343.


「…點解…妳會咁諗?」

『因為…我感受唔到家蔚妳有個種不捨既感覺…』

「…不捨?」

『餐廳個一嗌係例外啦…』冰瑤笑一笑『係其餘既時間,家蔚妳都係同平時一樣…』



「同平時一樣…即係點解…」

『去澳洲讀書五年,話唔長亦唔短,但點解家蔚妳仲可以用平常心對樂宜…
甚至…更加樂觀呢?我不禁會咁諗…如果唔係因為家蔚妳已經放低左樂宜...
就係因為妳有個決心…聽日可以追返樂宜,令佢放棄去澳洲…』

「真係乜都瞞唔到冰瑤妳…但如果我真係放低左樂宜所以先係咁呢?」

『妳覺得妳可以?』冰瑤直接問



照舊係一語道破…

「唔可以…」我承認…

『呵呵,而且…如果我無估錯,芷螢應該幫左妳唔小?』

「嗯…佢…將佢既故事講左比我知…」

『咁樣…家蔚妳一定好有把握囉?』



「我唔清楚…其實…妳話我樂觀都唔完全係岩…我…」

雖然之前既我…係追得返樂宜…
但之前還之前…而家還而家…而且…

真實既情況係點我都唔清楚…

「樂觀…同信心…其實…都可能只係好脆弱既存在…」

『咁啊…』冰瑤重新開始向前行『洗唔洗我幫妳一把?』

「下…?」幫我一把…?

『增加妳既信心…』冰瑤笑一笑,之後就行埋去大伙個邊…



點做…?

哇呀呀呀呀呀呀~~~~~~~~~~~~~~~

上方突然傳黎一群人既呼喊聲…稍微嚇左我一嚇…
我抬起頭…係我面前既就係…

『動感快車!』係前面既樂宜雙眼發光『哇…』

醒目黃色既路軌…係咪真係安全嫁…

『排隊囉。』阿彥係我隔離講『唔係一陣就唔可以一齊坐嫁啦。』

「真…真真係要玩?」我口窒窒咁問阿彥…



『家蔚!』樂宜擰轉身盯住我『今次你無得走嫁啦!』

「阿彥…」感覺眼淚都就快要標出黎…

『放心,我係妳隔離嘛,到時只要捉實我隻手…』

咪即係一定要玩!嗚嗚嗚…

係快車爬升個一刻…我已經成身顫抖得好利害…
相反,前面既樂宜同阿kay就相當興奮係咁叫…

越黎越高啦…越黎越高…嗚…

「阿…阿彥…」一於...嗚...望住阿彥直到完場...



『其實…』但我見到阿彥個面色都好似…有少少唔妥『我諗我要講真話啦,小蔚。』

「…係…係係係係?」

『我…我都好少玩呢d遊戲…』阿彥無奈咁擠出微笑『原來…都幾得人驚?』

你點做男人啊啊啊啊啊啊啊啊啊啊啊啊…

哇啊啊…好快…唔好衝…停…停啊…轉…又轉…唔好…嗚…
阿彥…阿彥你隻手係邊啊…阿彥…咦...你都叫更?嗚…咁我點算喎…
 
明明...明明上次黎玩我都無咁驚...唔通...唔通女仔既影響真係咁大...
嗚...咁...咁點解前面既樂宜...可以叫得咁開心...喎...



哇啊啊啊啊啊

啊啊啊我唔要西環治港啊啊啊啊…
 
 
惡夢…

點解…我要受呢d苦喎…
岩岩…快車周圍金屬震動…不斷傳黎既滴格滴格聲…仲係我腦迴響...夢魘一樣...

『小蔚…企到起身嘛?』雖然係上面阿彥都叫得好淒厲,但落到黎佢都好正常…

相反…我就…

『咁就腳軟!』樂宜不滿咁講『等我仲以為你上次玩完有經驗!』

「隔…隔左咁耐…」連講野都好無力…

『你睇人地紫晴都無事啦。』樂宜指住佢旁邊既紫晴…

佢都係好正常…連...文學少女紫晴都玩到...我...

『咁…咁係因為岩岩玩完越礦飛車姐。』紫晴謙虛咁講

『唔係囉。』樂宜接住講『係家蔚無用。』

我認!我認!

