是咁的,我叫梁家洛。
  點解叫「家洛」?
  我老豆有四兄弟,仲有一個家姐,我老豆係長子,而佢果一輩係「國」字輩,到我喱一輩就係「家」字輩 ,所以我個名就有個「家」字喇。
  而個「洛」字呢?
  我問過我呀媽,佢話因爲見好多岀息嘅人都有喱個字,佢同我老豆都希望我大個咗之後可以岀人頭地,做個岀息,正值嘅人。
****

  今年係2009年,我岩岩由小學升上中學,好多小學嘅同學都只可以係facebook 知道大家嘅近況。
  有啲fd啲嘅,就會用MSN或者有時傾下電話保持聯絡。



  有一日,我趁我家姐唔用電腦嘅時候,上咗facebook睇下啲朋友嘅近況。
  無意中,我噤咗入一個叫呀冰嘅小學同學Facebook,見到佢有好多同一個好靚嘅女仔影嘅合照。
  咁岩呢個時候,電腦嘅右下角岀現咗呀冰msn上線嘅提示,反正自己都冇野做,就咁噤咗入我同呀冰嘅聊天室,同佢傾下計。
  我:「hi」
  呀冰 :「hi,做咩事呀?」
  我:「冇咩事呀,見冇野做搵你吹下水姐嘛!呢排點呀?」
  呀冰:「咪又係咁,返學等放學,放學飲可樂,放假咪有時同fd行下街,周圍去下囉!咁你又點呀?」
  我:「我差唔多每一日嘅放學都同班fd落修頓打波,放假咪周圍玩吓囉!」
  我哋呢段日子得閑就用M S N同對方傾計,直到有一次佢突然同我講:「家洛,不如搵日出嚟食個飯丫,我哋自從升左上中學之後都冇見過面,淨係用MSN聯絡。」
  我:「都好喎!不如就嚟緊嘅禮拜六啦,好冇?」


  阿冰:「下...我約咗個friend禮拜六食飯喎,一係我問吓個friend介唔介意一齊食飯囉!」
  我:「你果個fd男定女來先?男嘅話我就唔阻你啦!女嘅話,阻住你都無乜所謂啫!」
  阿冰:「女嚟?,等我問吓佢先,佢肯唔肯都未知。」
  我:「咁你問咗先啦!等你好消息!」
  半個鐘之後,阿冰同我講:「我個friend話OK呀,佢話識多個朋友都好喎,咁我哋星期六食飯架啦喎!」
  我:「好呀,星期六見啦!」

  幾日之後,終於到咗星期六。
  我同阿冰約好咗喺銅鑼灣地鐵站等,之後先再去食嘢。
  當我到左銅鑼灣地鐵站嗰陣,我就即刻見到阿冰同佢個朋友,我上前同佢地會合。


  我一見到阿冰就心諗「阿冰冇見半年左右,靚女咗喎」。
  之後我對眼再移向佢隔離嗰位女仔朋友嘅方向......
  嘩!竟然比我係光天化日之下見到個咁靚嘅女仔,我個心即刻「砰砰..砰砰」嘅心跳,變成「砰砰砰砰...砰砰砰砰」嘅心跳速度。
  我紅都面埋咁同佢say咗個hi, 而佢都同我say返個hi。
  之後我哋就由阿冰帶路,帶我地去咗間餐廳食嘢。
  沿路行嗰陣,我哋三個都冇乜點講野,氣氛有少少尷尬。

  直到入咗間餐廳,坐低左之後,阿冰見我哋冇乜嘢講,就打破悶局話:「不如你哋介紹下自己先啦,你地兩個都知我邊個架啦,唔使我多講架啦!」
  佢指一指我,對住佢隔離位女仔講:「呢個係我嘅小學同學。」
  然後佢再指一指個女仔,同我介紹:「呢個就係我而家嘅中學同學,喂!家洛,你講吓嘢啦!平時又唔見你怕羞,最多野講就係你,你唔係粒水掛!?」
   俾我冰咁樣講一講,我都諗唔到可以點樣反駁,唯有以笑遮醜,然後再同個女仔介紹自己:「我叫家洛呀,係呀冰嘅小學同學。」
  而佢都禮貌地回應我:「我叫李曉霖呀,你可以叫我Helen!」講完之後佢展現咗佢女神般嘅親切笑容,對我笑一笑。
  天啊!有我自出娘胎之後,我都未曾遇過一個女仔笑一笑都足以令到我有小鹿亂撞嘅感覺。
   此時此刻,有誰共鳴??
  Helen繼續展開話題:「家洛,咁你依家讀緊邊間中學呀?」


