323.


結果,第二朝唔意外地我係帶住黑眼圈落床…
因為無衫換既原因,所以我都係著返套校服…

『醒啦?』行落樓梯,見到佢地一家人係一張長方形大台食更早餐…

『妳原來係我地學校?』坐係到既依玟驚訝咁望住我



『係呢?依玟對佢有無印象?』坐係佢隔離既阿輝乘勢問

『無…』依玟搖搖頭

『連依玟都無印象…?無理由…』阿輝愕然…

『但呢個校服款色,我又記得…只係得我地學校有…』依玟繼續分析…

『食早餐既時候唔好多嘴。』叔叔好有威嚴咁講左句…



然後佢地兩個就即刻埋頭返去食飯…
睇黎叔叔對子女都真係好嚴格…

『過黎食野啦,芷螢,唔洗怕羞。』但對客人既態度就唔同啦。

依玟一食完早餐就首先離開左屋企 (我要早d返去,早會有野要我幫手)
而家得返我,阿輝,叔叔係大廳到…

『我聽阿輝講,妳有封信係要搵benjamin?』叔叔問



「嗯…」我點點頭,之後將封信交比叔叔

叔叔接過封信…係英文個封到望到第一句之後『嗯,咁我一陣就車妳去。』

「下…?」咁快就應承?「點解唔睇埋佢先…」

『呢封英文信既收信人係benjamin,我係唔應該睇入面既內容。』叔叔講

「咁又岩…」唔單止有威嚴,仲好正直?

『咁芷螢係咪唔返學啦?』阿輝問…

「嗯…我想…首先解決返眼前既事先。」

『嗯…咁我行先啦,今晚見。』阿輝向住我微笑



「今晚見…」唔知點解呢…突然有種感覺係突然湧上心頭…係咪叫…幸福?

唔...唔會掛?
 
係車入面,叔叔佢不停咁問我問題
例如訓得好唔好啊,阿輝份人點啊,將來有乜打算啊…
 
雖然佢既態度好輕鬆,但一時三刻都唔知點答…
問問下,佢就車到我去一個大型貨倉…
 
『呢到就係我同benjamin既研究所。』叔叔係拍車個陣解釋
 
「嗯…」我心入面好清楚…因為…唔知點解有種熟識既感覺…
 


就好似…我成日都會黎咁…
 
『選貨倉既好處就係唔容易比人發現,你知競爭對手係幾咁多。』
 
「嗯…」感覺就黎會開始叔叔既科研經?
 
一進入個大貨倉,發現裡面係非常之光…
並且唔係一望無際,係有目的地間格左好多房間…
 
『黃博士。』其中一個坐係到既女服務員向叔叔點點頭
 
『我想搵benjamin,呢個時間佢應該係到嫁啦?』
 
『嗯…你去返佢個房間就會見到佢。』
 


無論個氣氛,定係人都係好認真…攪到我都開始緊張起黎…
 
『跟我黎…』
 
然後我就開始跟住叔叔,進入迂迴曲折既純白色走廊…
感覺就好似一個迷宮一樣…
 
轉眼間就去其中一個門口,門牌到寫住”Benjamin”
叔叔佢拍拍門,之後我聽到一把男聲講『come in。』
 
一打開門…我既正面有個外國人 (睇唔出有混到血) 既人坐係書台後面…
 
『hey wong,morning!』應該係benjamin既人講『she is…?』
 
估唔到會講英文…而家呢d我都勉強聽得明…但如果…


 
『講中文啦,benjamin,咁樣溝通會好d,』
 
『o…』benjamin笑一笑『所以你今日係帶呢個女仔黎見我?』
 
而家我真係相信佢係混血了,因為佢講既中文口音係非常純正
 
『嗯…佢叫芷螢。』叔叔介紹『佢有封信…係想交比benjamin你。』
 
『really?』benjamin有少少驚訝,之後企起身行埋黎『let me see。』
 
然後我就將封信交比benjamin…
 
Benjamin一拎起封信既第一刻,佢個眼張得其大…好明顯係非常驚訝
 
然後…
 
『wong,你可以返出去先嗎?』benjamin講
 
下?
 
『更係可以。』叔叔講『我會係出面等妳,放心,benjamin好好傾既。』
 
下…下下下下?
 
我都未load得切發生乜事,叔叔佢已經離開左間房…
得返我同一個半鬼佬…
 
耶耶耶!?!?!??
 
我望住benjamin,佢仲係好專心望住封信…
而且…佢而家個表情同岩岩見到佢個陣既輕鬆樣完全唔同…
 
超級認真。
 
『估唔到…佢…佢會成功左。』benjamin講出一句話…
 
「成功…d乜…?」
 
『不過…』然後佢望一望我『睇黎又成功唔哂…妳叫芷螢?』
 
「嗯…」
 
『妳係咪失左憶?』benjamin問
 
「下…你點解知既…封信有提?」
 
『呢封信…文入面個個人…話妳應該係發生左乜野問題先會搵我…』
 
「發生左…乜野問題…即係…?」
 
『我諗暫時解答唔到妳住…因為信入面都有好多似乎係密碼既野要破解…』
 
「下…」點解我會有封咁既信嫁?
 
『總之…我諗妳要係呢到生活落去…就一定要我幫手。』benjamin自信咁講
『身份證…所有有用既證件…我會幫妳攪掂。』
 
「下…我唔明喎…」
 
『仲有…我會搵個人幫妳催眠…睇下搵唔搵得返記憶…』
 
「benjamin!」我好激動咁嗌…
 
一味你講哂…但我而家乜都唔清唔楚!
 
『係…?芷螢?』
 
「我想知道我發生更乜事!」
 
『兩點。』benjamin認真咁舉起兩隻手指『一,妳係未來人…』
 
下?
 
『二,妳原本係一個boy。』
 
聽benjamin解釋之前,我對現況完全係唔清唔楚…
但聽完之後,就更加係一頭無緒…
 
未來人乜野先唔理住…我…我原本係一個男仔…?