『小蔚…我扶妳過去個邊坐?』阿彥指住隔離既長椅

「最衰都係阿彥你!」我用力打一打阿彥胸口 (不過其實手軟都唔大力得去邊)
「岩岩…又話比手我捉住!但係我根本就搵唔到!捉唔到!」

『咁…對唔住囉。』阿彥無奈咁一笑,隻手放係岩岩比我打個個位

「哼…」

坐係長椅上面個刻…真係舒服哂。

『等我去買野飲啦?』冰瑤同kevin兩個玩完都好正常『樂宜妳陪我去?』

『嗯,可以!』樂宜講『比無用既家蔚係到休息下…你地想飲乜?』

『嘻嘻,有人買野飲咁我就去睇下禮品,紫晴陪我去?』

紫晴點點頭之後就跟阿kay走左去…

就係咁…而家得返我,阿彥(坐係我隔離),邦文同kevin…
奇怪既組合…

『食唔食煙?』kevin問邦文『個邊有吸煙區…』

『嗯…可以。』邦文帶點無聊咁回應

『喂!阿文!』阿彥責怪咁講

『你一早知我有食嫁啦。』邦文講『唔會而家先反對嘛?』

『話就咁話…總之,適可而止...kevin你呢?唔怕食煙影響你聽日既表現?』

『哈,一d都唔擔心,總之,聽日我就一定嬴更嫁啦。』kevin不屑咁笑一笑『行囉,阿文。』

已經叫邦文做阿文?你地有無熟得咁快啊?

『車…』佢地兩個走左之後,阿彥不滿咁望住佢地背面…而隻左手...

「阿彥…點解你仲禁住個胸口?」

『下?』阿彥一聽到即刻縮返『無野…可能係岩岩係上面吸氣吸得勁過到…』

「吸氣?」

『再加上小蔚既鐵拳…』

「而家我好大力咩!衰人!」

『哈哈…』

但係…而家可以話係關鍵時刻…或者…呢d微少細節都可能係...重要既線索...?
 
「阿…」當我正想開口個陣...

Stop and stare…
You start to wonder why you're here, not there…


『電話…』阿彥同我講…

「嗯…聽到…」我拎起部手機,

冰瑤?

「喂…?」

周圍好靜…但無人認…

「喂喂…?」

都係無人認…
但我無收線…因為…呢個情況熟口熟面…

就係兩日前…我先經歷過一次…個次係邦文既計劃...

『係呢到…講就無問題。』冰瑤佢終於開聲…但個距離感…一定唔係同我講更野…

『但係…』樂宜有少少擔心咁講…

『周圍都無人…怕咩呢?』

『始終…好尷尬嫁嘛…』

『咁等我示範一次先啦?』

『下…』

『我最愛kevin!』冰瑤突然大聲咁嗌,大到…如無意外周圍既人都應該注意到?
『愛到…就算我家姐做左幾多手腳…點樣阻止我地...

我都…唔可以放棄佢!因為…佢就係我…我想選擇既人!』

我震驚…因為…我估唔到…冰瑤會咁樣去大嗌法…
一直認真...冷靜...聰明既冰瑤...竟然可以咁樣去嗌...

係第一次...但點解...冰瑤要咁做...?

『我…文冰瑤…所選擇既人!啊…就係咁,拿...完全無人注意到。』

『小瑤…妳好屝利…』樂宜睇黎同我一樣咁驚嘆...

『我只係比個決心妳姐。』冰瑤笑住講…

決心,我覺得冰瑤呢句係語帶雙關…
除左同樂宜講…仲有…同我講...

『最後一日…想所有野發洩出黎…然後…正面對待自己既未來…』

『嗯…小瑤…有道理。』樂宜睇黎終於被說服…

唔知點解…我有種感覺…

「到底…樂宜妳同冰瑤係邊…?」雖然明知無人會回應...但我都照講出黎..

『小蔚?係邊個…』阿彥訝異咁問

然後…我聽到一聲大大既吸氣聲…係…樂宜...

『我…我…我王樂宜…』樂宜佢口窒窒…

『最鍾意我表哥,陳嘉為!由始至終都係,無論點都係總之
總之就係鍾意鍾意鍾意鍾意鍾意佢啊啊啊啊~~~~~~~~~~~~~~~』