359.


SECOND ENDING
 
 
陳芷螢 視角:
 
「好啦…我就…跟你地黎到呢到啦。」
 


係機場外面,benjamin部私家車面前,我同家蔚,冰瑤佢地講
 
『what?』benjamin有少少驚訝,冰瑤就好似一早預左會發生咁,
 
『下…?芷螢?』家蔚果然如我想像咁,難以置信望住我
 
「家蔚…」我望住家蔚「我…已經到左時限,之後既事我就再幫唔到你。」
 
『無錯。』小芋…係我隔離講,
 


小芋用手指輕輕抬一抬副黑超,非常做作。
 
『小芋…妳…果然要帶走芷螢?』家蔚講
 
『嗯呀!』但十歲既高音都係出賣左佢…
 
『點可以…』
 
「家蔚…就算小芋唔帶走我…我都要走…」我拎起個時光機「唔信家蔚你掂下…」
 


『下…』家蔚將隻手掂一掂個時光機『暖既…?』
 
「因為我要做既野…要改變既野…就係一月九日發生…
所以呢日完我就要強制返去未來…無任何野可以阻止到。」
 
『芷…螢…』
 
「所以…我要係到同你地道別啦…」我向家蔚笑一笑
 
即使係強擠出黎既微笑…我亦希望…佢地唔會覺得奇怪…
 
『嗚…』家蔚衝埋黎攬住我『芷螢…嗚…』
 
「去啦…家蔚…放心,去追逐你想要既未來啦…」
 


『但係…咁樣…既話…』
 
「係…係今晚…我係家蔚你既旁邊…已經清楚知道…你對佢既感覺…唔會錯…」
 
已經...無任何野可以改變到,
 
我好清楚…
 
「去啦…家蔚…十八年…再見。」
 
*
 
係同家蔚道別之後,我同小芋去到尖沙咀海旁
而家我企係鐘樓下面,手上面既時光機已經由暖慢慢變熱…
 


個一刻…就快到。
 
「小芋…」
 
『嗯?』
 
「其實我之前已經同家蔚講過…或者…我改變過去…從而改變未來…
變成女仔呢件事…或者一早係既定事實?或者命運一早已經決定左係咁…?」
 
所以…我做任何野都唔會有任何作用…
我…只可以欣然接受?
 
『點解…芷螢會咁諗呢?』小芋問
 
「無…我就係有呢種感覺…所以…時光機先會有易改變…同好難改變既部份…」


 
『唔…或者啦!』小芋點頭『但我又有D唔認同!』
 
「邊部份?」
 
『小芋存在既部份。』
 
「下?」
 
『你估小芋點解會係到丫啦?』
 
「唔係…捉我…因為時空法咩?」
 
『唔…但如果原因咁簡單…我點解仲要幫你地做咁多野?』
 



 
「救護車…果然係妳叫既?」
 
『哇哈哈!聰明!』小芋做作咁大笑
 
「仲有…無論我要求D乜…小芋你都…好似會應承…」
 
『華生,你突破盲點啦。』小芋又輕輕抬佢副黑超
 
「但係點解…點解呢…」
 
手上面時光機…就好似倒數更一樣…越黎越熱…
就快到辣手既地步…
 
「小芋…妳個全名…」
 
『嗯?』
 
「之前係生日派對個陣…妳講個名…唔通…」
 
『哼!就係小芋既真名!』
 
陳珊芋…小芋既真名…
 
咁樣!
 
