311.


『芷螢…』一返到屋企…”媽媽”就好激動咁企起身『芷螢!』

一面擔心咁神情…之後衝埋黎攬實我…

『芷螢…嗚...你終於返黎!擔心死媽媽啦!』

「啊…」因為”媽媽”高過我…所以我個頭只係到佢個胸既位置…



咦…好大…真係好大…好軟…同媽媽比起…

喂!你係到諗乜變態野呀!

哇!對唔住!

唔好對人地個媽媽諗埋D奇怪野呀!

但佢程度上都同我有關係…我個邊…佢係我爸爸…



我先唔接受囉!

咁我...都接受唔到佢突然變左我媽媽...

唔理啦!仲有呀係咪應該同媽媽講返呢件事?

下?

身體比你佔領左呢件事



『芷螢…所以…所以呢…』”媽媽”望住我『冰瑤有無解釋到係乜野事?』

如果只係一兩日既話…或者…唔好令佢地擔心會好D?

智影你又有道理。

「冰瑤阿…姐姐佢話我只係比奇怪既夢影響到…比左D藥我食之後就無事啦。」

『真係?』

「係啦…哈哈哈…」

我講野唔會哈哈哈嫁!喂!仲有要溫柔d啊!



一...一時三刻學唔到囉!而且...應該唔會咁易察覺到掛?

但係...『呃…』”媽媽”佢盯住我…一面不相信既表情…

媽媽一定發現到D野啦!你好失敗呀!

啊!一定係比媽媽傳染左…

「我…」留多係到一秒都係好危險「我都係返入房先…嗯…換衫…」

但係隻右手突然比人捉住…

『芷螢…妳講大話。』”媽媽”用非常”冰瑤阿姨”既口吻講

「下…下…」



你越慌張就越容易穿崩呀!

我已經好努力啦!

『呢個情況我曾經見過…妳唔係我個女…妳…妳係偽芷螢!』

「點…點會呢…妳…妳妳妳唔信…問我問題我會識答嫁…」

『問問題係無用!當年已經試過!偽人格會有真人格既記憶!』

同爸爸個故事一樣...
唔通…唔通…爸爸講既多重人格故事…係真既?

『我…我都唔想綁住我原本個女…但如果妳唔話比我知妳存在既目的…


我…我就唯有咁做!』”媽媽”表情超級堅決咁望住我…

點解會攪成咁嫁? 媽媽好得人驚啊! 我同芷螢同時反應。
 
『妳話…妳唔係我個女…而係…』

「妳個仔…」

因為我同芷螢都唔想比”媽媽”綁既關係,所以唯有講出真相…

『唔會嫁…妳而家明明仲係女仔…又唔關前世事…點解…』

「講起上黎…係好複雜…總之…我原本應該係男仔…爸爸係你…媽媽係王樂宜…」

『就好似今朝咁講咁?』



「無錯…」

『估唔到…我同樂宜會…點解既?』

「下?」

『我同樂宜…應該唔會一齊…』

「我唔知...總之...就係一齊左,妳記唔記得…2012年1月9日既事?」

『1月9日…即係…』

「個日…係咪有個男仔…突然叫妳去修頓球場?」

『雖然…印象有少少模糊…但…但又好似…有呢件事…』

「其實…個個就係我。」

『唔…唔係掛!?』”媽媽”好激動

「嗯…大概…就係因為咁…先會改變左歷史…」

『下…』

「妳…」我始終叫唔出”媽媽”「妳當時點解會係尖沙咀?修頓球場明明係灣仔。」

『我個日...因為要作出一個好重要既決定...
而尖沙咀...曾經影響得我好深遠...所以我就打算係尖沙咀作呢次決定...

希望…個個地方可以比到啟發當時我…然後…就遇到你…
點解一個我唔識既人會知道我猶豫更去唔去修頓?呢個唔通係上天既決定?

所以…我…就下定決心…去修頓球場…』

「咁去到修頓個陣…係咪…」

叮噹叮噹叮噹…係呢個時候…門鈴響起…

『應該係…老公佢返黎啦。』”媽媽”企起身…行埋去開門…

我突然醒起…原來我唔記得問芷螢而家既爸爸係邊個…

鋼閘一打開…行入黎個個人…
好高…比媽媽仲要高…而且…好熟口面…

大合照…爸爸話佢個個好重要既朋友…

媽媽錫佢臉頰一啖…『辛苦哂啦,阿彥。』
 
原來佢叫做阿彥…係喎...邦彥…簡稱阿彥都好正常…

『買野咋…點會辛苦呢。』”爸爸”佢向”媽媽”溫柔咁笑一笑…

話就咁話…但我望到佢雙手既一袋二袋,明顯係相當重。

『係啦,芷螢,爸爸有買到妳最鍾意食既泡芙。』然後”爸爸”望住我

真既!?哇!好開心...出唔到聲

『芷螢…?』"爸爸"見我好似無乜反應...

喂,應爸爸啦!

「係…係啊…哈哈哈…」

都話左我唔會哈哈哈嫁囉!

『芷螢點解有少少奇怪既?係咪媽媽突然講左d奇怪野呢?』”爸爸”問

『唔係…無呢回事…哈哈哈…』”媽媽”尷尬咁講

我開始相信你講既野係真我媽媽真係你爸爸因為你地都鍾意哈哈哈。

我係咪應該開心?

食飯個陣我都好小出聲…”媽媽”都明顯係有幫我瞞到…
務求令到”爸爸”唔會知道呢件事…

自己個女比一個男仔控制住身體喎…我估…一定好難接受…

食完飯,準備沖涼訓教既時候…

『芷螢…』”媽媽”坐係我隔離細細聲講『不如我幫妳沖?』

「下?」我驚訝…

『始終…雖然我自己覺得問題唔係好大…但真正既芷螢佢應該會想咁做…』

係啊係啊係啊!!! 芷螢好激動咁嗌…

下?

涼一定要沖嫁嘛!但比你自己沖咪會見到我...我個裸體囉!我要媽媽幫我沖!

「佢…佢係同意…」我照直講

記住叫媽媽幫我朦住眼啊!

知啦知啦!大小姐!

『咦…難得兩母女會一齊沖涼喎?』”爸爸”笑笑口咁講

『親子同樂嘛!』”媽媽”回應『可?芷螢。』

「嗯…」