有無一d過去既野想改變?』



「下?乜都得?」

『嗯。』

「唔…諗諗下…其實都係好小事…而且都…啊…」

答案係有,但個樣野真係改變得到?

『只要真心真意想改變一件事個陣,呢條頸鏈就會發動嫁啦。』冰瑤阿姨笑一笑

「咁冰瑤阿姨又有無啊?想改變既事?」我嘗試反問

『我?』冰瑤阿姨有少少愕然『嗯…唔知呢?』



同平時一樣,都係向我懶神秘,呢個就係冰瑤阿姨既風格。

*

「爸爸,我要聽故仔。」

係食完飯之後,
爸爸休閒咁坐係梳化上面 (難得既景象) 睇更相簿,而媽媽就洗更碗。

『係喎…我都好耐無同智影你講過故仔…』

啦,我要聽既故仔,就當然唔係細路仔時期個d三隻小豬,灰姑娘故仔啦,

我要聽既,係爸爸成日強調係真人真事…
話係由佢同媽媽、冰瑤阿姨佢地一齊經歷返黎既故仔。



你地問我信唔信係真人真事?
我更係唔信啦,大部份既偵探故事,仲有多重人格呢個都算啦,
交換身份啊,影像分離啊,消失既派對啊,呢d現實根本就唔會出現。

我十四歲嫁,唔係四歲,唔會天真到相信呢d野。

不過呢,因為爸爸每次都講得好精彩同鍾意吊人癮,
所以係爸爸去澳洲之前,聽佢講故仔已經係日常既親子活動黎 (媽媽成日都聽埋一份)

佢仲成日講啊,有個超級真人真事,
而且仲係大長篇既故仔未講,不過要等我大個先講喎…

『故仔啊…』爸爸講



「我想聽啊…」我坐係爸爸隔離,望住佢個相簿…

爸爸睇更個頁…係一張好大既合照…而其中一個…

「咦…呢個人咪係?」

『智影都有印象?』

「嗯…我記得每次爸爸媽媽你地都會經過…佢就係個個人?」

『嗯。』爸爸微笑『佢係…你爸爸一個好重要既人。』
 
「…重要過媽媽?」我嘗試問

『點會呢?樂宜…你媽媽先係我最重要既人…』

「咁媽媽同我邊個重要?」

『喂你成日問埋呢d咁難既問題既?』然後爸爸調細個聲量『更係你重要過樂宜啦!』

「係重要就唔會成日拋低我走左去…」我喃喃自語…

『嗯?』

「無野啦!今日都係唔聽住啦!故仔…爸爸…聽日放假不如帶我去海洋公園?」

『海洋公園…』

『海洋公園!』媽媽係廚房到衝出黎『我想去啊,我要玩新個個過山車!』

『又玩?唔係掛?』爸爸難以置信咁講

『個個好正嫁,135度傾斜喎…』媽媽好興奮咁講『之後仲有...』

『痴線?咁個人咪會跌出黎囉?』

『有野撐住嫁嘛!白痴老公!真係跌你360度旋轉個陣都跌啦!』

『根本唔係人玩!』

「爸爸我想玩…」我嘗試插嘴…

『啦,智影都想玩啊!』樂宜用勝利既語氣講

『我咪最多係下面買定雪糕等你地…』

『智影,呢個就係你爸爸啦!超~無用!』

『下!?』爸爸彈起身『玩囉!我就同妳玩!仲有,決鬥!邊個嘔先輸!』

『哈哈哈!』媽媽叉住腰『你輸硬囉!』

『智影,一於聽日去!』爸爸好熱血咁講

「兩個大細路…」我細細聲吐糟

不過都好,終於可以一家人去玩啦。

但第二朝,當我好開心咁彈起身個陣 (唔洗人叫)…
爸爸佢…係廳到拾更衫褲…媽媽幫更手。

「咁…咁即係點?我地今晚會住酒店?」我問媽媽

『智影…』媽媽表情都有少少失望

『等我講…』爸爸溫柔咁笑一笑『智影,
對唔住啦…我…今朝收到電話,要即時趕返去澳洲個邊。』

「咁…咁樣海洋公園…同…同比賽…」

爸爸搖搖頭『等我下次返黎…我會同佢地講返黎耐d…到時,再一齊去好無?』

「講大話!」我大嗌「明明應承左人…」

明明…答應左人去海咩公園…明明…可以返黎耐d…
但只係得兩日…之後又唔知…幾耐先…可以…見到...嗚…

「大衰人爸爸!」嬲同失望同時湧上心頭既我,跑返入房反鎖住門…

點解要去澳洲喎!如果…嗚…
如果可以令到爸爸唔再去澳洲…我乜都願意做嫁嘛…嗚…咦…?

『至於點用,小影有無一d過去既野想改變?』

係喎...只要...改變過去...用...冰瑤阿姨既...

時光…機...咪得囉?
 
*