「小芋…妳媽媽…到底!」
 
但呢個問題,我唔會知道答案…至少呢一刻…之後既幾秒都唔會知道…
 
因為周圍突然變得黑暗…
最後一刻…我望到小芋…佢好明顯係向我微笑更…
 
呢個笑臉…同某人重疊左…
 
係佢…無錯…
 
 
 
果然…
 
*
 
陳家蔚視角:

「私..私家病房?」我訝異咁問

『嗯。』護士點點頭

去到本來阿彥訓既病房,我發現阿彥並唔係到…
等我仲擔心死阿彥發生左乜野事…

原來,佢轉左去較高級既單人病房。

應該係kevin既關係?
如果唔係佢屋企人…無可能做到呢個程度。

不過咁都有個好處。

「我黎探你啦,阿彥。」

就係我可以留係病房入面…陪住阿彥,唔驚比人趕走。

我將一張椅子放係阿彥張病床旁邊,然後坐係上面…
我唔知要坐幾耐…阿彥先會醒…但我會堅持一直坐落去…

因為…我有野要同阿彥講

好重要既野。

但可能因為太累既關係…
不知不覺間我就訓著左。

伏係阿彥身邊…訓著。

『小蔚…』

但訓訓下…我突然聽到…
係阿…彥既聲音?

『小蔚…』

無錯…係阿彥…的確係…

我即刻彈起身…可能係太激動既關係,
起身個刻…血湧上腦…攪到頭暈同眼前好黑…

但原來…黑既原因,係因為仲係夜晚…大概…我只係訓左一陣?