  我:「我而家讀緊賽馬會果間體藝中學!」
  Helen:「咦!係咪沙田嗰間呀?英文band 1 學校嚟嫁喎!咁難入都入到,你讀書同運動一定好叻啦!」
  我:「叻就唔係好叻,係甘啱附碌啫!」
  雖然我表現得好謙虛,但其實我心裏面不停暗爽緊,原來比靚女讚嘅感覺係真係會飄飄然架!
  我哋三個人乜都傾下,已經冇啱啱嘅氣氛咁尷尬。

  期間,我不斷諗,點解Helen個樣咁熟口面嘅?究竟係邊度見過佢呢?
  不過左諗右諗都冇乜頭緒,最後都冇深究呢個問題。

  快樂嘅時光過得特別快,好快就嚟到呢餐飯嘅尾聲..

  埋單嘅時候,阿冰同Helen準備拎錢出嚟嗰陣,我一馬當先係我銀包攞錢出嚟埋咗張單。
  佢哋兩個女仔望住我,我話:「今餐我請啦!唔使覺得唔好意思喎!下次請返我食飯咪得囉!」
  Helen:「好似吾係咁好喎!」
  我:「得啦!你唔肯比我請仲更加唔係咁好啦!」


  Helen見我咁樣,唯有接受我嘅好意,之後同我講左聲多謝。

  其實攞錢出嚟埋單果刻,個心真係有少少痛,我一個星期嘅零用錢只係得200蚊,呢一餐飯咁就用左我一個星期2/3嘅零用錢......
  不過為咗係Helen面前留返個良好嘅印象,即使用晒我成副身家埋呢張單,埋完之後要行返位於灣仔嘅住所,成個星期冇錢用都冇所謂啦!
  食完飯之後,大家都各自返屋企=19.5px。

  我一路搭地鐵返屋企嘅時候,我不斷回味緊啱啱Helen嘅笑容。
  諗下諗下......
  大撚鑊!我唔記得一樣最重要嘅事未做,就係問Helen攞聯絡方法!
  男人最失敗,莫過於此!嗚...嗚...

  返到屋企,我用電腦上阿冰Facebook,睇下有冇計搵到Helen嘅Facebook。
  我一禁入阿冰嘅Facebook,就即刻見到佢同Helen嘅合照。
  呢一刻,我終於知道點解啱啱對住Helen會有熟口面嘅感覺喇!
  謎底終於解開!


  不過依家有個重要嘅任務—搵Helen嘅Facebook。
  神通廣大嘅我,唔使3分鐘就搵到Helen嘅Facebook,佢個用戶名叫「Helen Lee」。

  「李曉霖」,呢三個字嘅人名可能係你眼中係再普通不過嘅名,但呢三個字對於我嚟講係非常重要,足以影響我往後嘅一生......

  我一搵到Helen Facebook之後,我二話不說,即刻邀請佢做我好友先!
  大約10分鐘後,Facebook提示「Helen Lee已接受你的交友邀請」,我當場感到無比嘅快樂,心情有如六合彩頭奬一注中咁!真係唔係講笑!

  我inbox Helen:「hi!我係家洛呀!」
  Helen:「hi!咁都俾你搵到我Facebook嘅?犀利喎!」
  我:「呀冰Facebook有咁多同你影嘅合照,要搵唔難丫!」
  Helen:「咁又係!原來你姓梁架,我一開始仲諗你會姓咩嘅添!」

  你諗我會姓咩?唔通你想知道我個姓,然後好似我咁加對方Facebook?
  可能係因為隔住電腦傾計嘅關係,我同Helen都冇怕羞或者尷尬嘅感覺,越傾越開心。



  我仲知道左原來佢係住太古,而我亦都成功攞咗佢MSN同埋電話號碼。
  一開始,我哋一得閑就同對方MSN,但係因為我屋企得一部電腦嘅關係,我要趁我家姐唔用電腦嘅時候先可以用電腦,所以真係有少少唔方便。

