320.


係之後,我並無離開到球場,
而係我坐係離阿kay佢地班女學生幾十米既看台位置…伏係自己雙膝上面…

我好清楚…就算我離開左都係無地方好去…
無屋企…無可以聯絡既人…乜都無…

彷彿…我從來都唔存在係呢個世界上一樣…



嗚…

今晚…我應該係邊到過好…
就算過到呢晚…聽晚呢…後晚呢…
啊,唔係…而家係連晚飯我都唔知點解決…

點算好…

『咦…妳咪係岩岩係學校門口個個女仔?』



我抬起頭…
因為天色已經好暗…所以…我一開始未能睇清楚背住燈光既佢…

「你係…」岩岩邦彥隔離個個叫阿輝既人…

『啊...我其實都未自我介紹,我叫做黃道輝。』

而家諗返,如果當時既我無遇到佢…或者我一早已經支持唔到落去。
 


『咁妳呢?』

「下…?」

『妳個名啊。』黃道輝講

「陳…陳芷螢。」我細細聲問答

『唔…呢個名...真係無聽過。』黃道輝load一陣之後講

果然…
我已經…不敢奢望…會有人認識我…

而家真係岩想唱首陳奕迅既孤兒仔…雖然首歌已經好舊好舊,
但正正係我既心聲啊…咦…但而家應該叫做孤兒女?



『妳係幾年級?』

「3B班…」

『雖然低我一年…但我應該會有印象嫁喎…奇怪。』黃道輝越諗越苦惱…

「我都覺得好奇怪…」我dup低頭「係呢…點解你會係到既…」

『哦…我係學校既足球隊隊員。』黃道輝回答『練完波好耐嫁啦其實,
所以我覺得好奇怪,點解只係得返妳一個我地學校既女仔。』

「哦…」望望周圍,岩岩個班女仔果然已經走哂...

『呢到夜d會亂嫁,洗唔洗送妳返屋企?』黃道輝問



「唔…」識得一陣就想送人返屋企?果然其實係另有目的...「唔洗啦…」

『真係?』

「嗯…」我企起身「我…」

『唔會既…』黃道輝態度突然變得好認真『我硬係覺得妳有d問題…真係唔可以講比我知?』

「下?我…」

『雖然咁講好似怪怪地…其實我屋企都算幾有錢…如果有問題既應該幫到妳…』

「唔…」



『唔係錢既問題?咁樣…』

「點解要對我咁好?」

『下?』

「明明…只係識得個一陣…我又…無野可以報答你…唔通…唔通!?」
我反射性抱胸保護自己「你…你想我以身相許?」

『唔係!』黃道輝好激動『我無呢個諗法嫁!』

「咁…咁樣…」

『我只係覺得妳好可憐…又同校!對住呢d女仔我無辦法唔幫手…就係咁簡單!』



「真…真既?」

黃道輝起勢咁點頭…

睇黎…呢個人...真係值得相信?
 
『失…憶?』黃道輝難以置信咁問

「嗯…」我點點頭…

『妳…哈…講笑咋話?』

「你覺得我似?」我冷靜咁反問

『唔…又真係唔多似…』黃道輝愕然『點解既?』

「下?」

『點解會失憶…』

「如果我知道就唔會失憶啦!」我不滿咁講

『咁又係…』

「所以…所以…我唔知道屋企係邊到…仲有…屋企人係邊個…乜都唔知…」

『而家咁夜…學校應該已經無人…所以無得問老師…』

「而且…如果可既話我都唔想搵老師…一陣報警...感覺好麻煩...」

『妳可唔可以借部電話比我睇下?』

「電話?」

『妳話電話入面通訊錄D人全部都唔識…如果我地係同校…或者我會識?』

「有道理喎!」

『首先妳要唔怕我睇妳既資料啦…』

「如果唔係相既話,無問題既。」更何況我一早已經望過相…基本上無乜野特別。

但照道理無理由無同屋企人既合照嫁嘛…
只可以解釋原本既我係影完相就會即刻放入電腦…之後就會刪除手機既原檔…

『咦…?』黃道輝接過電話之後…有少少驚訝…

「係…?」唔通我部電話有乜野問題?

『呢部電話妳係邊到買?』

「下?」

『我係話…呢個款色…我記得係日本個陣都無見過…香港就更加無...』

「黃道輝…」

『叫我阿輝得啦…』黃道輝笑一笑

「嗯…阿輝。」

『嗯?』

「都話我失左憶囉。」

『啊…係喎…傻左TIM。』黃道輝搔搔個頭『無啦…只係真係…
好神奇…仲有…個顯示日期…我原本仲以為指30號…點知…』

黃道輝遞返部電話比我睇,指住個日期...

『呢個排列根本係指30年…30年2月4日…』

「有乜...特夠?」

『唔係特別既…可能係系統出錯…』黃道輝講
『今日應該係2010年2月4日先岩。』

「下…?」

邊可能…

我仲以為…今年係30年…
我身份證明明寫我係係2015年出世…咁點都可能而家係2010年...

如果黃道輝無講大話既話...
一係就我張身份證出錯...一係...就係另有內情?
 
『唔…』黃道輝好苦惱咁望完個通訊錄…然後『無…我無個識。』

「真係…?」

『嗯…或者妳可以試下逐個逐個打去…?』

「但我個電話無辦法打出去…」

『用我呢部。』黃道輝拎起佢部電話『跟返個號碼打去就無問題。』

「係喎…」突然感到一絲曙光「多謝你啊!阿輝!」

我講完呢句之後,阿輝佢側側個臉…『唔洗客氣…』好似有少少開心。

「但我最重要都係搵兩個人姐…」

就係名單上面既”媽媽”同”爸爸”,
打去只要報上我個名…自然有辦法可以見面…

首先我就打比”媽媽”…但好快已經有回應…

你打嘅電話暫時未能接通,請遲D再打過黎吖!