而我面前既阿彥…佢雙眼係張開更…

「眼…開…開更…」我唔敢相信…

『訓醒更係開更嫁啦。』阿彥微笑住

「訓…醒…」

『睇黎小蔚妳仲訓得糊塗過我。』阿彥繼續講

「糊塗…」我好混亂…一時三刻將唔到所有野整合埋一齊…

係啦…阿彥佢傷左…
之後仲做完手術…係知道無事之後…我用時光機回到過去去搵樂宜…

但樂宜最後都係走左…然後我返黎醫院…
因為阿彥係病床上面…所以…所以…

佢醒左,

阿彥佢醒左。

「阿…彥…?」

『唔知咁講岩唔岩,早晨,小蔚。』阿彥講
 
*
 
係醫生入去檢查,我被迫係外面等既時間…
我…真係好興奮…
 
『真係神奇!』醫生出黎第一句說話就係咁講『估唔到病人…意志力咁強。』
 
「醫生…」
 
『本來我地估病人最快都要三,四日先醒到,真係神奇!』
 
「佢係…阿彥嘛…」
 
『嗯?』
 
「無野,咁…咁我而家係咪可以入去見佢?」
 
『隨便,隨便。』醫生笑一笑之後點點頭
 
「阿彥…」我入面病房…見到坐(應該係躺)係到阿彥…
 
我既興奮…已經達到頂點。
我好想即刻衝埋去攬實阿彥…但我無咁做…
 
因為…
有第二種感覺湧上黎…
 
「你唔會再訓低可?」我冷冷咁講
 
『下?』阿彥有少少驚訝
 
「阿彥…你會唔會再好似之前咁…唔同我講聲…就訓低?」
 
『小蔚…』
 
「粒聲都唔講…就咁…就咁…幾乎…就要離開我…走左去…」
 
『我…』
 
「衰人…明明話唔會放手…唔會…比我走左去…但而家…但而家…」
 
『…』
 
「但而家你就…咩都唔講就走左去…咁算點喎!咁算點呀!!!」
 
『小蔚…』阿彥佢溫柔咁笑一笑
 
「仲…仲笑得出?衰人阿彥!衰人!」我好想…衝埋去狠狠咁打佢…踢佢
 
但我始終忍住無夠做…
最後只係伏係床上面…開始喊起上黎…
 
「阿彥…嗚…你好…好奸…奸矛…就因為你傷左…我先唔可以打你…唔可以…嗚…」
 
『等好返…再比小蔚妳打過夠?』
 
「嗚…嗚…」
 
『小蔚…』阿彥放左隻手係我背脊上面『我答應妳…唔會再係妳身邊離開…好嗎?』
 
「嗚…」
 
『我醒返…就係一個證明啦!我講過既野一定算數嫁嘛…』
 
「嗚…」
 
『唔好喊啦…小蔚…』
 
「嗚…」
 
『小蔚…最多我扮鬼臉等妳開心返啦?』
 
「噗!」一聽到呢句我終於洩氣
 
『小…蔚…?』阿彥當然係察覺到『原來妳係到扮喊!?』
 
「唔..哈哈哈…」我抬起頭「唔係啦…我真係喊…但係…但係…突然又好好笑…」
 
我諗…阿彥一定睇得出我而家心情好複雜…
我之前既喊係真既…但而家既笑…亦都係真既…
 
邊一面都係真既…
 
「啊~我好複雜呀…我而家真係…嗚…」
 
比起喜極而泣…又有d唔同…
無理取罵…但又笑自己既呢個行為…
 
『小蔚…』
 
我抹一抹眼淚…然後…
 
「啊!阿彥…我諗…我真係要再訓一陣啦…」
 
一放鬆過黎…頭痛呀…頭暈呀…又重新湧上頭…
 
「你係咪答應我唔會再訓低?咁樣…我地約定好…
等我訓醒之後…我有d野想同你講…好嘛?」
 
『嗯…』阿彥點點頭『約定好…』舉起一隻尾指『勾手指尾?』
 
「啊…」我微微張開嘴巴「原來…我同阿彥都未試過tim…勾手指尾。」
 
講過算數啦…阿彥。
 
*
 
但當我醒返之後…係我眼前既,唔係張開雙眼…微笑望住我既阿彥…
而係…同之前一樣…訓係床上面…需要呼吸器維生既阿彥…
 
「阿彥…?」
 
無回應…
 
「阿彥…?」
 
都係無回應…
 
我第一個念頭…雖然覺得好可笑…但…越黎越覺得有可能…
岩岩…既…係一場夢…?
 
岩岩阿彥醒左…同我約定…勾手指尾…所有野…都係一場夢…?
 
一場我希望既夢…?
 
「唔可以…係夢…唔可以…」
 
點可以咁嫁?
阿彥…你明明答應過我唔會再訓低…
 
雖然係夢…但…但你都係答應過我嫁嘛…點會…
 
點會咁…
 
『病人仲未醒?』琴晚…幫阿彥檢查既醫生行入房
 
「醫生…?點會嫁…阿彥…佢…琴晚明明醒過…
而且你仲話係奇蹟…好神奇…因為佢應該要再訓多三四日…」
 
『小姐…?』醫生有少少疑惑『病人…一直都無醒過…而且,我無講過呢番說話…
病人呢個case,無可能係三四日…短起馬要一星期…長…甚至可能係幾年…』
 
點…會…
 
我跌落張椅子上面…因為雙腳好無力…
 
『小姐…我諗妳係辛勞過度,不如返屋企休息下…留係到個人好容易…』
 
「唔洗…」我回答「我…我會一直係到等…」
 
就好似我之前講咁…
 
「無論幾耐…都會等。」
 
醫生聽完,睜大眼…然後…
 
『好啦…我諗要到呢到啦。』佢講
 
下…?
 
『嗯…』我旁邊有人回應…係…阿彥,佢除左呼吸器…
『對住認真既小蔚…我諗唔可以再玩落去啦。』
 
誒?
 
*
 
「離…離哂譜!邊有人會夾埋醫生玩…玩我嫁!」
 
個醫生笑住離開之後,我即刻發火
 
『個醫生都幾玩得。』阿彥佢點點頭『唔錯…』
 
「衰…衰人…可…可惡…」
 
『邊個叫小蔚琴晚係床上面扮喊喎…』
 
「唔…唔係扮嫁…我…我都話左唔係囉…啊?」
 
阿彥佢突然攬實我…
 
『小蔚…知啦。』阿彥講『我真係知。』
 
「阿…阿彥…咁大動作…你唔怕會…」
 
『唔怕…只係有小蔚…係我身邊…我仲有乜野會怕…而且…
我地已經勾過手指尾…我唔會再離開妳…唔會。』
 
「阿彥…」
 
啊…我要忍住…因為…
 
「我…我有d說話要同阿彥你講…」
 
『嗯…?』
 
「雖然…係好尷尬既說話…不過…」
 
『不如…等我估下?』
 
下?
 