  一個星期之後,我真係抵受唔住呢種唔方便,我同Helen講:「不如我哋傾電話丫?我家姐有時用電腦,有少少唔方便呀!」
  Helen:「好呀!我家姐都成日同我爭電腦架!」
  原來Helen同我一樣,大家都有個家姐架喎!
  我:「咁我依家call你?」
  Helen:「ok」
  嘟...嘟...
  我:「喂,Helen?」
  Helen:「係呀!哈!我哋傾左成個星期計,今次係第一次電話傾,好得意呀種感覺!」
  唔知點解,係電話同佢傾計嘅我,好似有少少怕羞......
  我:「係..係呀..都幾得意......」

  啱啱傾電話嘅時候,我哋不時都有dead air,不過講多幾句,又好似平時MSN傾計咁,話題滔滔不絕。
  有時講下我哋返學嘅趣事,有時又講下大家嘅興趣,總之就無所不談咁濟。
  一傾就傾左大約兩個鐘,呢次係我第一次同一個女仔傾電話傾左咁耐。

  我哋仲約好每晚九點鐘打電話,如果九點鐘前,電腦比家姐用緊,又想搵對方嘅話,我哋就send SMS傾計。
  不過由於我同Helen吾同台嘅關係,SMS嘅費用昂貴,所以都可免則免喇!

  由我識Helen嘅第一日開始,我嘅生活就係返學,放學,返屋企上MSN搵Helen,有時就落下修頓打籃球,打完籃球都係搵佢。
  我每一日嘅生活都開始有Helen嘅存在喇......

  有一日,我鼓起勇氣約Helen:「最近有套電影好似幾好睇喎,不如星期六一齊睇丫?」
  當我諗緊Helen會唔會拒絕我嘅時候,Helen:「好啊,不過唔好睇咁晏得唔得啊?因為我屋企人規定我每日八點要返到屋企架喇!」
  只要你肯出嚟,仲有咩唔得嫁?
  我答Helen:「梗係冇問題啦!」

  到咗星期六,我約咗Helen 12點半喺銅鑼灣地鐵站等。
  呢日,我專登早啲起身,着到靚靚仔仔。
  為免第一次同Helen出街就要佢等我,出名遲到嘅我,早10分鐘就到達現場等。
  12點半,Helen冇遲亦冇早,時間啱啱好。
  佢一見到我就展現佢嘅招牌笑容同我講Hello。

  呢個時候,我怕羞嘅性格又嚟料,我紅都面埋同佢打返個招呼:「hi..hi...」
  我心諗:「梁家洛,平時風趣幽默,乜都唔驚嘅你,where did you go 呀?唔好緊張..唔好緊張..放鬆D,香港人」
  即使我不斷說服自己唔好緊張,但身體卻很誠實......

  我哋會合左之後,就行去時代廣場買戲飛,期間我哋都有講有笑,不過我始終擺脫唔到緊張。
  畢竟今次係我咁大個仔第一次同一個女仔出街......
  睇完戲之後,我同Helen都有少少肚餓,我哋周圍行,行咗去一間茶餐廳食嘢。
  食完之後,我哋見冇嘢做又周圍行吓。
  我哋一路行,一路傾計,周不時都有意無意咁掂到對方隻手。

   唔知大家有無印象,大坑有一條好長嘅樓梯。

  我同Helen行緊落條長樓梯嗰陣,我哋隻手掂下掂下,變成拖實對方隻手......
  我哋望咗一眼,大家都尷尬咁少一笑,但我哋都冇想分開隻手嘅意思。
  我哋拖住手漫無目的咁周圍行,期間我哋都有電話響,聽電話嘅時候我哋分開咗隻手,但聽完之後,我哋都拖番住。
  直到我哋差唔多行勻成個大坑,天后,銅鑼灣,Helen話係時候要返屋企喇,我送佢返屋企,我哋先至鬆開手。
  今日係我第一次拖住女仔隻手,種感覺真係好奇妙......

  這種感覺太罕有,講一千句也不夠......

