317.


呢日,我基本上全日都躺係床上面休息 (媽媽要求),
咁都好…可以比到一個寧靜既空間我去思考…

到底,錯係邊到?

我明明已經阻止左陳家蔚去修頓…唔通,其實話阻止左只係我同芷螢既一相情願?
可能…佢係我走左之後都係決定去修頓?



但又唔岩…如果佢趕得切去修頓…
結果就應該無變到…我應該仲會係賈芷螢…而唔係而家既陳芷螢…

完全諗唔通…

*

第二朝,因為燒一早已經退左,所以媽媽堅持我要返學。



『妳要知道,請兩日請假好麻煩嫁!』拋低呢句之後媽媽就關埋門,

而我…就呆呆咁望住床上面既女裝校服…仲有…內衣褲,

點算好?芷螢唔係到...我點敢...
點敢睇女仔既身體喎!我係男…男黎嫁嘛!

『遲到都唔得啊!』門外面又傳黎媽媽煩人既呼喊…

就因為咁,琴日係巴士到見到媽媽既感動已經不知不覺煙消雲散,


不過,我都好慶幸…媽媽仲係媽媽…

但咁樣唔夠...

我鼓起勇氣…慢慢除左件睡衣…赤裸上身..
雖然房入面無大鏡…但當我微微向下望個陣…應該見既都見到哂…

隆起既胸部(應該比賈芷螢細)…左右各有一點粉紅色既蓓蕾…
我發現我既驚訝…只有佔左非常短暫既時間…好快就沖淡左…

大概係因為賈芷螢…十四年女性生活既記憶…無意中影響到我…
所以...換衫赤裸身體根本就唔係一件奇怪既事,

亦因為咁…所以係戴bra既過程,都意外地輕鬆…換女裝校服都唔例外…



咁到底係好事定壞事?我唔清楚…

『黎,食完早餐就出去啦,洗唔洗媽媽送妳?』

「唔洗。」我搖搖頭…

因為…雖然係對唔住媽媽,但我今日唔想返學,換衫只係權宜之計。

*

『小螢…?』冰瑤阿姨佢疑惑咁望住我『妳今日唔洗返學咩?』

雖然冰瑤阿姨係絕頂聰明,
但佢始終無辦法從一眼就睇清哂我之前既經歷…我唯有每次都重新講過…



所以…我真係好希望今次會係最後一次…

「冰瑤阿姨…」我堅定不移咁望住冰瑤阿姨「我…唔係陳芷螢。」


芷螢…妳同我講個句『加油哦。』我而家清清楚楚咁回答妳…

「等我。」
 
*
 
就同上次以賈芷螢既身份一樣,我將所有發生既講比冰瑤阿姨知道。

『嗯,我大致攪清楚。』冰瑤凝視住佢手上面條頸鏈
『估唔到我個時光機竟然可以做到呢種程度。』



「但正正係因為呢個威力…我先攪成咁…冰瑤阿姨!
所以我而家...係黎希望再用多次時光機…將所有野回復正軌…」

『小螢…』冰瑤阿姨望住我『我…應該係話之前既我…
有無同你講過,用時光機有可能帶來乜野既壞既影響?』

「有。」我點點頭「頭暈…頭痛…甚至可能會更嚴重…但我唔理得咁多!」

『知道有呢d副作用…你都係堅持用?』

「嗯…因為…我已經同...一個好重要既人約定好。」

『小螢…咁樣既話,我唯有支持你。』冰瑤阿姨溫柔咁微笑



「冰瑤阿姨…多謝!」

冰瑤阿姨慢慢行埋黎…但佢突然停係到,好似醒起一樣野咁

『小螢…交比你之前,我要先問你一樣野。』

「係…」

『你雖然知道有呢d副作用…但你有無已經開始有呢d徵症?』

「下?有…係上次接過時光機個刻…我…我差d以為自己係賈芷螢既本人…
仲有…之後都間唔中有少少頭痛咁…不過…應該係小問題?而家都無乜事…」

『呃…』冰瑤阿姨若有所思『咁樣既話…你企係到等我一陣。』

冰瑤阿姨轉身行去寫字台到坐低…
然後拎起一張白紙…係到唔知寫更乜…

等左一陣…

『帶埋去。』冰瑤阿姨將一封信交比我

「下?」我疑惑…

『正常小螢你係用唔著。』冰瑤阿姨講『我亦都希望你唔係用到…不過,帶係身。』

「嗯…」我將封信放入袋到。

『咁樣…』然後佢重新拎起條頸鏈『加油啦…』

放係我手上。

冰凍既金屬質感接觸到皮膚個刻…
個種熟識又陌生既感覺又開始傳到腦海…

熟識係因為都係相似既走馬燈模式,
而陌生...係因為片段…幾乎全部都未曾經歷過。

陳芷螢…十四年既女仔生活,
同賈芷螢完全唔同…同陳智影有微妙既相似既人生…

正透過片段傳入我腦海…

今次無芷螢提醒我…我一定要自己攪清楚…我到底係邊個…
 
『小螢…』耳朵傳黎冰瑤阿姨模糊既聲音

喂!芷螢!唔好走咁遠啊!一陣有拐子佬啊!

知啦!媽媽!哈哈~

我…我係陳智影…

『無事嘛…』

妳爸爸去澳洲係幫人嫁嘛!芷螢妳或者再大d就會明白。

但係我好掛住爸爸

唔係陳芷螢…亦唔係賈芷螢…

媽媽咁點解妳唔跟埋去呢?

下?傻女,因為媽媽最重要既人係芷螢妳嘛!

我…我係男仔…

不折不扣既男仔…

然後…我要回到既時間…

我要改變既過去…

…咦…?

係幾時…?
點解…我腦海…突然…會一片空白?

所有關於時間既概念...都變得好模糊...
隱約記得係…單…單數既月份…單數既日子…

地點...尖…尖沙咀…

年…年份呢?

201…201幾…諗清楚啊!陳智影…
你明明記得自己個名…記得自己個身份…點解偏偏…

會唔記得最重要既時間…

記憶混亂同失憶

唔通…我而家就係咁…

醒啊…醒醒啊…智…

智…

*