『咁咪無咁尷尬囉…』
 
「阿彥…」我搖搖頭「唔洗…呢番說話…要由我自己講…先有意思…」
 
『小蔚…』
 
「因為…只係好簡單…既一句…」
 
*

*

*

*

*

轉眼就到農歷新年假既開始,阿彥(著西裝)同我一齊去左接爸爸…
而家我地係火車站面前…當阿彥一見到我爸爸…

『爸爸!』阿彥即刻向佢鞠躬

『下?』爸爸驚訝

「噗!喂…咁…咁太誇張啦掛!」

『唔誇張…爸爸…』阿彥用堅定既眼神望住我爸爸『放心將小蔚交比我啦!』

同一時間攬住我…

下…下…下!?!?!?!

「喂!唔係應該先解釋我係邊個咩!!!!!!!!!」我大嗌

混亂既展開。

*

*

*

『估唔到爸爸都幾易話為…』阿彥點點頭…

「如…如果唔係你一開始既態度…我爸爸仲易講掂啦!」

無錯啦…
爸爸見到阿彥咁既開場白…真係當堂嚇一跳…

甚至以為我地係唔知邊到黎,想昆佢錢既組合,
差d就想要報警…

直到我鼓起勇氣話自己係陳嘉為…佢個仔…佢先停係到…

「原本計劃唔係咁嫁嘛!」

原本係後面觀察,諗住一見到唔對路就即刻出場既堂姐…
一見到我同阿彥既表現,真係笑到碌地 (堂兄描述)

「下…下次記住唔好亂黎呀!」

『仲有下次?』阿彥驚訝

「唔…唔知呢…咁樣接下來…」

接下來呢…就係…

「既然爸爸已經…大概都接受到…咁樣…咁樣呢…」

『旅行?』

「嗯…咩喎,咁樣阿彥你呀…遲咁多先出院…」

『醫生話要好好觀察嘛…驚我可能唔坐得飛機…所以…』

「咁而家坐得嘛!咁樣就要如期出發嫁啦?係咪先?」

『嗯…小蔚話事啦…』

「咁…就要去準備買野啦!嘻嘻…」

台灣旅行…同阿彥兩個…我真係好期待…
 
*

*

*


呀…唔記得同你地交代返其他人點tim…

堂兄同堂姐,佢地已經說服左個邊既屋企人,
而家已經開始準備婚禮既事,真係估唔到咁快!

子朗同阿芝,佢地既關係都係好微妙啦…
不過聽紫晴講…子朗好似瞞住佢做更d奇怪野?呢層要之後再知道發生乜事啦…

至於Miss lee…佢知道堂姐要結婚之後真係down到出哂面..0
對我既態度仲比之前更變本加厲 (幾乎要係早會示愛)不過…有阿彥保護我無問題既…

阿kay…就一直用眼怨既態度望住我同阿彥…
不過…總有一日佢會搵到佢鍾意既人,到時就會放棄我嫁啦…

至於邦文…邊個得閒理佢?

Kevin同冰瑤…佢地好似襯呢個新年假去左非洲旅行…
不過如果係同冰瑤玩既話…希望…kevin可以完好無缺返黎啦…

至於…樂宜。

「我收到佢既名信片啦…」我同阿彥講「樂宜既…」

『係?』

「嗯…」

『我當時…仲以為小蔚妳會選擇樂宜。』

「我…曾經都係咁諗。」

或者…會有個空間…有另一個我的確會咁去選擇…但係…

「但我而家選擇既…係阿彥你…呢點係唔會有錯,唔會。」

『嗯…』

「唔好諗呢點啦…去買野啦!」

我主動…用戴上阿彥送比我個隻手鏈既手...
握住阿彥隻手…之後行起上黎...

『係既係既…』

樂宜,多謝妳...