  返到屋企,我一on msn, Helen就搵我:「返到屋企啦?」
  我:「係呀!」
  Helen:「今日好開心呀!」
  我:「我都覺」
  我:「因為今日有你陪我...」
  Helen:「我想問你一個問題啊,可唔可以呀?」
  我:「梗係可以啦!問啦」
  Helen:「其實我哋而家咩關係啊?」

  其實Helen呢個問題,我都好想知道。
  今日我哋行完條長樓梯,就一直拖住對方隻手,直到返屋企......
  咁我哋究竟係普通朋友?好朋友?定係情侶?
  我由第一次見到Helen,我就已經比佢吸引住,已經對佢產生好感,之後我哋keep住聯絡,得閑就同對方傾電話,有時唔得閑,我會好掛住佢,好想聽到佢把聲......
  如果問我對住佢係咩感覺,我諗呢種就係愛嘅感覺。

  我係MSN同Helen講:「你依家方唔方便傾電話?不如我哋電話講丫!」
  Helen:「ok」
  我心裏面同自己講:一陣講嘢真係唔好口窒俐窒,有咩想講就講啦,將你心裏面嘅諗法話比佢知啦!
  嘟..嘟...
  Helen:「喂」
  我:「係我呀!我有啲嘢想喺度親口同你講」
  Helen:「嗯」
  我:「你問我依家我哋咩關係,而家我唔知,但希望我同你講完呢段說話,我同你都會知,由我第一次見你,我已經對你有好感,雖然我同你識嘅日子唔耐,只係得短短兩個星期左右,呢段日子,我哋晚晚傾電話,有時傾到唔願訓傾到好攰,攰到瞓着咁滯都唔想收線,因為同你傾電話嘅時候種感覺就好似你係我隔離咁,有時聽唔到你把聲我會好想即刻打俾你,有時瞓覺發夢,我會夢見你,瞓醒嘅時候,我會好掛住你,雖然我未拍過拖,但我好清楚呢種係愛嘅感覺,李曉霖,我愛你,做我女朋友好吾好?」

  講完呢段說話,我個心好緊張。
  我好怕Helen會拒絕我,不過今日拖住手,佢都冇抗拒丫,我諗應該成功掛......
  Dead air佐15秒左右,Helen都未有任何反應 ,我個心開始慌喇!

  我:「Helen?」
  Helen:「係」
  我:「你意思係..?」
  Helen:「嗯」
  我:「嗯?咁即係我哋係情侶關係?」
  Helen細細聲,怕怕醜醜咁講:「...係...」
  我即刻係間屋大嗌:「yeah~!」
  Helen喺電話度聽到我咁嘅反應,佢都笑咗出嚟。

  我同Helen講:「今日係2009年12月10號,我唔會吾記得今日,今日係我第一次單獨同女仔出街,第一次拖住女仔隻手,第一次同女仔講我愛你,第一次有女朋友,而今日亦都係我哋嘅紀念日。」
  Helen:「我都會好好記住今日,唔會唔記得,因為今日都係我第一次單獨同男仔出街,第一次比男仔拖住,第一次有男仔同我講我愛你,同埋我都係第一次有男朋友,仲有今日係我第一次同男仔講我愛你......梁家洛,我愛你。」

  幫我聽到Helen講第一句嘅時候,我個心已經開始融緊喇!
  當佢講埋最尾嗰句......真係不得了啦!我個心完全俾Helen攻陷喇!
  成程電話充滿住幸福, 甜蜜嘅味道,我同Helen講咗好多之前冇講過嘅嘢。
  Helen話其實第一次見面都同我一樣對我有好感,返屋企見到我加佢Facebook,個心有莫名嘅興奮。
  咁其實我都明白嘅,憑我英俊嘅面孔,吾比我吸引住都難嘅......哈哈!
  就係咁,我同Helen嘅愛情故事就由今日開始。
  今日我哋都俾咗好多嘅第一次比對方,往後嘅日子仲有更加更加多嘅第一次等緊我哋......  
  而所有嘅第一次對我嚟講,都係刻骨銘心!

  Helen,我呢個初戀對你嚟講,仲有印象嗎?

已有 0 人追稿