319.


原本我仲以為…只需要等好短既時間…就會有一個女仔或者一班女仔走埋黎同我講
『喂!芷螢!』『咦?點解今日唔返學既?』『好擔心妳啊!』等等既說話…

但轉眼間已經來回行左十分鐘…無一個女學生,
有意圖或企圖咁走埋黎同我講野…就算係望落同我差唔多年齡既都係一樣…

男學生都好啦,我無所謂黎嫁…總之識我就得…



但無,一個都無…我就如一個小石頭一樣,
無人注意到我既存在,無人為我既存在感到疑惑…

但咁講又唔岩,我注意到企係大門口既女老師,開始有少少疑惑咁望住我…
再係咁落去佢就會行埋黎問我做乜事…唔得唔得…

所以我改變策略,決定企係到扮傾電話…傾電話無問題啦?…哈哈哈…

如是者就過左十分鐘,


原本洶湧既人群已經走得七七八八…餘下既係間唔中離開校園既一兩個人…

「無…無可能…」我DUP低頭…感到好難以置信…

點解會無人走埋黎同我講野嫁?無理由嫁嘛…
唔通…我係學校係無存在感…或者…係剋人憎既存在…所以…所以先咁?

『嗯…同學?』一把女聲突然傳到我耳邊…

「係…」我雙眼發光,終於有人識我啦!「妳係咪識我嫁?」



岩岩企係大門口既女老師。

『識妳?』女老師疑惑,之後搖搖頭『我無印象,所以先有少少好奇…』

死火。

「啊…哈哈哈…」我完全唔知點回應好…

『從妳個樣望…應該係中三或者中四?』女老師講『點解妳會企係到既?等緊人?』

「啊…係…係啊…」危急之際我唯有咁回應…

『咁要妳等個個都衰喎!』女老師有少少氣憤『我見妳已經企係到好耐!』



「errrrrrrrrrrrrrrr….」點…點算好啊?

『係呢,同學妳叫乜名?妳應該知道我係邊個啦?』女老師問…

「陳…陳陳陳…」我發現我越黎越慌張…

唔得…再係咁落去…一定會穿崩...

然後我注意到女老師後面有個兩個男學生係校門行出黎…
其中一個男學生…熟口熟面…

「喂喂!」我大嗌

個兩個男學生同時有反應,望住我…



哇,好尷尬!

『妳就係等更佢地兩個?』女老師問

「係…係啊,我行先啦!miss wong!」我鞠個躬之後就走埋去…

『我係miss lee喎…』無理到非常疑惑既女老師…

「喂…喂喂!」我跑到個兩個男學生面前…

『係?』其中一個矮少少,但身材明顯較壯既人回應

但我唔係搵佢…
我用雙手捉住另一個人既手…個個樣貌非常熟識既男學生…



「你...你應該係我男朋友可?」我嘗試問



事後我知道呢個人個名,賈邦彥。
 
『喂,邦彥,你幾時有個女朋友嫁?我唔知既。』較健壯個個男學生笑住講

『唔好笑囉,阿輝。』邦彥回答『呃…同學?妳係咪認錯人?』

誒?認錯人?即係我攪左錯?

耶?咁...咁樣我岩岩咪即係做一件…好白痴既舉動囉?

『同學?』邦彥保持疑惑咁問



「我…我…我…」我縮返手…之後退後幾步「係…係…係啊,我諗我認錯人!」

啊啊啊啊啊…

『你應該要扮係,或者可以脫離無女朋友既日子。』叫阿輝既人帶住諷刺意味講

『咪玩啦,而且,你咪一樣都係無!』

『你傻,我真係要搵一定搵到,啦啦隊入面我都唔知有幾多fans。』

『哦?』邦彥嗤之以鼻,然後注視住我『咁樣…同學?咦?』

但我不知不覺已經退後到佢地兩米以外既位置。

『你嚇親個女仔啦。』

『我覺得係阿輝你問題囉,咁同學,無野既話...我地就行先啦?』

我舉起已經僵硬既右手,向佢地揮一揮…

『拜拜。』『拜啦。』講完兩個就一齊擰住身走左去

望住佢地既背影,我發現我面頰熱到可以煎蛋,

我…我想死。

『同學…』後面忽然傳黎一把女聲…

「哇!?」我嚇一跳「miss wong!?」

『我係miss lee啊!我岩岩有留意住你地啦,你真係等更佢地?唔似既...』miss lee懷疑咁問…

「哈…哈哈…更係啦,通…通知返佢地一d野嘛!我…我要走啦…哇呀呀呀呀~」

講完之後我就邊嗌邊走左去 (無考慮到會唔會走光。)

跑到認為安全既位置之後,我又回復返正常既步伐...
同時,我發現到一個好嚴重既問題…就係,我唔知道我屋企係邊到,

而且…我注意到我部電話係無任何供應商,所以我係聯絡唔到任何人...

同時,因為通訊錄入面既爸爸媽媽唔係用本名表示,
所以我無辦法查清楚爸爸媽媽既真名…

完全係絕路。

點算好…
 
相當迷茫既我,不知不覺就行到學校附近既一個球場…
球場既看台上面…我見到有一班同我著住一樣校服既女學生…

「好。」我下定左決心…今次不成功變成仁…

我戰戰競競咁行埋去個班女仔到…我注意到當中應該唔同年級都有...
佢地一係傾得好開心,一係就留意住球場上面既球員…所以無人真係注意到我…

然後…係班女仔當中,我選擇左個個髮型最唔同,最特別既人黎問…
因為…佢比到我種幾易話為…應該唔難溝通既感覺

「唔該…」

『係?』佢注意到我,所以停止左同隔離個個人傾計

「我…我想問…」到底應該點問好?「妳識唔識得我?」

『下?』個女仔有少少訝異『識唔識得妳?唔…我無印象。』

「係…雖然咁樣好奇怪…但或者…妳可唔可以幫我問埋其他人…」

『哦…』雖然佢有少少疑惑,但佢都係幫我咁做『喂小藍…可唔可以…』

然後…我清楚見到我個"問題"開始慢慢傳開去…
由近至遠既女仔都開始逐個逐個望住我…然後都搖搖頭…

『無。』最後,個個女仔抬起頭望住我『好似無人識得妳…』

…絕望。

「係…係啊…」

呢班女學生明明係由唔同年級組成…
但點解…全部人都唔識得我?

無理由嫁嘛…

『阿kay…呢個女仔係乜野事?』坐係佢隔離既女仔(應該叫小藍)問

『我都唔知…』原來佢叫阿kay…『係呢…仲有無野可以幫到妳?』

「無…無啦…」我又退後幾步「啊!」差d就叉錯腳向後跌低。

『小心啊…真係無野?』阿kay擔心咁望住我…

「無…唔好意思…阻住你地睇波…」

點解…

點解嫁…