而家既我,已經下定決心…
唔會再有任何猶豫,

我…會順應自己而行動…就好似個日…八月八日…係海旁個晚一樣。


嗯…個陣,係醫院講個句…簡單既一句說話…



「我愛你阿彥。」



已經代表左一切。



- SECOND ENDING -
*
 
*
 
*
 
*
 
*
 
「媽…」
 
『嗯?』
 
「我想去一去洗手間。」
 
『去啦…』
 
行入去洗手間,係我面前既自己…
個樣雖然有微妙唔同…但大致都…
 
「呼…好彩都係似媽媽…」我總算鬆一口氣…
 
啊…媽媽即係王樂宜。
 
「喂喂…?喂喂?」我嘗試自言自語咁係到打招呼…
 
試下搵唔搵到呢個身體既本人…
就好似…之前既賈芷螢一樣…
 
但無…一直都無回應…
 
「或者…時光機其實仲有好多迷底,就算冰瑤阿姨都未完全清楚…」
 
啪啪啪!
 
「係…用完嫁啦!」
 
『去咁耐既?』一坐低,媽媽就問『就快落機嫁啦…』
 
「嗯…」
 
落機…目的機…香港。
 
*
 
『家蔚…好…好耐無見啦!』
 
一行出閘口…媽媽激動到行李都無理到,衝埋去攬實家蔚…
 
『都…都唔係好耐之嘛…』
 
『一年有多嫁啦!已經…』媽媽繼續講
 
『樂宜…啊…智影就真係無耐都無見過啦…可?』家蔚探過頭望住我
『上幾次你無跟埋返黎…媽媽成日都拋低你,真係唔應該!』
 
家蔚佢…係用更另一個態度同我講更野…
可能因為…佢地仲未清楚…”我”已經…返左黎。
 
到底幾時先同佢地解釋好呢…
 
「嗯…」我點點頭
 
『啊…佢地走左去邊嫁…』家蔚望一望周圍,皺起眉頭
『明明講左你地就快會到,都係要走左去…真係呀!』
 
『唔好怪佢地啦…要等人始終好悶既。』樂宜笑住講
 
『嗯…啊!返黎啦返黎啦!』
 
望向家蔚望個一邊…係一個高大既男人…仲有…佢旁邊既一個…女仔。
 
同我應該差唔多大既女仔…

『去咁耐嫁!』家蔚有少少抱怨咁講

『咁個女想食嘛…小蔚…』邦彥無奈咁回應

『對唔住…媽媽…』

連把聲…都係一樣…
佢手上面…係…

『道歉都得…但媽媽想食一半!』家蔚眨一眨眼…

『係既…嘻嘻…』個女仔好開心咁,將膠叉叉入一舊雪米糍遞比家蔚…

芋頭雪米糍…

『啊…女比我食既果然好好味!呀…差d無左件事!』

『係囉…掛住食。』媽媽笑住講

『芷螢呀…呢個…係樂宜姨姨既仔…叫做智影…
妳地上次見已經好耐之前啦…所以大概已經無印象…』

『咦…?同我個名咁似既?』芷螢有少少愕然…

『係呀…不過有唔同既,同佢打聲招呼啦…』家蔚繼續講

『哦…』然後芷螢佢…慢慢行埋黎我面前…

我終於可以睇清楚佢個樣…如天使一樣既面孔…
兩年前…我都見過佢…但係與其話見過,不如話我就係佢…

『我…我叫做賈芷螢…你…你好。』芷螢佢怕怕羞咁同我講

「妳好。」我點點頭

『唔…雪米糍…你食唔食?』芷螢將另一盒雪米糍遞向我…

「啊…好呀…」

『你係表姨個仔…又大過我…咁樣…我係咪應該叫你表哥?』芷螢再問

表哥…?

哈…

我不自禁笑起黎…


「表哥,嗯!無錯。」


智影同芷螢


表哥同表妹…


佢地既故事…


原來一直都未完結。


- END -